پاکستان تحریک انصاف کی رہنما فوزیہ قصوری۔ تصویر بشکریہ انصاف ڈاٹ پی کے۔

اسلام آباد: پاکستان تحریک انصاف کی سینئر رہنما فوزیہ قصوری پارٹی رکنیت سے مستعفی ہوگئی ہیں۔

بدھ کو اسلام آباد میں پریس کانفرنس کرتے ہوئے ان کا کہنا تھا کہ پی ٹی آئی پر ایک مافیا نے قبضہ کر رکھا ہے۔

اس موقع پر ان کا کہنا تھا کہ تحریک انصاف میں اب انصاف نہیں رہا۔

بدھ کے روز ٹوئٹر پر انکا پیغام:

 واضح رہے کہ کئی روز سے فوزیہ قصوری کی پارٹی چھوڑنے سے متعلق خبریں میڈیا پر گردش کررہی تھیں۔

تحریک انصاف کی خواتین ونگ کی صدر رہ چکی فوزیہ دعویٰ کرتی ہیں کہ خواتین کی مخصوص نشستوں کے معاملے پر انہیں نظر انداز کیا گیا۔

ٹوئٹر پر انے پیغام میں فوزیہ کا کہنا تھا کہ انہیں پارٹی قیادت کی جانب سے نظر انداز کیا گیا جنہوں نے انکے خدشات کا جواب تک نہیں دیا۔

 انہوں نے یہ بھی دعوی کیا کہ خواتین کی نشستوں پر شفاف طریقے سے ٹکٹ تقسیم نہیں کیے گئے۔

انکے اعتراضات میں ڈاکٹر شیریں مزاری کو ٹکٹ دینا بھی شامل تھا جنہوں نے عام انتخابات سے صرف چھ ماہ قبل پارٹی میں دوبارہ شمولیت اختیار کی تھی۔

گزشتہ ہفتے فوزیہ نے پارٹی قائد عمران خان سے متعدد مرتبہ رابطہ کرنے کی کوشش کی تاہم بظاہر انہیں جواب نہیں ملا۔

ادھر پارٹی رہنماؤں کا کہنا ہے کہ انہیں فوزیہ قصوری کی جانب سے تحریر شدہ شکایت موصول نہیں ہوئی۔

ٹوئٹر میں اپنی پوسٹ میں فوزیہ کا کہنا تھا ’پارٹی مجھے جانے کے اشارے دے رہی ہے‘ جس پر فوری طور پر شفقت محمود نے انہیں پارٹی نہ چھوڑنے کی درخواست کی۔

 یہ مسئلہ گزشتہ چند دنوں سے پاکستان کے نامور ٹاک شوز میں موضوع بحث بنا ہوا ہے جس میں فوزیہ کے معاملے اور تحریک انصاف کی اندرونی سیاست کے امور کو اجاگر کیا جارہا ہے۔

دوسری جانب میڈیا رپورٹوں کے مطابق، عمران خان نے پی ٹی آئی رہنما کی درخواست کو مسترد کردیا ہے۔

فوزیہ قصوری نے تحریک انصاف میں خدمات سرانجام دینے کے لیے اپنی امریکی شہریت ترک کردی تھی۔

پی ٹی آئی الیکشنز کے بعد تیسری بڑی جماعت بن کر ابھری تاہم پنجاب میں زیادہ نشستیں حاصل نہ کرنے کی وجہ سے اپنی حکومت نہ بنا پائی۔

صوبہ پنجاب کو پاکستان مسلم لیگ نواز کا مضبوط گڑھ سمجھا جاتا ہے اور حالیہ انتخابات کے نتائج سے اس بات کو مزید تقویت ملتی ہے۔

ن لیگ ہی کی طرح پی ٹی آئی کے بھی مرکزی رہنما پنجاب سے تعلق رکھتے ہیں جبکہ محدود نشستیں ہونے کے باعث صرف دو خواتین، مزاری اورآئلہ ملک، کو قومی اسمبلی کے لیے نامزد کیا گیا جبکہ فوزیہ کو نظر انداز کردیا گیا۔