ڈان اخبار میں شائع خبر کے مطابق پنجاب فرانزک سائنس ایجنسی کی تیار کردہ یہ رپورٹ مئی 2023 میں سابق وزیر اعظم عمران خان کی گرفتاری کے بعد پشاور میں ریڈیو پاکستان کے دفتر میں توڑ پھوڑ کی فوٹیج پر مبنی ہے۔

گزشتہ ماہ عدالت نے حکم دیا تھا کہ ویڈیو کلپس فرانزک جانچ کے لیے بھجوائے جائیں اور رپورٹ پیش کی جائے۔

اس موقع پر وکیل دفاع کی جانب سے فوٹیج کی افادیت یا قانونی حیثیت پر کوئی سوال نہیں اٹھایا گیا تھا۔

حکام نے تجزیے کے لیے وزیر اعلیٰ سہیل آفریدی، سابق صوبائی وزرا تیمور سلیم جھگڑا اور کامران بنگش اور تحریک انصاف کے دو دیگر رہنماؤں عرفان سلیم اور عامر خان چمکنی کی تصاویر اور ویڈیو کلپس فراہم کیے تھے۔ ان میں سے کسی کو بھی اس کیس میں نامزد نہیں کیا گیا تھا۔

رپورٹ میں پی ایف ایس اے نے دو نکات پر رائے دی: آیا یو ایس بی میں موجود ویڈیوز اصلی ہیں اور آیا جن افراد کی پروفائل تصاویر دی گئیں وہ ویڈیو کلپس میں نظر آتے ہیں یا نہیں۔

رپورٹ کے مطابق وزیر اعلیٰ سمیت پانچوں افراد ویڈیوز میں دکھائی دیتے ہیں تاہم یہ وضاحت نہیں کی گئی کہ آیا یہ ویڈیوز ریڈیو پاکستان حملے سے متعلق ہیں یا کسی اور واقعے کی ہیں۔

البتہ رپورٹ میں کہا گیا کہ ویڈیوز میں کسی قسم کی ایڈیٹنگ نہیں کی گئی، سوائے مختلف کیمروں سے بنائی گئی فوٹیجز کو یکجا کرنے کے۔

اس کیس سے باخبر ایک قانونی ماہر کے مطابق اس شواہد کے بعد تفتیشی افسر ضمنی چالان کے ذریعے مزید ملزمان کو انسداد دہشت گردی عدالت میں نامزد کر سکتا ہے جبکہ عدالت خود بھی اس معاملے کا نوٹس لے سکتی ہے۔ اسی طرح پاکستان براڈکاسٹنگ کارپوریشن بھی فرانزک رپورٹ کی روشنی میں ملزمان کی شمولیت کے لیے درخواست دائر کر سکتی ہے۔

غیر متعلقہ ویڈیوز

رپورٹ کی تفصیلات سوشل میڈیا پر وائرل ہونے کے فوراً بعد تحریک انصاف کے کئی رہنماؤں نے کہا کہ یہ ویڈیوز ریڈیو پاکستان کے اس واقعے کی نہیں ہیں جو 10 مئی 2023 کو اسلام آباد میں عمران خان کی گرفتاری کے بعد پیش آیا تھا۔

تحریک انصاف کے رہنما تیمور سلیم جھگڑا نے کہا کہ یہ بات دلچسپ ہے کہ یہ مہم وزیر اعلیٰ اور ان دیگر افراد کے خلاف چلائی جا رہی ہے جنہیں اس کیس میں کبھی نامزد ہی نہیں کیا گیا۔

ان کے مطابق اسکرین شاٹس کے ساتھ شیئر کی جانے والی پوسٹس کا ریڈیو پاکستان سے کوئی تعلق نہیں۔ ان کا کہنا تھا کہ پنجاب کی لیب صرف یہ رائے دے رہی ہے کہ ویڈیوز اصلی ہیں یا نہیں۔

انہوں نے بتایا کہ پہلی ویڈیو کا اسکرین شاٹ تو پشاور میں فلمایا ہی نہیں گیا بلکہ وہ اسلام آباد میں 9 مئی کو عمران خان کی گرفتاری کی مذمت کی ویڈیو ہے۔

انسداد دہشت گردی عدالت نے کیس کی آئندہ سماعت 26 جنوری کو مقرر کی ہے۔

یہ مقدمہ انسداد دہشت گردی عدالت میں زیر سماعت ہے، جس میں 75 ملزمان، جن میں موجودہ اور سابق ارکانِ اسمبلی بھی شامل ہیں، پر 3 جون 2025 کو متعدد الزامات کے تحت فرد جرم عائد کی جا چکی ہے۔ مقدمہ 10 مئی 2023 کو ایسٹ کنٹونمنٹ تھانے میں درج کیا گیا تھا۔

ناقابل تردید شواہد

وزیراطلاعات پنجاب عظمیٰ بخاری نے اس حوالے سے کہا ہے کہ پشاور میں ریڈیو پاکستان اور ٹول پلازوں پر تحریک انصاف کی جانب سے کیے گئے حملے ایک منظم سازش کا حصہ تھے اور فرانزک رپورٹ میں ناقابل تردید شواہد سامنے آ چکے ہیں۔

ان کے مطابق رپورٹ میں پشاور کے واقعات کا مکمل فرانزک تجزیہ شامل ہے، جسے ویڈیوز اور تصاویر سے تقویت حاصل ہے۔

انہوں نے کہا کہ یہ تمام شواہد کسی بھی عدالت میں قابلِ قبول ہیں اور ہنگامہ آرائی میں ملوث افراد کو انصاف کے کٹہرے میں لایا جائے گا۔

لاہور سے امجد محمود نے بھی اس رپورٹ میں تعاون کیا۔

ڈان نیوز کے مطابق وزیراعلیٰ خیبرپختونخوا کے معاون خصوصی برائے اطلاعات شفیع جان نے بتایا کہ وزیر اعلیٰ سہیل آفریدی کی زیرصدارت صوبائی کابینہ اجلاس میں اہم فیصلے کئے گیے، جس میں کابینہ نے 9 اور 10 مئی کو سیاسی انتقام کے تحت درج بغیر ثبوت کےمقدمات ختم کرنےکا فیصلہ کیا ساتھ ہی ریڈیوپاکستان پشاور واقعہ کی انکوائری صوبائی اسمبلی کی اسپیشل کمیٹی کےسپرد کرنے کی بھی منظوری دی۔

انہوں نے بتایا کہ صوبائی کابینہ نے سی ٹی ڈی کے لیے 15 کروڑ روپے کی خصوصی گرانٹ کی منظوری دی اور ایکشن ان ایڈ آف سول پاورز قانون کے خاتمے سے متعلق کمیٹی کی سفارشات پر عمل درآمد کی منظوری بھی دے دی گئی۔

مزید بتایا گیا کہ صوبے میں گندم کے ذخائر، بین الصوبائی نقل وحمل اور آئندہ حکمت عملی پر کابینہ کو بریفنگ دی گئی، اضافی گندم کی خریداری کے لیے پہلے سے قائم کمیٹی کو ضرورت پڑنے پر اقدامات کا اختیار دیا گیا۔

معاون خصوصی برائے اطلاعات کے مطابق کابینہ نےکڈنی اور بون میرو ٹرانسپلانٹ کے 2 مریضوں کے لیے مالی امداد کی منظوری دی جب کہ صوبے میں جاری منصوبوں کی جلد تکمیل کے لیے فنڈز کی فراہمی کی منظوری بھی دے دی گئی۔

11ویں این ایف سی کی تشکیل، رواں برس 22 اگست کو وفاقی تقسیم شدہ وسائل کو مرکز اور صوبوں کے درمیان تقسیم کرنے کے لیے ایک نئے ایوارڈ کو حتمی شکل دینے کی غرض سے کی گئی تھی، این ایف سی کا اجلاس 27 اگست کو ہونا تھا، جو نامعلوم وجوہات کی بنا پر 29 اگست تک مؤخر کر دیا گیا تھا۔

اس کے بعد اجلاس سندھ حکومت کی درخواست پر سیلابی صورتحال کے باعث دوبارہ ملتوی ہوا، بعدازاں یہ اجلاس 17 نومبر پھر 18 نومبر کو شیڈول کیا گیا، تاہم وزیر اعظم آفس کی درخواست پر ایک بار پھر ملتوی کر دیا گیا۔

رواں ہفتے کے آغاز میں وزیر اعلیٰ آفریدی نے کہا تھا کہ وفاقی حکومت این ایف سی کے تحت صوبے کو 1.3 کھرب روپے ادا کرنے کی مقروض ہے۔

پشاور میں پریس کانفرنس سے خطاب کرتے ہوئے وزیر اعلیٰ نے کہا کہ سابقہ قبائلی علاقوں کو 2018 میں انتظامی طور پر خیبر پختونخوا میں ضم کیا گیا تھا لیکن مالی طور پر ابھی تک انضمام نہیں ہوا۔

اُن کا کہنا تھا کہ ضم شدہ اضلاع کے لیے این ایف سی کا حصہ 2018 سے خیبر پختونخوا کو ادا نہیں کیا گیا، جو کہ ’آئینی خلاف ورزی‘ ہے۔

سہیل آفریدی نے مزید کہا کہ وفاقی حکومت کو صوبائی حکومت کی ان تجاویز پر غور کرنا چاہیے جو صوبے میں دیرپا امن برقرار رکھنے کے لیے ضروری ہیں، کیونکہ ’بند دروازوں کے پیچھے کیے گئے فیصلے‘ خیبر پختونخوا کو متاثر کرتے ہیں۔

وزیر اعلیٰ آفریدی نے کہا کہ اگر وفاقی حکومت ہماری تجاویز پر عمل کرے تو فیصلوں کا نفاذ اور امن و امان برقرار رکھنا ہماری ذمہ داری ہوگی، اُن کا کہنا تھا کہ صوبائی حکومت چاہتی ہے کہ صوبے میں امن سے متعلق کسی بھی فیصلے میں تمام اسٹیک ہولڈرز کو اعتماد میں لیا جائے۔

وزیر اعلیٰ نے الزام لگایا کہ ’اصل طاقت رکھنے والوں‘ نے ہمیشہ کوشش کی کہ پی ٹی آئی کو تصادم کی طرف دھکیلا جائے، تاہم انہوں نے زور دیا کہ پارٹی پُر امن رہے گی، تاہم قربانی دینے سے کبھی نہیں ہچکچائے گی۔

وزیر اعلیٰ نے کہا کہ مسلسل کوششیں کی گئیں کہ پی ٹی آئی کو تنہا کیا جائے اور پُر امن مظاہرین پر گولیاں چلائی گئیں، انہوں نے یہ دعویٰ بھی کیا کہ بانی پی ٹی آئی عمران خان کو قید تنہائی میں رکھا جا رہا ہے اور ان کے تمام مہمانوں، حتیٰ کہ بہنوں کو بھی ملاقات سے روکا جا رہا ہے۔

وزیر اعلیٰ نے بتایا کہ پی ٹی آئی نے فیصلہ کیا ہے کہ تمام پارلیمنٹیرین منگل کو اسلام آباد ہائی کورٹ (آئی ایچ سی) کے باہر پُرامن احتجاج کریں گے، وہ عمران خان کی بہنوں کے ساتھ اڈیالہ جیل بھی جائیں گے جبکہ صوبائی حکومت پارٹی قیادت کی ہدایات پر عمل کرے گی۔

وزیر اعلیٰ نے کہا کہ بین الاقوامی میڈیا میں عمران خان کی صحت سے متعلق خبروں کے بعد وہ 27 نومبر کو اڈیالہ جیل گئے تاکہ ملاقات کر سکیں، لیکن انہیں ملاقات کی اجازت نہ ملی، باوجود اس کے کہ انہوں نے پوری رات جیل کے باہر دھرنا دیا۔

سہیل آفریدی نے کہا کہ انہوں نے اڈیالہ جیل کے باہر دھرنا اس لیے دیا کیونکہ ان کی جماعت کے ساتھ ناروا سلوک ہو رہا تھا، انہوں نے یہ بھی دعویٰ کیا کہ جہاں بعض وزرائے اعلیٰ کے لیے سہولیات فراہم کی جاتی ہیں اور پاکستان ایئر فورس کے طیارے پیش کیے جاتے ہیں، وہاں اُن کا نام پاسپورٹ کنٹرول لسٹ میں ڈال دیا گیا۔

سوالات کے جواب دیتے ہوئے وزیر اعلیٰ نے کہا کہ خیبر پختونخوا کا کوئی حصہ بھی شدت پسندوں کے کنٹرول میں نہیں، تاہم بغیر نام لیے انہوں نے دعویٰ کیا کہ ’پورا ملک ایک ہی شخص کے کنٹرول میں ہے‘۔

ایک اور سوال کے جواب میں وزیر اعلیٰ نے کہا کہ وادی تیراہ میں ان کے خاندان کی ملکیت میں جائیدادیں ہیں تاہم اُن کی ذاتی ملکیت میں کوئی جائیداد نہیں۔

سہیل آفریدی نے کہا کہ ان کے خلاف حالیہ ڈاکیومنٹری عوام کی توجہ ہٹانے کی کوشش تھی، لیکن عوام نے ان لوگوں کی بات پر یقین نہیں کیا۔

انہوں نے کہا کہ عوام سب کچھ جانتے ہیں، وہ جانتے ہیں کہ کون جھوٹ بول رہا ہے، ہم چاہتے ہیں کہ سب لوگ اپنا کام کریں اور تب ہی ملک ترقی کرے گا۔

سرکاری خبر رساں ادارے ’اے پی پی‘ کے مطابق تحقیقاتی اور انٹیلی جنس ادارے حملے کے پیچھے سہولت کار اور سپورٹ نیٹ ورک کی تلاش میں ہیں، واضح ر ہے کہ حملے میں 3 اہلکار شہید اور 12 زخمی ہوئے تھے۔

حملہ اس وقت ہوا جب ایک خودکش بمبار نے ہیڈکوارٹر کے داخلی دروازے پر خود کو دھماکے سے اڑا دیا، تاہم اہلکاروں نے فوری رد عمل دکھاتے ہوئے خود کش بمبار کے دیگر 2 ساتھیوں کو ہلاک کر دیا، جس سے وہ اندر داخل ہو کر کوئی بڑا نقصان پہنچانے میں ناکام رہے۔

تحقیقات کی پیش رفت اور حملہ آوروں کے افغان شہری ہونے کے شواہد کے بارے میں پوچھے جانے پر آئی جی ذوالفقار حمید نے کہا کہ ہم یہ اس لیے کہہ رہے ہیں کیونکہ اب تک جو بھی شواہد ملے ہیں، ان کے مطابق جب کسی کے پاس شہریت کا ریکارڈ نہیں ہوتا تو اسے افغان یا کسی مشابہہ ملک کا شہری سمجھا جاتا ہے۔

انہوں نے تصدیق کی کہ حکام نے وہ جگہ بھی شناخت کر لی ہے جہاں دہشت گردوں نے ایف سی ہیڈکوارٹر پر حملے سے قبل رات گزاری تھی، تاہم انہوں نے کہا کہ اب تک کوئی سہولت کار گرفتار نہیں ہوا۔

آئی جی ذوالفقار حمید نے مزید کہا کہ دہشت گردوں کی سی سی ٹی وی فوٹیجز حاصل کر لی گئی ہیں اور نیشنل ڈیٹا بیس اینڈ رجسٹریشن اتھارٹی (نادرا) ان کی شناخت کی تصدیق کر رہی ہے۔

انہوں نے بتایا کہ حکام یہ بھی معلوم کر رہے ہیں کہ دہشت گرد پشاور میں داخل ہونے کے لیے کون سا راستہ استعمال کر کے آئے۔

انہوں نے مزید کہا کہ دہشت گردوں کی موٹر سائیکل قبضے میں لے لی گئی اور گاڑی سے حاصل شدہ فنگر پرنٹس اب فرانزک تحقیقات کا حصہ ہیں۔

آئی جی کا مزید کہنا تھا کہ خیبر پختونخوا پولیس کی حالیہ اقدامات کے باعث دہشت گردی کے واقعات میں نمایاں کمی آئی ہے اور صوبائی پولیس فورس کو جدید ہتھیاروں، ٹیکنالوجی، اینٹی ڈرون سسٹمز، بلٹ پروف جیکٹس اور گاڑیوں سے آراستہ کیا جا رہا ہے۔

انہوں نے خیبر پختونخوا پولیس کی بہادری کی بھی تعریف کی اور کہا کہ سخت حالات کے باوجود پولیس خطے میں امن کے لیے قربانیاں دے رہی ہے۔

ڈان نیوز کے مطابق وزیراعظم شہباز شریف کے نام خط میں وزیراعلیٰ خیبرپختونخوا سہیل آفریدی نے لکھا کہ چشمہ رائٹ بینک کینال منصوبے کا 35 سال سےشروع نہ ہونا عدم اعتماد پیداکر رہا ہے۔

انہوں نے لکھا کہ چاروں صوبوں کے منصوبوں میں سے صرف سی آر بی سی کینال پر پیش رفت نہیں ہوئی، جبکہ دیگر صوبوں کے آبپاشی منصوبے1991کے واٹر اپورشنمنٹ اکارڈ کےتحت مکمل ہوچکے۔

وزیراعلیٰ نے مزید کہا کہ سی سی آئی نے منصوبے کی فنانسنگ 65 فیصد وفاق اور 35 فیصد صوبے کےذمہ مقررکی تھی، تاہم وفاق نے خیبر پختونخوا کے منصوبے جان بوجھ کر سردخانے میں ڈال دیے، ایکنک نے 2022 میں 189 ارب روپےکے منصوبےکی منظوری دی مگر منصوبہ شروع نہ ہوسکا۔

سہیل آفریدی کا کہنا تھا کہ واپڈا مسلسل پروکیورمنٹ اور کوالیفکیشن پراسیس میں تاخیرکر رہا ہے، حکومت نےزمین کے حصول کیلئے2ارب روپے جاری اور مزید 5 ارب روپے مختص کیے، واپڈا کی لینڈ ایکوزیشن بھی سست روی کا شکار ہے۔

انہوں نے لکھا کہ وفاقی حکومت کی صرف 100ملین روپےکی الاٹمنٹ غیرسنجیدہ رویہ ہے، چشمہ رائٹ بینک کینال منصوبہ دہشت گردی سے متاثر علاقوں کیلئےاہم ہے،یہ منصوبہ 38 ارب روپےکا معاشی فائدہ دے سکتا ہے۔

سہیل آفریدی نے خط میں مزید لکھا کہ چشمہ رائٹ بینک کینال سے 2.8 لاکھ ایکڑ سے زائد زمین سیراب ہوگی، اس منصوبے میں تاخیر سےعوام میں اعتماد کا بحران پیدا ہو گا۔

صدر کوہاٹ روڈ پر فیڈرل کانسٹیبلری کے ہیڈکوارٹرز کے گیٹ پر خودکُش دھماکے کے بعد فائرنگ کی آوازیں بھی سنی گئیں، ایک بمبار نے اپنے آپ کو ایف سی ہیڈکوارٹر کے گیٹ پر دھماکے سے اُڑا دیا، ایف سی اہلکاروں نے جوانمردی سے مقابلہ کرتے ہوئے فتنۃ الخوارج کے 2 دہشت گردوں کو ہلاک کر دیا، اس دوران 3 ایف سی اہلکار شہید بھی ہوئے۔

سیکیورٹی فورسز نے علاقے کو گھیرے میں لے لیا ہے، علاقے کی کلیئرنس کا عمل جاری ہے۔

پشاور صدر کے قریب ڈینز ٹریڈ سینٹر کے بالمقابل ایف سی ہیڈ کوارٹرز پر خودکش حملے کی تصدیق انسپکٹر جنرل (آئی جی) خیبر پختونخوا ذوالفقار حمید نے بھی کی ہے، دھماکے کی اطلاع ملنے کے بعد ریسکیو اور ایمبولینس سروسز کو جائے وقوع کی جانب روانہ کر دیا گیا۔

کیپیٹل سٹی پولیس افسر (سی سی پی او) میاں سعید نے بتایا کہ 3 خودکش حملہ آوروں نے فیڈرل کانسٹیبلری پر حملہ کیا، ایک خودکش حملہ آور نے خود کو مرکزی گیٹ پر اڑایا جب کہ 2 خودکش حملہ آور فیڈرل کانسٹیبلری ہیڈ کوارٹرز کے اندر داخل ہوئے۔

میاں سعید نے بتایا کہ فیڈرل کانسٹیبلری کے اہلکاروں نے دونوں حملہ آوروں پر فائرنگ کی، تینوں خودکش حملہ آور مارے گئے ہیں، فیڈرل کانسٹیبلری کے جوانوں نے بہادری سے خودکش حملے کو ناکام بنایا۔

ڈپٹی کمانڈنٹ ایف سی جاوید اقبال کے مطابق تینوں خودکش حملہ آور مارے گئے، جوانوں نے بہادری سے دہشت گردوں کا مقابلہ کیا، خودکش حملے میں ایف سی کے 3 اہلکار شہید ہوئے۔

ہسپتال ذرائع کا کہنا ہے کہ حملے میں 9 افراد زخمی ہوئے جنہیں طبی امداد دی جا رہی ہے، حملے میں زخمی ہونے والوں میں 2 ایف سی اہلکار اور 7 شہری شامل ہیں، تمام زخمیوں کو طبی امداد فراہم کی جا رہی ہے اور ان کی حالت تسلی بخش ہے۔

آئی جی ذوالفقار حمید نے بتایا کہ 2 بمبار ایف سی ہیڈکوارٹر میں داخل ہونا چاہتے تھے، جنہیں اہلکاروں نے گیٹ پر ہی ہلاک کر دیا، اس دوران ایک دہشت گرد نے خود کو دھماکے سے اڑا دیا، پولیس جائے وقوع پر موجود ہے، جب کہ علاقے میں کلیئرنس آپریشن کا عمل جاری ہے۔

ہلاک دہشتگرد افغان شہری نکلے

سیکیورٹی ذرائع کا کہنا ہے کہ پشاور میں صدر کوہاٹ روڈ پر آج صبح تقریباً 8 بجے فتنۃ الخوارج نے فیڈرل کانسٹیبلری ہیڈکوارٹر پر حملے کی کوشش کی، جسے بہادر ایف سی جوانوں نے ناکام بنا دیا، ایف سی ہیڈ کوارٹرز پر حملہ کرنے والے دہشتگردوں کی شناخت کرلی گئی ہے، ہلاک ہونے والے تینوں دہشت گرد افغان باشندے تھے، ہلاک دہشت گردوں سے ہتھیار اور گولہ بارود بھی برآمد ہوا۔

ذرائع کے مطابق خوارج نے فیڈرل کانسٹیبلری ہیڈکوارٹرکے گیٹ پر خودکُش دھماکا کیا۔

خودکُش دھماکے کے بعد 2 خوارج نے ہیڈکوارٹرز میں گھسنے کی کوشش کی جن کو مار دیا گیا، تینوں حملہ آور جہنم واصل ہو چکے ہیں۔

سیکیورٹی ذرائع کے مطابق فائرنگ کی آواز رک گئی ہے، حملے میں فیڈرل کانسٹیبلری کے 3 اہلکار شہید ہوئے جبکہ 2 زخمی ہیں۔

ذرائع کا کہنا ہے کہ سیکیورٹی فورسز نے علاقے کو گھیرے میں لے لیا ہے، علاقے کی کلیئرنس کی جا رہی ہے۔

بڑے نقصان سے بچ گئے، وزیراعظم

وزیراعظم شہباز شریف نے پشاور میں ایف سی ہیڈکوارٹر پر دہشت گرد حملے کی شدید مذمت کرتے ہوئے کہا ہے کہ ہم سیکیورٹی فورسز کی بروقت کارروائی کی بدولت بڑے نقصان سے بچ گئے ہیں۔

وزیراعظم نے زخمیوں کو فوری طبی امداد فراہم کرنے کی ہدایت کرتے ہوئے زخمیوں کی جلد از جلد صحت یابی کے لیے دعا کی۔

انہوں نے ہدایت کی کہ واقعے کے ذمہ داران کی جلد از جلد شناخت کر کے کیفر کردار تک پہنچایا جائے۔

شہباز شریف نے کہا کہ پاکستان کی سالمیت پر حملہ کرنے والے دہشت گردوں کے مزموم عزائم کو خاک میں ملا دیں گے، حکومت پاکستان ملک سے دہشت گردی کے مکمل خاتمے کے لیے پر عزم ہے۔

محسن نقوی کا ایف سی جوانوں کو خراج تحسین

وفاقی وزیر داخلہ محسن نقوی نے پشاور میں فیڈرل کانسٹیبلری کے ہیڈکوارٹرز پر فتنۃ الخوارج کے حملے کی پرزور مذمت کرتے ہوئے فتنۃ الخوارج کا حملہ ناکام بنانے پر فیڈرل کانسٹیبلری کے جوانوں کو خراج تحسین پیش کیا ہے۔

انہوں نے کہا کہ فیڈرل کانسٹیبلری کے جری جوانوں نے بہادری سے فتنۃ الخوارج کے حملے کو ناکام بنایا، حملہ آور دہشت گردوں کو جہنم واصل کرنے پر فیڈرل کانسٹیبلری کے جوانوں کی جرات کو سلام پیش کرتا ہوں۔

وفاقی وزیر داخلہ نے کہا کہ فیڈرل کانسٹیبلری کے جوانوں نے بروقت کارروائی کرکے دہشت گردی کے منصوبے کو ناکام بنایا، جام شہادت نوش کرنے والے 3 ایف سی جوانوں کو خراج عقیدت پیش کرتا ہوں۔

وزیر داخلہ محسن نقوی نے شہید جوانوں کے لواحقین سے دلی ہمدردی و تعزیت کا اظہار کیا ہے۔

ڈان اخبار میں شائع رپورٹ کے مطابق انہوں نے کہا کہ قبائلی اضلاع اور مالاکنڈ ڈویژن سے لوگ پشاور منتقل ہوئے، جس سے صوبائی دارالحکومت پر آبادی کا بوجھ بڑھ گیا ہے۔

انہوں نے کہا کہ پشاور کی ترقی ناگزیر ہے، صوبائی دارالحکومت پر خصوصی توجہ دی جا رہی ہے۔

سرکاری بیان کے مطابق وزیراعلیٰ نے پشاور کی خوبصورتی کے منصوبے کے افتتاح کے بعد اپنے خطاب میں کہا کہ اس منصوبے کا بنیادی مقصد صوبائی دارالحکومت کی پرانی شان و شوکت کو بحال کرنا ہے۔

انہوں نے کہا کہ صوبائی دارالحکومت میں آنے والوں کی اکثریت باہر سے آتی ہے اور شہر کی بہتری ہم سب کی مشترکہ ذمہ داری ہے۔

ان کا کہنا تھا کہ صوبے میں متعارف کرائی جانے والی تمام پالیسیاں اور قوانین صرف عوامی فلاح اور وسیع تر عوامی مفاد پر مبنی ہوں گے، کسی کو استثنیٰ دینے کے لیے قانون نہیں بنائیں گے، جو کوئی بھی غلط کام کرے گا اسے جواب دہ ہونا پڑے گا۔

بیان میں کہا گیا کہ اس منصوبے کے تحت صوبائی دارالحکومت میں سڑکوں کی بحالی، اسٹریٹ لائٹس کی تنصیب، ٹریفک کی روانی کے لیے اقدامات، مجسموں کی تنصیب، سبزہ زاروں کی تعمیر و ترقی اور دیگر زیبائش کے کام کیے جائیں گے۔

وزیراعلیٰ نے کہا کہ کچھ نادان لوگ دہشت گردی کے خلاف جنگ کے لیے این ایف سی ایوارڈ کے تحت ملنے والے ایک فیصد حصے پر سوال اٹھاتے ہیں، مگر وہ اس حقیقت کو نظرانداز کر دیتے ہیں کہ اس جنگ میں سب سے زیادہ قربانیاں خیبر پختونخوا نے دی ہیں۔

انہوں نے کہا کہ دیگر صوبوں کو مختلف مدات میں زیادہ فنڈز ملتے ہیں لیکن خیبر پختونخوا پھر بھی مالی امتیاز کا سامنا کرتا رہتا ہے۔

ان کا کہنا تھا کہ وفاقی حکومت کے ذمے خالص منافع برائے بجلی کی مد میں 2 ہزار 200 ارب روپے واجب الادا ہیں، وفاقی حکومت نے ضم شدہ اضلاع کے لیے سالانہ 100 ارب روپے دینے کا وعدہ کیا تھا، لیکن رقم جاری نہیں کی گئی اور 550 ارب روپے تاحال باقی ہیں۔

سہیل آفریدی نے کہا کہ سابقہ فاٹا کا انتظامی انضمام تو ہو چکا ہے، لیکن مالی انضمام ابھی تک نہیں ہوا، مجموعی طور پر 3 ہزار ارب روپے وفاق کے ذمے واجب الادا ہیں۔

انہوں نے کہا کہ قبائلی اضلاع کے انضمام کے بعد این ایف سی ایوارڈ میں خیبر پختونخوا کا حق 19.4 فیصد بنتا ہے، مگر صوبے کو صرف 14.6 فیصد دیا جا رہا ہے، ہم اپنے پورے حقوق کا مطالبہ کرتے ہیں، وفاقی حکومت خیبر پختونخوا کے ساتھ سوتیلے بچے جیسا سلوک کر رہی ہے۔

نئے منصوبے کا حوالہ دیتے ہوئے وزیراعلیٰ نے کہا کہ پشاور بطور صوبائی دارالحکومت ہم سب کی مشترکہ ذمہ داری ہے، ہم اس کی ترقی اور خوبصورتی کے لیے مزید منصوبے لاتے رہیں گے، یہ شہر ہمارا چہرہ ہے۔

انہوں نے کہا کہ پشاور کے لیے ایک جامع ماسٹر پلان عوامی نمائندوں سے مشاورت کے بعد جلد تیار کیا جائے گا۔

اس سے قبل، حکام نے وزیراعلیٰ کو بریفنگ دیتے ہوئے بتایا کہ خوبصورتی منصوبے میں پشاور رنگ روڈ، جمرود روڈ اور جی ٹی روڈ کی بحالی شامل ہے۔

صوبائی وزیر برائے بلدیات و دیہی ترقی مینا خان آفریدی نے کہا کہ بلدیات کا محکمہ اور پشاور ڈیولپمنٹ اتھارٹی (پی ڈی اے) نے تفصیلی کام مکمل کر لیا ہے اور امید ہے کہ منصوبے کی پریزنٹیشن اگلے ہفتے شیئر کی جائے گی۔

انہوں نے کہا کہ پشاور 2013 سے پہلے کے پشاور کی نسبت اب کافی بہتر ہے۔

ان کا کہنا تھا کہ پشاور رنگ روڈ کے نامکمل حصے کا افتتاح جنوری 2026 میں کیا جائے گا، صوبائی دارالحکومت مشترکہ کوششوں سے بدل دیا جائے گا اور امید ہے کہ جون 2026 تک نمایاں تبدیلیاں نظر آئیں گی۔

تقریب میں پشاور سے منتخب نمائندوں، سابق اراکینِ صوبائی اسمبلی اور محکمہ بلدیات کے اعلیٰ حکام نے بھی شرکت کی۔

9 مئی 2023 کو سابق وزیرِ اعظم اور پی ٹی آئی کے بانی عمران خان کی اسلام آباد ہائی کورٹ کے احاطے سے گرفتاری کے بعد ملک بھر میں فسادات پھوٹ پڑے تھے جو کم از کم 24 گھنٹے تک جاری رہے تھے۔

ان فسادات کے دوران سرکاری املاک اور فوجی تنصیبات کو بھی نقصان پہنچایا گیا تھا جن میں خیبر پختونخوا کے صوبائی دارالحکومت پشاور میں واقع ریڈیو پاکستان کی عمارت بھی شامل تھی۔

مینا خان نے پشاور میں وزیراعلیٰ کے مشیر شفیع اللہ جان کے ہمراہ ایک پریس کانفرنس کے دوران یہ اعلان کیا کہ خیبر پختونخوا حکومت ریڈیو پاکستان کی عمارت میں ہونے والی توڑ پھوڑ کی تحقیقات کے لیے ایک کمیشن تشکیل دے گی۔

مینا خان نے کہا،’چونکہ یہ ( عمارت ) خیبر پختونخوا میں ہے اور ہمارے دائرہ اختیار میں آتی ہے، اس لیے ہماری پہلی کابینہ ریڈیو پاکستان کی عمارت میں ہونے والے واقعے کی تحقیقات کے لیے ایک انکوائری کمیشن تشکیل دے گی۔‘

انہوں نے مزید کہا،’ یہ کمیشن اس بات کی تحقیقات کرے گا کہ ریڈیو پاکستان کی عمارت میں جو کچھ ہوا، اس کے پیچھے کون تھا، اور سی سی ٹی وی فوٹیج کا تجزیہ کیا جائے گا۔ ہم دیکھیں گے کہ دروازے کس نے کھولے اور یہ فوٹیج اب تک سامنے کیوں نہیں آئی۔’

صوبائی وزیر نے اس ویڈیو کے بارے میں بھی بات کی جس میں مبینہ طور پر خیبر پختونخوا کے وزیراعلیٰ سہیل آفریدی کو 9 مئی کے فسادات کے دوران لاہور میں کور کمانڈر ہاؤس کے باہر دکھایا گیا ہے۔ انہوں نے وضاحت کی کہ وزیراعلیٰ اُس وقت پشاور میں موجود تھے۔

انہوں نے کہا کہ وزیراعظم کے معاونِ خصوصی برائے اطلاعات برائے خیبر پختونخوا امور اختیار ولی خان نے گزشتہ روز ایک پریس کانفرنس میں اس ویڈیو کا ذکر کیا تھا۔

’ انہوں نے دعویٰ کیا کہ وہ (سہیل آفریدی صاحب) عمارت کے سامنے تھے، لیکن انہیں سمجھنا چاہیے کہ اُس وقت سہیل آفریدی صاحب پشاور میں تھے۔’ ’ وہ کوئی ثبوت نہیں ڈھونڈ پا رہے، اس لیے جھوٹ کا سہارا لے رہے ہیں۔’

انہوں نے مزید کہا:’ 9 مئی ایک جال ہے جس کے ذریعے پی ٹی آئی اور عمران خان پر دباؤ ڈالا جا رہا ہے۔ وہ اس بہانے کو وزیراعلیٰ سہیل آفریدی صاحب کے خلاف استعمال کر رہے ہیں، ہم اس کی مذمت کرتے ہیں۔’

شفیع اللہ جان نے بھی اختیار ولی پر تنقید کرتے ہوئے کہا کہ انہوں نے ایک دن قبل نوشہرہ میں پریس کانفرنس کے دوران جو ویڈیو دکھائی، وہ ’ ایڈیٹ شدہ’ تھی۔

صحافیوں کے سوالات کے جواب میں مینا خان نے کہا کہ یہ ویڈیو مارچ 2023 میں زمان پارک کے محاصرے کے دوران کی ہے، جب پولیس نے پی ٹی آئی کے بانی کو گرفتار کرنے کے لیے لاہور میں واقع ان کی رہائش گاہ میں داخل ہونے کی کوشش کی تھی۔

انہوں نے زور دے کر کہا:’ جو ویڈیو دکھائی گئی، وہ 9 مئی کی نہیں ہے۔ وہ ویڈیو ایڈیٹ اور مسخ کی گئی ہے۔ یہ ویڈیو سہیل آفریدی صاحب کے سوشل میڈیا صفحات پر موجود ہے، کوئی بھی دیکھ سکتا ہے کہ یہ 9 مئی سے دو ماہ پہلے کی ہے۔ آپ ویڈیو میں ہمارے کارکنوں پر واٹر کینن کے استعمال کو بھی دیکھ سکتے ہیں۔’

شفیع اللہ جان نے کہا کہ پی ٹی آئی اختیار ولی کے پھیلائے گئے ’ جھوٹ’ کا جواب دے گی، اور خبردار کیا کہ’ جو کوئی بھی جھوٹی ویڈیو استعمال کرے گا، اسے منہ توڑ جواب دیا جائے گا۔’

اتوار (2 نومبر) کو جاری ہونے والے غیر سرکاری نتائج سے ظاہر ہوا کہ پشاور کی 7 میں سے 6 نشستوں پر اے این پی کے ذیلی وکلا گروپ ’ملگری وکیلان‘ کے 3 امیدوار، پی ٹی آئی وکلا ونگ کے 2 امیدوار اور ایک آزاد امیدوار کامیاب ہوئے، ساتویں نشست کے نتائج کے بارے میں آخری اطلاعات تک متضاد رپورٹس موصول ہو رہی تھیں۔

پشاور سے کامیاب ہونے والوں میں ملگری وکیلان کے خضر حیات خزانہ، فضلِ وحید اور بابر خان یوسفزئی، انصاف لائرز فورم کے علی زمان اور صوفیہ نُورین اور آزاد امیدوار محمد سعید شامل ہیں۔

جہاں تک ساتویں نشست کے فاتح کا تعلق ہے، ابتدائی طور پر ملگری وکیلان کے رفیق محمند کی کامیابی کی اطلاع ملی تھی، تاہم بعد میں ایک خاتون امیدوار خوشنود ذاکر اللہ کی کامیابی کی رپورٹس بھی سامنے آئیں، انتخابات کے سرکاری نتائج 4 نومبر کو جاری کیے جائیں گے۔

خیبر پختونخوا کے چیئرمین بار کونسل اور ایڈووکیٹ جنرل شاہ فیصل عثمان خیل نے انتخابات میں ریٹرننگ آفیسر کی زمہ داریاں نبھائیں۔

دیگر شہروں کے غیر سرکاری نتائج کے مطابق نوشہرہ میں آزاد امیدوار فدا آفریدی نے کامیابی حاصل کی، مردان میں ملگری وکیلان کے زربد شاہ اور اسلامی لائرز فورم کے اسفندیار کامیاب ہوئے، جبکہ صوابی میں ملگری وکیلان کے سید مبشر شاہ فاتح قرار پائے۔

اسی طرح پیپلز لائرز فورم کے سعید حکیم نے بونیر اور ملاکنڈ کی مشترکہ نشست جیت لی، سوات میں ملگری وکیلان کے عنایت خان کامیاب ہوئے، جبکہ شانگلہ میں جمعیت لائرز فورم کے فواد خان نے کامیابی حاصل کی، ایبٹ آباد میں مسلم لیگ (ن) کی حمایت یافتہ محمد علی خان اور آزاد امیدوار شاہ فیصل کامیاب ہوئے۔

مانسہرہ سے انصاف لائرز فورم کے وقاص رضا اور جمعیت لائرز فورم کے وقار الملک کامیاب ہوئے، جبکہ ہری پور کی نشست اے این پی کے حمایت یافتہ شاہد محمود نے جیت لی۔

ڈیرہ اسماعیل خان سے پیپلز لائرز فورم کے حمایت یافتہ حشمت خان اور احمد علی کامیاب ہوئے، جبکہ لکی مروت میں انصاف لائرز فورم کے فاروق صابر نے کامیابی حاصل کی۔

کراک میں ملگری وکیلان کے احمد فاروق خٹک فاتح قرار پائے، کوہاٹ میں اے این پی کے حمایت یافتہ عماد اعظم کامیاب ہوئے، بنوں میں ملگری وکیلان کے شاہ حسین نے نشست جیت لی، چترال اپر و لوئر سے اسلامی لائرز فورم کے اکرام حسین کامیاب ہوئے، جبکہ دیر اور باجوڑ کی مشترکہ نشست ملگری وکیلان کے شاہ فیصل یوسفزئی نے جیت لی۔

انہوں نے بتایا کہ پولیس اور سیکیورٹی فورسز نے علاقے کو گھیرے میں لے لیا ہے، بم ڈسپوزل یونٹ (بی ڈی یو) ریسکیو اور فائر بریگیڈ کی ٹیمیں موقع پر موجود ہیں اور اپنی کارروائی جاری رکھے ہوئے ہیں۔

انہوں نے کہا کہ ابتدائی تحقیقات کے مطابق یہ واقعہ دہشت گردی کی واردات نہیں لگتا، فی الحال تھانے پر حملے کے شواہد نہیں ملے، تاہم تحقیقات کے بعد حتمی طور پر کچھ کہا جاسکے گا۔

دوسری جانب سینئر سپرنٹنڈنٹ آف پولیس (ایس ایس پی) آپریشنز نے بتایا کہ تھانہ سی ٹی ڈی اور اطراف کےعلاقوں کو سیل کرکے نفری تعینات کی گئی ہے، دھماکے سے عمارت کے ایک حصے کو نقصان پہنچا ہے۔

پولیس حکام کا کہنا ہے کہ ابتدائی تفتیش کے بعد جیسے ہی مزید معلومات دستیاب ہوں گی، میڈیا اور عوام سے شیئر کی جائیں گی۔

وزیر اعظم کے کوآرڈینیٹر اختیار ولی خان نے نوشہرہ میں میڈیا سےگفتگو کرتے ہوئے کہا کہ وفاقی وزیر اطلاعات و نشریات عطا اللہ تارڑ نے پہلے دن کہا تھا کہ سہیل آفریدی دہشت گردانہ کارروائیوں میں ملوث ہیں، تاہم ان کی ویڈیوز اب سامنے آگئی ہیں، ہم انتظار اور امید لگائے ہوئے تھےکہ حادثاتی اور عشقِ عمران میں مبتلا وزیرِ اعلیٰ صاحب کو اگر معلوم ہو جائے کہ ان کی ریاستی زمہ داریاں کچھ اور ہیں۔

سہیل آفریدی سامنے آنے والی ویڈیوز کو ہر وقت اپنے ساتھ گھومنے والے بیرسٹرز کو دکھائیں، اور ان سے مشورہ کریں، وزیراعلیٰ خیبرپختونخوا کی ایک دو ویڈیوز اور بھی ہمارے پاس موجود ہیں، جو بعد میں کسی وقت دکھائیں گے۔

اختیار ولی نے صوبائی حکومت پر تنقید کرتے ہوئے کہا کہ پاکستان تحریک انصاف (پی ٹی آئی) کی حکومت ہونے کے باوجود پشاور کے 4 ہسپتالوں میں گزشتہ 13 سال کے دوران کوئی اضافہ نہیں ہوا، وہاں کوئی ایک سڑک، کالج اور یونیورسٹی نہیں بن سکی۔

وہ قبائلی اضلاع جس کی نمائندگی، سہیل آفریدی کرتے ہیں، کیا ان کی عشق عمرانی حکومت نے وہاں کوئی کالج یا اسکول بنایا ہے؟ کیا یہ عشق عمرانی ہے کہ آپ ریاست پر چڑھائی کر دیں ؟

وزیراعظم کے کوآرڈینیٹر کا کہنا تھا کہ وزیرِ اعلیٰ خیبرپختونخوا نے بڑے جوش میں آکر کہا تھا کہ جب تک عمران خان سے ملاقات نہ کر لوں، اُس وقت تک کابینہ نہیں بناؤں گا، اگر آپ کو معلوم نہیں تو جو آپ کے آس پاس ہر وقت دو، چار بیرسٹر گھوم رہے ہوتے ہں ان ہی سے پچھ لیں کہ ثاقب نثار کی عدالت کا فیصلہ تھا کہ کسی سزا یافتہ شخص کے مشورے سے کابینہ نہیں بنے گی۔

سزا یافتہ شخص کے مشورے سے حکومت کی تشلیل نہیں ہو گی، اس کے پاس کوئی حکومتی عہدہ نہیں ہوگا اور وہ حکومت اور پارٹی کی پالیسی سازی میں کوئی عمل دخل نہیں کر سکے گا، یہ تو آپ کے چہیتے ثاقب نثار کی عدالت کا فیصلہ تھا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف فیلڈ مارشل سید عاصم منیر نے پشاور کا دورہ کیا، جہاں انہوں نے قبائلی عمائدین کے جرگے سے ملاقات کی۔

ترجمان پاک فوج کا کہنا تھا کہ فیلڈ مارشل عاصم منیر کے پشاور پہنچنے پر کور کمانڈر پشاور نے ان کا استقبال کیا، آرمی چیف کو کور ہیڈکوارٹر پشاور میں سیکیورٹی صورتحال پر بریفنگ دی گئی۔

اعلامیے کے مطابق فیلڈ مارشل سید عاصم منیر کو سرحدی امن، آپریشنل تیاری اور پاک-افغان سرحد پر امن واستحکام کے لیے جاری انسدادِ دہشت گردی کی کوششوں پر جامع بریفنگ دی گئی۔

آرمی چیف نے جرگے سے خطاب کرتے ہوئے قبائلی عوام کی غیر متزلزل حمایت کو سراہا اور حالیہ پاک-افغان کشیدگی کے دوران سیکیورٹی فورسز کے ساتھ تعاون پر قبائلی عوام کو خراج تحسین پیش کیا۔

فیلڈ مارشل عاصم منیر نے دہشت گردی کے خلاف جنگ میں خیبرپختونخوا کے بہادر عوام کی لچک اور قربانیوں کو زبردست خراج تحسین پیش کیا۔

ان کا کہنا تھا کہ پاکستان افغانستان سمیت اپنے تمام ہمسایوں سے امن چاہتا ہے، تاہم اپنی سرزمین پر افغان سرزمین سے دہشت گردی برداشت نہیں کرے گا۔

آرمی چیف نے واضح کیا کہ افغانستان کی جانب سے مسلسل دہشت گردی کے باوجود پاکستان نے گزشتہ چند برسوں میں تحمل کا مظاہرہ کیا اور پاک-افغان تعلقات کو بہتر بنانے کے لیے سفارتی اور معاشی سطح پر متعدد اقدامات کیے۔

پاک فوج کے سربراہ نے افغان طالبان کے رویے پر تشویش کا اظہار کرتے ہوئے کہا کہ افغان طالبان بھارتی حمایت یافتہ گروہوں ’فتنۃ الخوارج اور فتنۃ الہندوستان‘ کے خلاف کارروائی کے بجائے ان کی پشت پناہی اور انہیں ہر ممکن مدد فراہم کر رہی ہے۔

انہوں نے قبائلی عمائدین کو یقین دلایا کہ پاکستان، بالخصوص خیبر پختونخوا کو دہشت گردوں اور ان کے سہولت کاروں سے مکمل طور پر پاک کیا جائے گا اور ملک بھر سے دہشت گردی کا مکمل خاتمہ کیا جائے گا۔

آئی ایس پی آر کے مطابق قبائلی عمائدین نے دہشت گردی اور افغان طالبان کے خلاف فوج سے مکمل تعاون کا عزم دہرایا، انہوں نے اس بات پر زور دیا کہ فتنۃ الخوارج کی گمراہ کن سوچ کو خیبر پختونخوا کے قبائل میں کوئی پذیرائی حاصل نہیں۔

پاک افغان کشیدگی کا پس منظر

افغانستان کی سرزمین سے کالعدم تحریک طالبان پاکستان ( ٹی ٹی پی ) اور فتنۃ الہندوستان کے دہشت گرد پاکستان میں داخل ہوکر دہشتگردانہ کارروائیاں کرتے آرہے ہیں، جس پر حکومت پاکستان کی جانب سے بار بار طالبان حکومت سے کہا گیا کہ وہ اپنی سرزمین پاکستان میں دہشتگردانہ کارروائیوں کے لیے استعمال نہ ہونے دے، مگر افغان سرزمین سے پاکستان میں دہشتگردی کی کاررووائیوں کا سلسلہ تھم نہ سکا۔

پاکستان اور افغانستان کے درمیان کشیدگی اور رواں ماں ہونے والی جھڑپوں کے بعد ترکیہ کے شہر استنبول میں قطر اور ترکیہ کی ثالثی میں دونوں ممالک کے نمائندوں کے درمیان مذاکرات ہوئے تھے، تاہم 29 اکتوبر کو وفاقی وزیر اطلاعات و نشریات عطا اللہ تارڑ نے کہا کہ استنبول میں اسلام آباد اور کابل کے درمیان حالیہ مذاکرات کسی عملی حل تک نہیں پہنچ سکے،اور پاکستان اپنے شہریوں کو دہشت گردی سے محفوظ رکھنے کے لیے تمام ممکنہ اقدامات جاری رکھے گا۔

عطا تارڑ نے کہا تھا کہ افغان طالبان کے حکمرانوں سے کئی بار کہا گیا ہے کہ وہ دوحہ معاہدے میں پاکستان اور بین الاقوامی کمیونٹی کے لیے کیے گئے اپنے تحریری وعدے پورے کریں، تاہم افغان طالبان کی حکومت کے ساتھ پاکستان کی کاوشیں رائیگاں ثابت ہوئیں، کیونکہ انہوں نے بدستور پاکستان مخالف دہشت گردوں کی حمایت جاری رکھی۔

تاہم ثالثوں کی درخواست پر پاکستان افغان طالبان سے مذاکرات دوبارہ شروع کرنے پر رضامند ہوگیا، مذاکراتی عمل کو جاری رکھ کر امن کو ایک اور موقع دینے کا فیصلہ کیا گیا ہے، جس کے بعد پاکستان اور طالبان حکومت کے درمیان مذاکرات دوبارہ شروع ہو گئے۔

ڈان نیوز کے مطابق ذرائع کا کہنا تھا کہ یہ مذاکرات استنبول میں ثالثوں کی موجودگی میں ہو رہے ہیں، استبول میں گزشتہ مذاکرات 4 روز جاری رہے، تاہم طالبان کے غیر لچکدار رویے کے باعث مذاکرات کسی نتیجے پر نہیں پہنچ سکے تھے۔

اس سے قبل پاکستان نے ثالث کی درخواست پر افغان طالبان سے مذاکرات دوبارہ شروع کرکے امن کو ایک اور موقع دینے کا فیصلہ کیا تھا اور پاکستان وفد نے استنبول میں اپنے قیام کی مدت میں توسیع کردی تھی۔

خرم ذیشان نے مجموعی طور پر کاسٹ کیے گئے 137 ووٹوں میں سے 91 ووٹ حاصل کر کے کامیابی اپنے نام کی، حزب اختلاف کے حمایت یافتہ تاج محمد آفریدی 45 ووٹ حاصل کر سکے جب کہ ایک ووٹ مسترد اور 8 ممبران اسمبلی نے اپنا ووٹ کاسٹ نہیں کیا۔

خیبرپختونخوا اسمبلی میں ہونے والے سینیٹ کے ضمنی انتخاب میں جنرل نشست کے لیے 3 امیدوار میدان میں تھے، یہ نشست تحریک انصاف کے رہنما اور سینیٹ میں اپوزیشن لیڈر شبلی فراز کو 9 مئی 2023 کے فسادات سے متعلق مقدمات میں سزا سنائے جانے کے بعد نااہل قرار دینے کے بعد خالی ہوئی تھی۔

قبل ازیں، پی ٹی آئی کے ایک اور امیدوار عرفان سلیم، جو انتخابی فہرست میں شامل ہیں، انہوں نے خرم ذیشان کے کورنگ امیدوار کے طور پر حصہ لیا، ووٹنگ صبح 9 بج کر 30 منٹ پر شروع ہو کر شام 4 بجے تک جاری رہی۔

صوبائی الیکشن کمشنر سعید گل نے پولنگ کے لیے ریٹرننگ افسر کے فرائض انجام دیے۔

خیبرپختونخوا کے کُل 145 ارکانِ اسمبلی سینیٹ کی اس نشست کے لیے ووٹ دینے کے اہل ہیں، جبکہ کامیابی کے لیے کم از کم 75 ووٹ درکار تھے۔

وزیر اعلیٰ خیبرپختونخوا سہیل آفریدی نے بھی اسمبلی پہنچ کر اپنا ووٹ کاسٹ کیا اور کہا کہ انشا اللہ چیئرمین عمران خان کے نامزد امیدوار خرم شہزاد بھاری اکثریت سے کامیاب ہوں گے۔

آزاد امیدوار عابد خان یوسفزئی اور پیپلز پارٹی کے امیدوار نثار خان الیکشن لڑنے سے دستبردار ہوگئے، گزشتہ روز سپریم کورٹ کے ایک آئینی بینچ نے شبلی فراز کے وکیل کی آج کے ضمنی انتخاب کو روکنے کی درخواست مسترد کر دی تھی۔

شبلی فراز نے اپنی نااہلی اور بطور سینیٹر ڈی نوٹی فکیشن کو پشاور ہائی کورٹ میں چیلنج کیا تھا۔

تاہم، ہائی کورٹ نے اس ماہ کے اوائل میں انہیں اور 2 دیگر ارکانِ قومی اسمبلی کو کوئی ریلیف دینے سے انکار کر دیا تھا، اور الیکشن کمیشن کو خالی نشستیں پُر کرنے کی اجازت دی تھی۔

عدالت نے شبلی فراز سے کہا تھا کہ وہ پہلے متعلقہ عدالت میں خود پیش ہوں، پھر ریلیف کی درخواست دیں۔

وزیر اعلیٰ سہیل آفریدی نے پشاور ہائی کورٹ بار، ڈسٹرکٹ اور تحصیل بارز کو گرانٹ کے چیکس تقسیم کرنے کے تقریب سے خطاب میں کہا کہ سیاسی نظریہ ہر کسی کا اپنا اپنا ہوتا ہے لیکن پاکستان میں قانون کو روندا جارہا ہے جب کہ ہمارے ساتھ ہونے والی زیادتیوں کا ذکر یہاں ضرور کروں گا۔

ان کا کہنا تھا کہ میں لایا گیا نہیں بلکہ جمہوری طریقے سے آیا ہوں اور بطور وزیر اعلیٰ بانی پی ٹی آئی سے ملنا چاہتا تھا، اس حوالے سے وزیراعظم سے درخواست کی کہ میں عمران خان سے ملنا چاہتا ہوں۔

انہوں نے مزید کہا کہ اسلام آباد ہائی کورٹ کے 3 ججز کے حکم کے باوجود ایک حوالدار نے مجھے روک لیا، یہ عدلیہ کی کمزوری ہے کہ 3 ججز کا حکم ایک حوالدار ردی کی ٹوکری میں پھینک دیتا ہے۔

وزیراعلیٰ خیبرپختونخوا نے کہا کہ صرف ہم اس آگ میں نہیں جلیں گے بلکہ یہ آگ آپ کے گھر تک بھی آئے گی، ہم نے بندوق کا مقابلہ آئین کے مطابق کرنا ہے، فیصلے نہ ماننے پر ججز کو سامنے آنا چاہیے، ہم سب ان کا ساتھ دیں گے۔

ان کا کہنا تھا کہ خیبرپختونخوا میں یکساں تعلیمی نظام لائیں گے، ہم اپنی سوچ کے مطابق ایسے قوانین لائیں گے جس سے عوام کا بھلا ہو جب کہ امن کی بحالی کے لیے قوانین بنانے جارہے ہیں، قوانین کے ذریعے کوشش کریں گے کہ کوئی معصوم شہری دہشت گردی میں نشانہ نہ بنے، ضمنی نقصان سے دہشت گردی بڑھتی ہے۔

انہوں نے وکلا برادری سے بھی اس میں حصہ لینے کی درخواست کرتے ہوئے کہا کہ بندوق کے ذریعے آئین کے آرٹیکلز کو روندا جاتا ہے اس پر عمل کرکے دکھائیں گے۔

پشاور میں گورنر خیبرپختونخوا فیصل کریم کنڈی کے ہمراہ پریس کانفرنس کرتے ہوئے گورنر پنجاب سردار سلیم حیدر نے کہا کہ 18 ماہ (ن) لیگ کے ساتھ حکومت پیپلز پارٹی کے لیے بھیانک خواب تھا، مجبوری میں بیٹھنا پڑا، پارٹی کو بھی نقصان ہوا، لیکن ہم نے ملک کا نقصان نہیں ہونے دیا۔

انہوں نے کہا کہ مسلم لیگ (ن) کی حکومت نے تحریری معاہدے کے کئی نکات پر وعدہ خلافی کی، وزیر اعظم نے بلاول بھٹو سے ملاقات میں کئی وعدوں پر عمل نہ کرنے کا اعتراف کیا، پیپلزپارٹی نے ایک مہینے کی مہلت دی، امید ہے معاملات بہتر ہوں گے، اب بھی بہت مشکلات ہیں، بہت کچھ کرنا باقی ہے، سسٹم ڈی ریل ہوجائے تو دوسرا کوئی آپشن نہیں ہے۔

ان کا کہنا تھا کہ پنجاب کو بڑے بھائی کا کردار ادا کرنا چاہیے، وزیراعلیٰ مریم نواز سے بات کروں گا کہ پنجاب آٹے کی ترسیل پرپابندی نہ لگائے۔

گورنر پنجاب نے کہا کہ سہیل آفریدی بانی عمران خانسے مل لیں گے تو کوئی آسمان نہیں گر جائےگا، خیبرپختونخوا حکومت کو ڈنڈے سے نہیں سیاسی طریقے سے اپنے حقوق لینے ہوں گے، لڑائی جھگڑوں سے صوبے کے عوام کا نقصان ہوگا، سیاسی اختلاف اپنی جگہ مگر عوام کے حقوق کے لیے آئینی اور قانونی راستہ اپنانا وقت کی ضرورت ہے۔

گورنر ہاؤس کبھی خیبرپختونخوا کی ترقی میں رکاوٹ نہیں بنے گا، فیصل کنڈی

اس موقع پر گورنر خیبرپختونخوا فیصل کریم کنڈی نے کہا کہ گورنر ہاؤس کبھی خیبرپختونخوا کی ترقی میں رکاوٹ نہیں بنے گا، ہم اپنے صوبے میں امن چاہتے ہیں، ہم دلیل کے ساتھ حقوقِ لینے کی بات کرتے ہیں بدمعاشی سے حقوق لینے کے حق میں نہ تھے نہ ہیں، نہ ہی اس سے حقوق لیے جاسکتے ہیں۔

فیصل کریم کنڈی نے کہا کہ فورم موجود ہے اس پر اپنا مقدمہ لڑیں، پاکستان پیپلز پارٹی متعلقہ فورم پر خیبرپختونخوا سمیت صوبوں کی حقوق کی بات کرے گی، صوبائی حکومت کے لیے میرے دروازے کھلے ہیں، سیاست اپنی جگہ مگر صوبے کی حقوق اور مسائل کے لیے مل کر کام کرنا چاہیے اور یہی عوام کے مفاد میں ہے، صوبائی حکومت کے ساتھ مل کر صوبے کے حقوق کے لیے اپنا کردار ادا کرنے کو تیار ہوں۔

واضح رہے کہ گزشتہ روز سہیل آفریدی کو جیل کے دورے کے دوران عمران خان سے ملاقات کی اجازت نہیں دی گئی تھی، بانی پی ٹی آئی اگست 2023 سے قید ہیں اور اڈیالہ جیل میں 190 ملین پاؤنڈ کرپشن کیس میں سزا کاٹ رہے ہیں اور ان پر 9 مئی کے احتجاج سے متعلق انسداد دہشت گردی ایکٹ کے تحت مقدمات بھی زیر سماعت ہیں۔

سہیل آفریدی نے کہا تھا کہ وہ کل تقریباً دو گھنٹے جیل کے باہر انتظار کرتے رہے، پھر واپس لوٹ گئے، صحافیوں سے گفتگو کرتے ہوئے انہوں نے کہا کہ وہ اپنی کابینہ کا اعلان عمران خان سے مشاورت اور ان کی رائے لینے کے بعد کریں گے۔

وزیراعلیٰ خیبرپختونخوا کا کہنا تھا کہ انہوں نے اپنے اڈیالہ کے دورے کے منصوبے سے پنجاب حکومت اور وفاقی حکومت کو باضابطہ طور پر آگاہ کیا تھا لیکن کوئی جواب نہیں ملا، اور جب انہوں نے وزیراعظم شہباز شریف کو فون کر کے ملاقات میں سہولت دینے کی درخواست کی تو انہوں نے بھی جواب نہیں دیا۔

سہیل آفریدی کی جانب سے دائر رِٹ پٹیشن کے مطابق بطور وزیرِ اعلیٰ وہ آئینی طور پر صوبے کے نظم و نسق کے ذمہ دار ہیں اور ان پر صوبائی حکومت اور کابینہ کی تشکیل سے متعلق ’انتہائی اہم اور حساس معاملات‘ پر عمران خان سے ’رہنمائی اور ہدایات‘ حاصل کرنے کی ’قانونی اور اخلاقی ذمہ داری‘ ہے۔

یہ درخواست وفاقی سیکریٹری وزارتِ داخلہ، سیکریٹری محکمہ داخلہ پنجاب، انسپکٹر جنرل پنجاب جیل خانہ جات اور سنٹرل جیل اڈیالہ، راولپنڈی کے سپرنٹنڈنٹ کے خلاف دائر کی گئی۔

وکیل سید علی بخاری کے ذریعے دائر اس درخواست میں کہا گیا ہے کہ سہیل آفریدی نے 15 اکتوبر 2025 کو وزارت داخلہ اور محکمہ داخلہ پنجاب سے عمران خان سے ملاقات کے لیے سرکاری خط کے ذریعے رجوع کیا تھا، جو دونوں دفاتر کو ’ باقاعدہ طور پر موصول‘ ہو گیا تھا۔

اسلام آباد ہائی کورٹ سے رجوع کرنے کے علاوہ وزیر اعلیٰ خیبرپختونخوا سہیل آفریدی نے چیف جسٹس آف پاکستان یحییٰ آفریدی کو بھی خط لکھا، جس میں عمران خان سے ملاقات کے انتظامات کرنے کی درخواست کی۔

ڈان نیوز کو موصول خط کے مطابق عوامی مفاد میں یہ ضروری ہے کہ خیبر پختونخوا کے وزیرِ اعلیٰ کی اڈیالہ جیل، راولپنڈی میں متعلقہ حکام کی نگرانی میں وقتاً فوقتاً ملاقات کی اجازت دی جائے۔‘

خط میں مزید کہا گیا ہے کہ سہیل آفریدی پی ٹی آئی کے ٹکٹ پر 4 کروڑ 50 لاکھ آبادی کے حامل خیبر پختونخوا کے وزیر اعلیٰ منتخب ہوئے، جس کے نظم و نسق، عوام کے بنیادی حقوق کے تحفظ، امن و امان، صوبائی کابینہ کی تشکیل، صوبے کو درپیش سنگین معاشی چیلنجز اور اہم پالیسی امور سے متعلق ذمہ داریاں ان پر عائد ہوتی ہیں۔

خط میں کہا گیا ہے کہ ’ان معاملات سمیت دیگر اہم امور پر عمران خان سے رہنمائی حاصل کرنے کی شدید ضرورت ہے، جن میں وفاق اور دیگر صوبوں کے ساتھ تعلقات کے حوالے سے بعض اہم معاملات بھی شامل ہیں۔‘

ٰخط میں مزید کہا گیا کہ ’رہنمائی حاصل کرنا انتہائی ضروری ہے، یہاں تک کہ فی الحال صوبہ پنجاب نے بین الصوبائی تجارت، یعنی گندم وغیرہ کو روک رکھا ہے۔ ’

الگ سے ایک پوسٹ ایکس پر کی گئی، سہیل آفریدی نے وفاقی حکومت کے ساتھ آج ہونے والے زراعت اور افغان مہاجرین سے متعلق اجلاس میں شرکت نہ کرنے پر معذرت کی، یہ کہتے ہوئے کہ وہ عمران خان سے مشورے کے بغیر ایسا نہیں کر سکتے۔

انہوں نے کہا کہ ’جب تک میں عمران خان سے ملاقات کر کے پالیسی گائیڈ لائنز نہیں لیتا، ایسے اجلاس میں شرکت کرنا صوبے کے عوام کے مینڈیٹ کی توہین ہوگی۔‘

انہوں نے مزید کہا کہ ’مجھے امید ہے کہ وفاقی حکومت اس مسئلے کو جلد حل کرے گی اور متعلقہ حکام کو ہدایات جاری کرے گی تاکہ میرے رہنما اور خیبرپختونخوا کے عوام کے مینڈیٹ کے نمائندے سے باقاعدہ ملاقاتوں کے انتظامات کیے جا سکیں۔‘

انتخاب سے قبل تنازع

واضح رہے کہ 13 اکتوبر کو سہیل آفریدی خیبر پختونخوا اسمبلی کے اجلاس میں صوبے کے نئے وزیرِ اعلیٰ منتخب ہوئے تھے، یہ اجلاس اپوزیشن کے واک آؤٹ اور سبکدوش ہونے والے وزیرِ اعلیٰ علی امین گنڈا پور کے استعفے سے متعلق غیر یقینی صورتحال کے دوران ہوا تھا۔

پشاور ہائی کورٹ کے چیف جسٹس ایس ایم عتیق شاہ نے سہیل آفریدی کے انتخاب کو آئینی قرار دیتے ہوئے 14 اکتوبر تک گورنر خیبرپختونخوا فیصل کریم کنڈی کو ہدایت کی تھی کہ وہ اگلے دن شام 4 بجے تک حلف برداری کی تقریب کرائیں، بصورتِ دیگر آئین کے آرٹیکل 255(2) کے تحت صوبائی اسمبلی کے اسپیکر کو اسی دن حلف لینے کا اختیار ہوگا۔

ڈان نیوز کے مطابق پشاور ہائیکورٹ میں سہیل آفریدی کی حفاظتی ضمانت کے لئے دائر درخواست پر سماعت ہوئی، جسٹس اعجاز انور اور جسٹس نعیم انور پر مشتمل دو رکنی بنچ نے کیس کی کی۔

دوران سماعت جسٹس اعجاز انور ایڈوکیٹ جنرل سے استفسار کیا کہ درخواست گزار کے خلاف ایف آئی درج ہے، جس پر ایڈوکیٹ جنرل نے بتایا کہ ہمیں تو پتا نہیں ہے کہ کتنے ایف آئی آرز ہے، ہوسکتا میرے خلاف بھی ایف آئی آر ہوں۔

پشاور ہائی کورٹ نے وزیر اعلیٰ خیبر پختونخوا سہیل آفریدی کو 18 نومبر تک حفاظتی ضمانت دے دی، عدالت نے سہیل آفریدی کو گرفتار نہ کرنے کا حکم دیا۔

خیال رہے کہ وزیراعلیٰ خیبرپختونخوا سہیل آفریدی پاکستان تحریک انصاف (پی ٹی آئی) کے بانی چیئرمین عمران خان سے ملاقات کے لیے راولپنڈی جانا چاہتے تھے اس لیے انہوں نے پشاور ہائی کورٹ میں حفاظتی ضمانت کی درخواست دائر کی۔

دوسری جانب، عدالت سے حفاظتی ضمانت ملنے کے بعد سہیل آفریدی پشاور ہائی کورٹ سے عمران خان سے ملاقات کے لیے اڈیالہ جیل روانہ ہوگئے ہیں۔

اس موقع پر میڈیا سے گفتگو کے دوران ان کا کہنا تھا کہ عمران خان سے ملاقات کروں گا، ملاقات میں رکاوٹ پیداکرنے والوں کو احساس ہونا چاہیے کہ صوبے کا وزیراعلیٰ ہوں۔

سہیل آفریدی کا مزید کہنا تھا کہ عمران خان کے جیل جانے کے بعد ایک ملاقات بھی نہیں ہوئی،کابینہ کے حوالے سے کچھ بھی فائنل نہیں ہوا، ان سے ملاقات میں مشاورت ہوگی ، عمران خان کی منظوری کے خلاف کوئی بھی کام نہیں ہوگا۔

پی ٹی آئی رہنما سلمان اکرم راجا نے پشاور میں ڈان نیوز سے خصوصی گفتگو کرتے ہوئےکہا کہ سربراہ پاکستان تحریک انصاف عمران خان کا حق ہے کہ اُن سے اُن کے رفقا کی ہر جمعرات کو ملاقات ہو، اس حوالے سے عدالتی احکامات بھی موجود ہیں۔

انہوں نے دعویٰ کیا کہ اکتوبر 2024 سے عمران خان سے ملاقات کرنے کی اجازت نہیں دی جا رہی، ہم اس حوالے سے دوبارہ عدالت سے رجوع کریں گے تاکہ یہ سلسلہ دوبارہ شروع ہو سکے۔

سلمان اکرم راجا کا کہنا تھا کہ وزیر اعلیٰ خیبرپختونخوا سہیل آفریدی کے لیے خصوصی طور پر ہم عدالت میں درخواست دیں گے تاکہ کہ اُن کی بطور وزیر اعلیٰ عمران خان سے ملاقات کروائی جا سکے۔

سیکریٹری جنرل تحریک انصاف نے ایک سوال کے جواب میں کہا کہ اگر اسلام آباد ہائیکورٹ میں شنوائی نہ ہوئی تو ہم اس معاملے کو سپریم کورٹ تک لے کر جائیں گے، عمران خان ہمارے پارٹی لیڈر ہیں اور ان سے ملاقات کرنا ہر کسی کا حق ہے،کسی صورت میں بھی ہمیں اُن سے ملنے سے روکا نہیں جاسکتا ہے۔

پشاور ہائی کورٹ کے جسٹس ارشد علی اور جسٹس وقار احمد پر مشتمل 2 رکنی بینچ نے جمعیت علمائے اسلام (ف) کے رہنما مولانا لطف الرحمٰن کی درخواست پر محفوظ فیصلہ سنادیا۔

قبل ازیں درخواست کی سماعت میں پی ٹی آئی کے وکیل سلمان اکرم راجا اور مولانا لطف الرحمٰن کے وکیل برسٹر یٰسین نے دلائل دیے تھے جس کے بعد عدالت نے فیصلہ محفوظ کیا تھا۔

جے یو آئی (ف) کے رہنما مولانا لطف الرحمٰن کی جانب سے گزشتہ روز دائر کی گئی درخواست میں سہیل آفریدی کے انتخاب کو کالعدم قرار دینے کی استدعا کی گئی تھی۔

یاد رہے کہ گزشتہ روز پشاور ہائی کورٹ نے پاکستان تحریک انصاف (پی ٹی آئی) کی نومنتخب وزیراعلیٰ سہیل آفریدی کی حلف برداری کے لیے دائر درخواست پر محفوظ کیا گیا فیصلہ سنادیا تھا۔

عدالت نے گورنر خیبرپختونخوا کو آج شام 4 بجے تک نومنتخب وزیراعلیٰ سہیل آفریدی سے حلف لینے کا حکم دیا ہے، عدالت نے قرار دیا ہے کہ اگر گورنر نے حلف نہیں لیا تو پھر اسپیکر کو ہدایت ہے کہ حلف لے۔

آج کی سماعت دو رکنی بینچ نے کی جس میں جسٹس ارشد علی اور جسٹس وقار احمد شامل تھے، مولانا لطف الرحمٰن کی جانب سے بیرسٹر یٰسین اور پی ٹی آئی کی جانب سے سلمان اکرم راجا پیش ہوئے۔

سلمان اکرم راجا نے عدالت میں مؤقف اختیار کیا کہ جس درخواست پر سماعت ہو رہی ہے، وہ عدالت کے گزشتہ روز کے حکم کے بعد غیر مؤثر ہو چکی ہے جس پر جسٹس ارشد علی نے جواب دیا کہ ہم حکم سے واقف ہیں، لیکن ہم درخواست گزار کا مؤقف سن لیتے ہیں۔

بیرسٹر یٰسین نے کہا کہ جب سابق وزیرِ اعلیٰ کا استعفیٰ ابھی منظور ہی نہیں ہوا تھا اور وہ اپنی نشست پر موجود تھے، تو نیا وزیرِ اعلیٰ کیسے منتخب ہو گیا؟

درخواست گزار کے وکیل نے کہا کہ یہ انتخاب غیر آئینی تھا اور نہیں ہونا چاہیے تھا، جب ایک وزیرِ اعلیٰ پہلے سے موجود ہو، تو نیا وزیرِ اعلیٰ منتخب کرنا آئینی بحران پیدا کر سکتا ہے اور اگر استعفیٰ منظور ہو چکا ہوتا تو الیکشن کا جواز بنتا اور تمام جماعتیں اس میں حصہ لیتیں۔

مزید کہا کہ کابینہ ابھی تحلیل نہیں ہوئی، وہ بدستور موجود ہے جس پر جسٹس علی نے استفسار کیا کہ جب وزیرِ اعلیٰ اپنی پوزیشن پر نہیں رہا تو کابینہ کی بات کیسے ہو رہی ہے؟

جسٹس علی نے درخواست گزار کے وکیل کو دو آپشن دیے ’یا تو آپ درخواست واپس لے لیں یا پھر کیس کو میرٹ پر سنیں۔‘

بیرسٹر یٰسین نے کہا کہ میرٹ پر فیصلہ کیا جائے، بعد ازاں، عدالت نے فیصلہ محفوظ کر لیا تھا۔

دوسری جانب، کراچی میں ایک تقریب کے دوران چیئرمین پیپلزپارٹی بلاول بھٹو زرداری نے گورنر خیبرپختونخوا فیصل کریم کنڈی کو فوری طور پر پشاور پہنچ کر عدالتی حکم پر عملدرآمد کرنے کی ہدایت کی تھی۔

کراچی میں نجی تقریب سے خطاب کے دوران بلاول بھٹو زرداری کا کہنا تھا کہ میں وزیر اعلیٰ سندھ مراد علی شاہ کو کہوں گا کہ وہ اپنا جہاز گورنر کو دے دیں تاکہ کہ وہ خیبرپختونخوا پہنچ کر عدالت کا جو بھی حکم ہو اس پر عملدر در آمد کرتے ہوئے اپنی آئینی اور قانونی ذمہ داری پوری کریں۔

بعد ازاں، فیصل کریم کنڈی پارٹی چیئرمین کےحکم کے مطابق کل ہی پشاور پہنچ گئے تھے اور آج عدالتی حکم کے مطابق نومنتخب وزیراعلیٰ سے حلف لیں گے۔

گورنر فیصل کریم کنڈی نے کراچی میں میڈیا سے بات کرتے ہوئے کہا تھا کہ وہ آئین کے مطابق عمل کریں گے اور میں نے کبھی نہیں کہا کہ میں حلف نہیں لوں گا۔

خیبرپختونخوا میں حزب اختلاف کے ارکان نے وزیراعلیٰ کے انتخاب کے خلاف درخواست پر گورنر فیصل کریم سے مشاورت کی، اس دوران فیصل کریم کنڈی نے پٹیشن واپس لینے کا مشورہ دیا۔

یاد رہے کہ گزشتہ ہفتے علی امین گنڈاپور نے وزارت اعلیٰ سے استعفیٰ دیتے ہوئے اپنا استعفیٰ گورنر خیبرپختونخوا کو بھجوایا تھا، تاہم گورنر کی جانب سے استعفیٰ موصول ہونے کی تردید کی گئی تھی، بعد ازاں ہاتھ سے لکھا ہوا علی امین گنڈاپور کا دوسرا استعفیٰ گورنر کو بھیجا گیا تھا۔

گورنر نے کہا تھا کہ انہیں بعد میں ہاتھ سے لکھا گیا استعفیٰ پہلے ملا، پہلے والا استعفیٰ تاخیر سے بعد میں موصول ہوا، تاہم انہوں نے دونوں استعفوں پر دستخطوں کا فرق ہونے کی وجہ سے علی امین گنڈاپور کو ملاقات کے لیے بلایا تھا، تاکہ استعفے کی تصدیق کی جاسکے۔

صوبے کی حکمران جماعت پاکستان تحریک انصاف (پی ٹی آئی) کی جانب سے کہا گیا تھا کہ علی امین گنداپور استعفیٰ دے چکے ہیں، لہٰذا نئے وزیراعلیٰ کے انتخاب کا شیڈول جاری کرتے ہوئے صوبائی اسمبلی نے سہیل آفریدی کو وزیراعلیٰ منتخب کرلیا تھا، تاہم اپوزیشن نے انتخاب کو غیر قانونی قرار دیتے ہوئے وزیراعلیٰ کے انتخاب کو پشاور ہائی کورٹ میں چیلنج کر دیا تھا۔

واضح رہے کہ علی امین گنڈاپور نے پارٹی قیادت کی ہدایت پر عہدے سے استعفیٰ دیا تھا، جس کے بعد سہیل آفریدی نئے وزیراعلیٰ بن چکے ہیں، وہ پی ٹی آئی کی عدالت میں دائر کردہ ایک درخواست پر عدالتی حکم کے بعد آج وزارت اعلیٰ کا حلف اٹھائیں گے۔

منگل کے روز پشاور ہائی کورٹ کے چیف جسٹس ایس۔ ایم عتیق شاہ نے سہیل خان آفریدی کے بطور وزیرِاعلیٰ انتخاب کو آئینی قرار دیتے ہوئے خیبر پختونخوا کے گورنر فیصل کریم کنڈی کو حکم دیا تھا کہ وہ بدھ کی شام 4 بجے تک ان سے حلف لیں، ورنہ صوبائی اسمبلی کے اسپیکر اسی روز آئین کے آرٹیکل 255 (2) کے تحت حلف برداری کی تقریب انجام دیں گے۔

پاکستان پیپلز پارٹی (پی پی پی) کے چیئرمین بلاول بھٹو زرداری نے بھی منگل کے روز گورنر خیبرپختونخوا فیصل کریم کنڈی پر زور دیا تھا کہ وہ ہائی کورٹ کے حکم کے مطابق اپنا ’آئینی اور قانونی فریضہ‘ ادا کریں اور صوبے میں واپس جا کر منتخب وزیرِ اعلیٰ سہیل آفریدی سے حلف لیں۔

کراچی میں ایک تقریب سے خطاب میں بلاول بھٹو نے کہا تھا کہ ’آپ کو خیبر پختونخوا جانا چاہیے‘، میں سندھ کے وزیرِاعلیٰ سے کہوں گا کہ وہ آپ کو اپنا طیارہ دے دیں تاکہ آپ خیبر پختونخوا پہنچ کر عدالت کے حکم کے مطابق اپنا آئینی اور قانونی فریضہ ادا کر سکیں۔

ڈان نیوز کے مطابق گورنر خیبرپختونخوا فیصل کریم کنڈی نے اس حوالے سے کہا کہ علی امین کے پہلے استعفے میں بہت سے شکوک و شبہات تھے، اُن کا پہلا استعفیٰ تاخیر، دوسرا پہلے پہنچا۔

انہوں نے مزید کہا کہ سہیل آفریدی کو 90 ووٹ ملے، صوبائی اراکین اسمبلی ان کے ساتھ ہیں، نئے وزیراعلیٰ خیبرپختونخوا سے حلف لوں گا۔

قبل ازیں، چیئرمین پیپلزپارٹی بلاول بھٹو زرداری نے گورنر خیبرپختونخوا فیصل کریم کنڈی کو فوری طور پر پشاور پہنچ کر عدالتی حکم پر عملدرآمد کرنے کی ہدایت کی تھی۔

کراچی میں نجی تقریب سے خطاب کے دوران بلاول بھٹو زرداری نے اپنے سامنے بیٹھے فیصل کریم کنڈی کو مخاطب کرتے ہوئےکہا کہ گورنر صاحب، آپ کو خیبرپختونخوا پہنچنا چاہیے۔

انہوں نے کہا کہ میں وزیر اعلیٰ سندھ مراد علی شاہ کو کہوں گا کہ وہ اپنا جہاز گورنر کو دے دیں تاکہ کہ وہ خیبرپختونخوا پہنچ کر عدالت کا جو بھی حکم ہو اس پر عملدر در آمد کرتے ہوئے اپنی آئینی اور قانونی ذمہ داری پوری کریں۔

بعد ازاں، فیصل کریم کنڈی نے پارٹی چیئرمین کےحکم کے مطابق پشاور کے لیے فوری اڑان کی تیاری کرلی۔

میڈیا سے گفتگو کے دوران گورنر خیبرپختونخوا نے واضح کیا کہ انہوں نے کبھی حلف لینے سے انکار نہیں کیا، آئین کے تقاضے پورے کے جائیں گے اور میں نے ہمیشہ کہا ہے کہ قانون اور آئین پر عملدرآمد کریں گے۔

فیصل کریم کنڈی کا کہنا تھا کہ میرا جواب ہائیکورٹ میں جمع ہوچکا ہے، میں آج رات ہر صورت میں پشاور پہنچ جاؤں گا اور میرا جو آئینی فرض ہے، وہ ادا کروں گا۔

انہوں نے کہا کہ گورنر کے پاس طیارہ نہیں ہوتا، وزیر اعلی سندھ سے درخواست کی ہے، وہ اپنا طیارہ فراہم کریں گے۔

صحافی کی جانب سے پوچھے گئے سوال کے جواب میں ان کا کہنا تھا کہ بلاول بھٹو سے کان میں ہونے والی باتیں آپ کو نہیں بتا سکتا۔

واضح رہے کہ خیبرپختونخوا کے وزیراعلیٰ علی امین گنڈاپور نے پارٹی کے قائد عمران خان کی ہدایت پر گزشتہ ہفتے اپنے عہدے سے استعفیٰ دے دیا تھا، تاہم گورنر خیبرپختونخوا فیصل کریم کنڈی نے تاحال استعفیٰ منظور نہیں کیا ہے۔

تاہم خیبرپختونخوا اسمبلی نے گزشتہ روز سہیل آفریدی کو وزیراعلیٰ منتخب کرلیا تھا تاہم اپوزیشن نے وزیراعلیٰ کے انتخاب کو غیرقانونی قرار دیتے ہوئے کارروائی کا بائیکاٹ کردیا تھااور وزیراعلیٰ کے انتخاب کو عدالت میں چیلنج کرنے کا اعلان کیا تھا۔

دوسری جانب، پشاور ہائیکورٹ نے پاکستان تحریک انصاف ( پی ٹی آئی) کی نومنتخب وزیراعلیٰ سہیل آفریدی کی حلف برداری کے لیے دائر درخواست پر محفوظ کیا گیا فیصلہ سنادیا۔

گورنر خیبرپختونخوا کو کل (15 اکتوبر) شام 4 بجے تک نومنتخب وزیراعلیٰ سہیل آفریدی سے حلف لینے کا حکم دے دیا، عدالت نے قرار دیا ہے کہ اگر گورنر نے حلف نہیں لیا تو پھر اسپیکر کو ہدایت ہے کہ حلف لے۔

ڈان نیوز کے مطابق ذرائع نے بتایا کہ خیبرپختونخوا میں بیشتر پرانے وزرا، مشیران اور معاونین خصوصی شامل ہوں گے، ساتھ ہی کئی اہم اور نئے چہروں کو بھی ذمہ داریاں سونپے جانے کا امکان ہے۔

ذرائع کا کہنا ہے کہ پی ٹی آئی میں علی امین کے مخالف گروپ کے ارکان بھی وزراتیں حاصل کرنے کے لیے سرگرم ہیں۔

ذرائع نے مزید بتایا کہ نو منتخب وزیر اعلیٰ سہیل آفریدی کو کابینہ میں ردوبدل کا اختیار بھی ملا جب کہ سربراہ پی ٹی آئی عمران خان نے مزمل اسلم کو کابینہ میں مشیر خزانہ رکھنے کے علاوہ باقی تمام اختیارات سہیل آفریدی کو دے دیے ہیں۔

ذرائع کے مطابق علی امین گنڈاپور نے شہرام ترکئی اور اسد قیصر کے بھائیوں کو کابینہ سے فارغ کیا تھا، سہیل آفریدی کے منتخب ہوتے ہی شہرام ترکئی اور عاطف خان نے بھی وزیراعلیٰ ہاؤس میں ڈیرے ڈال دیے ہیں۔

جب اسمبلی ہال میں ’ سہیل آفریدی زندہ باد’ کے نعرے گونج رہے تھے، اپوزیشن نے واک آؤٹ کیا اور پورے عمل کو ’ غیر آئینی’ قرار دیا۔ تاہم، اسپیکر بابر سلیم سواتی نے کارروائی جاری رکھی اور آرٹیکل 130 کے تحت آفریدی کے انتخاب کو قانونی قرار دیا، حالانکہ گورنر فیصل کریم کنڈی نے گنڈا پور کا استعفیٰ ’ دستخطوں میں فرق ’ کے باعث واپس کر دیا تھا۔

اس واقعے نے ایک نئی بحث چھیڑ دی ہے۔کیا نیا وزیراعلیٰ اس وقت منتخب کیا جا سکتا ہے جب پچھلا وزیراعلیٰ ابھی تک اپنے عہدے پر موجود ہو؟ قانونی ماہرین نے اس معاملے پر مختلف زاویوں سے روشنی ڈالی ہے۔

اکثریت کی مرضی کو روکنے کی کوشش

وکیل عبدالمعز جعفری نے کہا’ اپوزیشن کا واک آؤٹ کوئی معنی نہیں رکھتا، بالکل اسی طرح جیسے گورنر کا دستخطوں کی چھان بین میں شرلاک ہومز بننا غیر متعلق ہے۔ وزیراعلیٰ نے استعفیٰ دے دیا یہ استعفیٰ فوراً مؤثر ہو جاتا ہے۔ اسمبلی نے نیا رہنما منتخب کر لیا ہے۔’

ان کے مطابق، معاملہ سیدھا ہے، خیبر پختونخوا کا صرف ایک ہی وزیراعلیٰ ہے، ’ وہ جسے آج صوبائی اسمبلی کے اکثریتی اراکین نے منتخب کیا۔’

ان کا کہنا تھا کہ ’ اس عمل کو روکنے کی کوئی بھی کوشش چند افراد کی جانب سے اکثریت کی مرضی کو دبانے کی مایوس کن کوشش ہے۔’

عبدالمعز جعفری نے مزید کہا کہ سیاسی قوتیں اکثر ایسے اقدامات کو ماضی کی مثالوں سے جائز ٹھہرانے کی کوشش کرتی ہیں، لیکن وہ بھی آئینی جانچ پر پوری نہیں اترتیں۔

انہوں نے کہا کہ’ ہمیں یہ جواز دیا جاتا ہے کہ یہ پہلے بھی ہو چکا ہے، کوئی یہ تسلیم کرنے سے انکار نہیں کرتا کہ یہ پہلے بھی غلط تھا اور اب بھی غلط ہے، اور اس کا نقصان ہمیشہ آئینی نظام کو ہوتا ہے۔’

ایک آئینی ابہام

وکیل مرزا معز بیگ نے اس صورتحال کو ’ آئینی ابہام’ قرار دیا، اور گورنر کی تاخیر اور اسپیکر کی جلد بازی دونوں پر سوال اٹھایا۔

مرزا معز بیگ نے کہا کہ’ جبکہ گورنر کا وزیراعلیٰ کا استعفیٰ قبول کرنے سے انکار ناقابلِ فہم ہے، خاص طور پر جب وہ خود اس استعفیٰ کی تصدیق کر چکے ہیں، اسپیکر کا گنڈا پور کے استعفیٰ کی باضابطہ منظوری سے پہلے نیا وزیراعلیٰ منتخب کرانا آئینی ابہام ہے۔’

مرزا معز بیگ نے کہا کہ آئین کچھ معاملات میں واضح مدت فراہم کرتا ہے، مثلاً اگر وزیراعلیٰ اسمبلی تحلیل کرے تو فیصلہ 48 گھنٹوں میں مؤثر ہو جاتا ہے، چاہے گورنر کوئی کارروائی نہ کرے۔ انہوں نے کہا کہ’ دلچسپ بات یہ ہے کہ استعفیٰ کی صورت میں آئین میں ایسی کوئی مدت نہیں دی گئی۔’

ان کے مطابق، اسپیکر نے حد پار کی ہے۔’ اگر اسمبلی گنڈا پور کو عدم اعتماد کے ووٹ سے ہٹا دیتی، یا عدالت گورنر کی تاخیر کے خلاف مداخلت کرتی، تو یہ بات الگ تھی، لیکن اسپیکر کا اقدام ناقابلِ دفاع ہے۔’

تاریخ تاخیر کو برداشت نہیں کرتی

وکیل احمد مودود اوصاف نے کہا کہ’ اگرچہ ایک وقت میں دو وزرائے اعلیٰ نہیں ہو سکتے، مگر بنیادی اصول یہ ہے کہ رسمی رکاوٹیں اسمبلی کی مرضی کو شکست نہیں دے سکتیں۔’

انہوں نے مزید کہا ’اگر گورنر اس عمل کو غیر ضروری طور پر طول دے، جیسا کہ یہاں ہوا ہے، تو ایک خط، دوسرا خط، ایک تقریر، اور ایک ٹویٹ کافی ہونی چاہیے تھی۔ عدالت اسے غیر آئینی قرار دے گی، کیونکہ پہلے بھی پنجاب اور پشاور کی عدالتوں نے ایسے مصنوعی اور غیر آئینی طریقوں کو روکنے کے لیے مداخلت کی ہے۔’

احمد مودود اوصاف نے کہا کہ اپوزیشن کا محض واک آؤٹ اس عمل کو کالعدم نہیں کر سکتا، اگر کورم پورا ہو اور اسمبلی کی اکثریت واضح ہو۔

انہوں نے کہا کہ ’ تاریخ رسمی تاخیر کو برداشت نہیں کرتی، یہ صرف ان لوگوں کو یاد رکھتی ہے جو اس وقت ڈٹے رہے، جب دوسرے لوگوں نے ’ طریقہ کار’ کی آڑ لے لی۔’

آئینی تشریح کا تنازع

وکیل ایمن ظفر کا کہنا ہے کہ اگرچہ آئین ایک ہی وزیراعلیٰ کو صوبے کا سربراہ قرار دیتا ہے، مگر’ حقیقی تنازع تشریح کا ہے۔’

انہوں نے کہا: ’ اہم سوال یہ ہے کہ کیا سبکدوش ہونے والے وزیراعلیٰ کو آئینی طور پر ہٹایا گیا ہے یا نہیں؟ اگر نہیں، تو نئے وزیراعلیٰ کا انتخاب متنازعہ ہو سکتا ہے۔’

انہوں نے وضاحت کی کہ آئین گورنر کی جانب سے وزیراعلیٰ کے استعفیٰ کی باضابطہ منظوری کو ضروری نہیں بناتا، تاہم آرٹیکل 133 گورنر کو یہ اجازت دیتا ہے کہ وہ سبکدوش ہونے والے وزیراعلیٰ سے کہے کہ وہ نیا منتخب ہونے تک کام جاری رکھے۔

ایمن ظفر نے خبردار کیا کہ گورنر کی خاموشی عملاً آرٹیکل 133 کو فعال کر سکتی ہے، جس سے سبکدوش ہونے والا وزیراعلیٰ نئے وزیراعلیٰ کے منتخب ہونے تک عہدے پر برقرار رہ سکتا ہے۔

انہوں نے کہا کہ ’ اگر موجودہ وزیراعلیٰ کی حیثیت کو طے کیے بغیر نیا انتخاب کرایا جائے تو یہ آئینی تداخل پیدا کر سکتا ہے۔ چاہے کوارم پورا بھی ہو، عمل کی شفافیت مشکوک بن سکتی ہے اور عدالت مداخلت کر سکتی ہے۔’

جمہوری و آئینی عمل مکمل

وکیل زینب شاہد کے مطابق’ آئین میں ایسی کوئی شق نہیں ہے جس کے تحت خیبر پختونخوا کے گورنر کی منظوری وزیراعلیٰ کے استعفیٰ کے مؤثر ہونے کے لیے لازمی ہو۔’

انہوں نے کہا کہ ’ آرٹیکل 130(8) کے مطابق صرف یہ لازم ہے کہ وزیراعلیٰ اپنا استعفیٰ ‘گورنر کو تحریری طور پر’ بھیجے۔ سابق وزیراعلیٰ نے یہ دو بار کیا ہے۔’

زینب شاہد نے گورنر کے بار بار ان استعفوں کو رد کرنے کو ’ غیر قانونی کوششیں’ قرار دیا جن کا مقصد ’ نئے وزیراعلیٰ کے تقرر کو مؤخر کرنا اور ایک جمہوری ووٹ کو روکنا’ تھا۔

انہوں نے کہا ’ جب سابق وزیراعلیٰ نے متعدد بار استعفیٰ دیا اور عوامی طور پر اپنے استعفیٰ کا اعلان بھی کیا، تو خیبر پختونخوا اسمبلی کے پاس نیا وزیراعلیٰ منتخب کرنے سے روکنے کی کوئی وجہ نہیں بچتی۔’

90 میں سے 145 ووٹ حاصل کرنے کے بعد، ان کے مطابق سہیل آفریدی کا انتخاب جمہوری اور آئینی عمل کی تکمیل ہے۔

انہوں نے کہا کہ ’ تمام ریاستی اداروں کو عوام کے اس فیصلے کو تسلیم کرنا چاہیے، نہ کہ آئین کا مذاق اڑاتے رہیں۔’

اسمبلی کا اقدام عہدہ پُر کرنے کیلئے ہے، تقسیم کیلئے نہیں

وکیل باسل نبی ملک نے آرٹیکلز 130 اور 133 کی روشنی میں ایک متوازن موقف پیش کیا۔

انہوں نے کہا ’ آرٹیکل 130 کے تحت وزیراعلیٰ گورنر کو استعفیٰ پیش کر سکتا ہے، اور آئین میں کہیں یہ نہیں لکھا کہ گورنر کو اسے قبول یا مسترد کرنے کا اختیار حاصل ہے۔’

انہوں نے مزید وضاحت کی کہ آرٹیکل 133 گورنر کو یہ اختیار دیتا ہے کہ وہ وزیراعلیٰ سے کہے کہ وہ نئے وزیراعلیٰ کے تقرر تک کام جاری رکھے۔

انہوں نے کہا کہ’ لہٰذا ایک معقول تشریح یہ ہو سکتی ہے کہ استعفیٰ جمع کرانے کے بعد وہ مؤثر ہو جاتا ہے، اور گورنر کا اسے قبول نہ کرنا یا نظر انداز کرنا صرف آرٹیکل 133 کے تحت عبوری طور پر کام جاری رکھنے کی درخواست کے مترادف ہے۔’

باسل ملک نے کہا’ اگر آرٹیکل 133 کو غیر پابند سمجھا جائے تو ایک قانونی و سیاسی خلا پیدا ہو سکتا ہے جو شاید قانون سازوں کا ارادہ نہیں تھا۔’

اسی لیے، ان کے مطابق، اسمبلی کا حالیہ اقدام ’ وزیراعلیٰ کے عہدے کو پُر کرنے کی کوشش ہے، نہ کہ دو متوازی وزرائے اعلیٰ بنانے کی۔’

ڈان نیوز کے مطابق پشاور میں انتہائی افسوسناک واقعہ پیش آیا ہے جہاں فضل حیدر نامی شخص نے پہلے اپنی بیوی کو فائرنگ کرکے قتل کیا اور پھر 2 بیٹیوں کو بھی فائرنگ کرکے قتل کردیا۔

ملزم فضل حیدر نے بیوی اور بیٹیوں کو قتل کرنے کے بعد خود کشی کرلی، ملزم نے خود کو گولی مارکر اپنی جان کا خاتمہ کیا۔

ابتدائی تفصیلات کے مطابق تھانہ چمکنی پولیس کو اطلاع ملی کہ علاقہ مسلم سٹی میں فضل حیدر ولد شیر غنی نے فائرنگ کرکے اپنی بیوی اور دو کمسن بیٹیوں میرحا اور منتہا کو قتل کرنے کے بعد خودکشی کرلی ہے۔

واقعہ کی اطلاع ملتے ہی پولیس فوری طور موقع پر پہنچ گئی، نعشوں کو پوسٹ مارٹم کے لیے ہسپتال منتقل کردیا گیا جب کہ جائے وقوع سے اہم شواہد اکٹھے کرکے تفتیش کا آغاز کردیا گیا ہے۔

پولیس نے بتایا ہے کہ افسوسناک واقعہ چمکنی کے علاقے میں پیش آیا ہے تاہم واقعے کی وجہ فوری طور پر سامنے نہیں آئی جب کہ فضل حیدر کی دونوں بیٹیاں منتہا اور میرحا جڑواں تھیں جن کی عمر 6 سال تھی۔

پولیس کے مطابق واقعہ کے حوالے سے متوفی کے بھائی شیر اکرم کی مدعیت میں رپورٹ درج کرلی ہے جب کہ واقعہ کے اصل حقائق جاننے کے لیے ہر پہلو سے جامع تفتیش جاری ہے۔

صوبے کا 30واں وزیراعلیٰ منتخب ہونے کے بعد اپنے پہلے خطاب میں انہوں نے کہا کہ میرے پاس کھونے کے لیے پیسہ ہے نہ کرسی، بانی پاکستان تحریک انصاف (پی ٹی آئی) عمران خان کو ان کی فیملی کے مشورے کے بغیر کہیں اور منتقل کیا تو پورا ملک جام کر دیں گے۔

سہیل آفریدی نے کہا کہ براہ مہربانی آپ افغانستان کی پالیسی پر نظر ثانی کریں، جو بھی پالیسی بنائیں، اس میں خیبرپختونخوا کی حکومت، یہاں کے عوام اور قبائلی لوگوں کو اعتماد میں لیں، ان شا اللہ مثبت جواب آئے گا۔

ان کا کہنا تھا کہ امپورٹڈ حکومت کو بتایا گیا تھا کہ ایک دفعہ آپ پھر خیبرپختونخوا میں دہشت گردی لا رہے ہیں، تو آپ یہ پختونوں کے سر کا سودا کر رہے ہیں، لوگوں نے جب مزاحمت شروع کی اور جلسے جلوس شروع کیے، تو کچھ لوگ بھاگ نکلے، کچھ وہاں رہے، جب ہم سوال کرتے ہیں کہ ایک بار پھر دہشت گردی آرہی ہے، تو آپ کہتے تھے کہ یہ جھوٹ بول رہے ہیں۔

نو منتخب وزیراعلیٰ نے کہا کہ جس طرح ہمارا لیڈر ملٹری آپریشن کے خلاف ہے، میں یقین دلاتا ہوں کہ ہمارے ہوتے ہوئے کوئی آپریشن نہیں کرسکتا، فوجی آپریشن مسئلے کا حل نہیں، دنیا ڈائیلاگ کی طرف جا رہی ہے، آپ نے کتنے آپریشن کرلیے، دہشت گردی پھر واپس آگئی، یعنی آپریشن کسی مسئلے کا حل نہیں، تمام فیصلے بند کمروں میں کیے گئے، ذات کے لیے فیصلے کیے گئے، یہ اس مسئلے کا حل نہیں۔

انہوں نے کہا کہ دہشت گردی کا حل یہ ہے کہ آپ کہتے ہیں کہ خیبرپختونخوا میں دہشت گردی ہے، اگر ایسا ہے تو یہاں کی صوبائی حکومت، منتخب نمائندوں، لوکل گورنمنٹ اور قبائلی عوام کو اعتماد میں لینا ہوگا، ان سے پوچھنا ہوگا کہ مسئلہ کیسے حل کیا جائے، ان کی رائے کے مطابق فیصلے کریں گے تو مسئلہ حل ہوگا۔

سہیل آفریدی نے پاکستان تحریک انصاف کے بانی عمران خان کا شکریہ ادا کیا، اور کہا کہ ہم عمران خان سے عشق کرتے ہیں، اس سے پہلے آپ نے لوگ دیکھے ہوں گے، جو سیاست کرتے تھے، ہم عشق کرتے ہیں، آپ نے جس طرح قبائلیوں کو عزت بخشی اور شعور دیا ہے، میں آپ کو یقین دلواتا ہوں کہ خیبرپختونخوا صرف عمران خان کا ہے اور یہاں پر صرف عمران خان کی چلے گی۔

انہوں نے کہا کہ میرا لیڈر صرف خیبرپختونخوا اور پاکستان ہی نہیں بلکہ پوری دنیا کا مقبول ترین لیڈر ہے، وہ جانتے تھے کہ قبائلی محرومی کا شکار ہیں، آج تمام قبائلی عمران خان کا شکریہ ادا کر رہے ہیں۔

نئے وزیراعلیٰ نے کہا کہ میں پرچی سے وزیراعلیٰ نہیں بنا، قبائلی علاقے ترقی میں پیچھے رہ گئے، ان میں احساس محرومی موجود تھا، جو اب ختم ہونے جا رہا ہے، قبائلیوں کا احساس محرومی دور کرنے کے لیے مجھے وزیراعلیٰ بنایا گیا ہے، میرے نام کے ساتھ زرداری، بھٹو اور شریف نہیں ہے، میرا تعلق قبائلی اضلاع سے ہے، جہاں کے عوام خوشیاں منا رہے ہیں۔

انہوں نے کہا کہ سب سے بڑی اسٹیبلشمنٹ پی ٹی آئی کی سوشل میڈیا ٹیم ہے، جس کا شکریہ ادا کرتا ہوں، میرے خاندان کا کوئی فرد سیاست میں نہیں، میرے انتخاب پر قبائلی اضلاع میں خوشیاں منائی جارہی ہیں، اپنی محنت سے اس مقام پر پہنچا ہوں۔

ان کا کہنا تھا کہ میرے نام کے ساتھ آفریدی ہونے کی وجہ سے جب وزیراعلیٰ کے لیے میرا نام سامنے آیا تو ایک مائنڈ سیٹ نے مخالفت کی، ان کا مائنڈ سیٹ یہی ہے کہ قبائلی ہمیشہ مرنے کے لیے ہیں، ان کے حقوق اور معدنیات پر یہ قبضہ کرنا چاہتے ہیں، یہی مائنڈ سیٹ 78 سال سے ہم پر حکومت کر رہا ہے۔

انہوں نے اپنے خطاب کے دوران شعر بھی پڑھا کہ ……….

’وہ ایک سمندر کھنگالنے میں لگے ہوئے ہیں

ہماری کمیاں نکالنے میں لگے ہوئے ہیں

وہ، جن کی اپنی لنگوٹی تک پھٹی ہوئی ہے

ہماری پگڑیاں اچھالنے میں لگے ہوئے ہیں‘

سہیل آفریدی نے کہا کہ علی امین گنڈاپور کا شکریہ ادا کرتے ہیں کہ جنہوں نے افغان مہاجرین کو سنبھالا، جگہ دی اور کھانے پینے کا انتظام کیا، انہوں نے کہا کہ منتخب نمائندے اسی طرح عوام کی بھلائی کے کام کرتے ہیں، جیسے علی امین گنڈاپور نے کیے۔

انہوں نے اپنے خطاب میں ارشد شریف کو شہید قرار دیتے ہوئے انہیں خراج تحسین پیش کیا۔

اپنے پہلے خطاب میں نئے وزیراعلیٰ سہیل آفریدی نے بجلی کی کمی اور پانی کے مسائل کے حل کے لیے شمسی توانائی کے ذریعے ایک لاکھ 20 ہزار گھروں کو بجلی فراہم کرنے کا اعلان کیا، اور کہا کہ اپنے لوگوں کو روزگار دینے کے لیے بارڈر پر واقع مارکیٹیں کھولیں گے۔

انہوں نے دیگر مسائل کے حل کے لیے بھی ٹھوس پالیسیاں بنانے کا عزم ظاہر کیا، اور کہا کہ ہیلتھ کارڈ میں مزید بڑی بیماریوں کا علاج بھی شامل کیا جائے گا، انہوں نے کہا کہ کسی گھر میں بچہ پیدا ہوا تو 3 ماہ تک مکمل ذمہ داری صوبائی حکومت اٹھائے گی۔

انہوں نے سرکاری ملازمین کے لیے مفت علاج کی سہولت کا اعلان بھی کیا اور کہا کہ تعلیم پر فوکس کریں گے، انصاف تعلیم پروگرام کے تحت مفت تعلیم کا سلسلہ جاری رہے گا، اسکولوں سےباہر بچوں کو واپس لائیں گے اور شرح خواندگی بہتر بنائیں گے، امن و امان کے لیے سرمایہ کاری کریں گے، قانون نافذ کرنے والی استعداد کار بڑھاکر بد امنی اور دہشتگردی کا مقابلہ کریں گے۔

نئے وزیراعلیٰ نے سیاحت کے شعبے پر خصوصی توجہ دینے اور سیاحوں کے لیے نئے مقامات کھولنے، انفرااسٹرکچر بہتر بنانے کا بھی اعلان کیا۔

سہیل آفریدی جب حلف اٹھا کر خطاب کے لیے قائد ایوان کی نشست پر پہنچے تو انہوں نے عمران خان کی تصویر بھی ڈائس پر رکھی ہوئی تھی۔

اپنے خطاب میں نو منتخب وزیراعلیٰ سہیل آفریدی نے واضح کیا کہ ’میں سرکاری گاڑیوں اور پروٹوکول کا شوقین نہیں ہوں، جیسا تھا ویسا ہوں اور ایسا ہی رہوں گا، جس دن عمران خان ہدایت دیں گے، اسی دن کرسی کو لات مار کر چھوڑدوں گا۔

انتخابی عمل مکمل ہونے کے بعد اسپیکر بابر سلیم سواتی نے اعلان کیا کہ صوبائی اسمبلی حلقہ پی کے 70 کے رکن سہیل آفریدی 145 ارکان کے ایوان میں 90 ووٹ لے کر وزیراعلیٰ خیبرپختونخوا منتخب ہوگئے ہیں۔

یاد رہے کہ سہیل آفریدی ضم قبائلی اضلاع سے تعلق رکھنے والے خیبرپختونخوا کے پہلے وزیراعلیٰ بن گئے ہیں، ان کے انتخاب پر اسمبلی میں پی ٹی آئی کے ارکان نے انہیں مبارک باد پیش کی۔

سہیل آفریدی خیبرپختونخوا میں پی ٹی آئی کے چوتھے وزیراعلیٰ ہیں، ان سے قبل پرویز خٹک، محمود خان اور علی امین گنڈاپور پی ٹی آئی کی جانب سے وزارت اعلیٰ کے منصب پر فائز رہے ہیں۔

قبل ازیں اپوزیشن لیڈر ڈاکٹر عباد اللہ نے اسمبلی اجلاس سے خطاب میں کہا کہ علی امین گنڈاپور اپنا استعفیٰ دے چکے ہیں، جب استعفیٰ منظور ہوگا اور کابینہ تحلیل ہوگی تو پھر نئے وزیر اعلیٰ کے انتخاب کا عمل شروع ہوگا۔

انتخاب قانون کے مطابق ہے، اسپیکر کی رولنگ

اسپیکر بابر سلیم سواتی نے رولنگ دی کہ نئے قائد ایوان کا انتخاب قانون کے مطابق ہے، چند لوگوں کی خواہش ہے کہ سہیل آفریدی وزیراعلیٰ نہ بنیں، علی امین گنڈاپور نے دو بار استعفے گورنر کو بھیجے، انہوں نے خود کہا کہ وہ مستعفی ہوچکے ہیں۔

انہوں نے کہا کہ وزیراعلیٰ کا انتخاب میری آئینی زمہ داری ہے، میں علی امین گنڈاپور کے استعفے اور نئے قائد ایوان کے انتخاب کو آئین و قانون کے مطابق قرار دیتا ہوں۔

انہوں نے رولنگ دی کہ آئین کسی کی خواہش پر نہیں چلتا، علی امین گنڈاپور نے اسمبلی فلور پر بھی مستعفی ہونے کی تصدیق کی ہے، قائد ایوان کے انتخاب پر رولنگ دیتا ہوں کہ جو طریقہ کار اپنایا ہے وہ بالکل آئینی کے مطابق ہے۔

اسپیکر صوبائی اسمبلی نے کہا کہ یہ اس ملک کے چند لوگوں کی خواہش ہے کہ سہیل آفریدی وزیراعلی نہ بنے، آئین کے آرٹیکل 130 کی شق 8 کے تحت علی امین استعفیٰ دے چکے ہیں، اس رولنگ کے تحت علی امین گنڈاپور اپنا استعفیٰ 8 اکتوبر کو دے چکے ہیں، ان کا استعفیٰ ان کی وفاداری کا اظہار ہے۔

انہوں نے کہا کہ میں بحیثیت اسپیکر سمجتا ہوں کہ علی امین گنڈاپور اپنے منصب سے مستعفی ہوچکے ہیں، وزیراعلیٰ صوبے کا انتظامی سربراہ ہوتا ہے، آئین میں وزیراعلیٰ کے استعفے کی منظوری کی کوئی شرط نہیں۔

دوسری جانب اپوزیشن ارکان کے واک آؤٹ کے بعد اسمبلی میں ارکان کی حاضری کے لیے گھنٹیاں بجانا شروع کر دی گئیں۔

دہشتگردی کے خاتمے کیلئے مل بیٹھنا ہوگا، گنڈاپور

مستعفی ہونے والے وزیراعلیٰ علی امین گنڈاپور نے خطاب کرتے ہوئے کہا کہ میں نامزد وزیراعلیٰ سہیل آفریدی کو پیشگی مبارکباد پیش کرتا ہوں۔

علی امین گنڈاپور نے کہا کہ کسی ممبر کو فنڈ نہیں دیا تو اس کے حلقے میں فنڈ خرچ کیا ہے، ہم ڈٹ کے کھڑے ہیں، دہشت گردی کے خاتمے کے لیے سب کو مل کر بیٹھنا ہوگا۔

خیبرپختونخوا میں نئے وزیر اعلیٰ کا انتخاب آج ہوگا، اپوزیشن جماعتوں نے انتخابی عمل کے بائیکاٹ کا فیصلہ کرلیا ہے، یہ فیصلہ اپوزیشن لیڈر ڈاکٹر عباد کی زیرصدارت اجلاس میں کیا گیا۔

ذرائع کے مطابق اپوزیشن لیڈر ڈاکٹر عباد اللہ کی زیر صدارت اپوزیشن جماعتوں کےاجلاس میں جمعیت علمائے اسلام (ف) کے پارلیمانی لیڈر مولانا لطف الرحمٰن اور اکرم خان درانی بھی شریک ہوئے۔

اجلاس کے دوران اسپیکر بابر سلیم بھی اپوزیشن جماعتوں کو راضی نہیں کرسکے۔

استعفے کا تنازع

8 اکتوبر کو علی امین گنڈاپور نے اعلان کیا تھا کہ وہ صوبائی چیف ایگزیکٹو کے عہدے سے مستعفی ہو گئے ہیں، جب کہ پارٹی کے جنرل سیکریٹری سلمان اکرم راجا نے تصدیق کی تھی کہ چیئرمین عمران خان نے سہیل آفریدی کو نیا وزیراعلیٰ مقرر کرنے کی ہدایت دی ہے۔

علی امین گنڈاپور کی جانب سے ایکس پر شیئر کیا گیا استعفے کا خط ان کے سرکاری لیٹرہیڈ پر ٹائپ شدہ اور دستخط شدہ تھا، تاہم یہ ابتدائی استعفیٰ بظاہر انتظامی پیچیدگیوں میں گم ہو گیا اور گورنر ہاؤس نے اس کے موصول ہونے سے انکار کر دیا تھا۔

11 اکتوبر کو گورنر فیصل کریم کنڈی نے کہا کہ گورنر ہاؤس کو علی امین گنڈاپور کا ایک دستی تحریر شدہ استعفیٰ موصول ہوا ہے، آئین اور متعلقہ قوانین کے تحت تفصیلی جانچ کے بعد یہ استعفیٰ مناسب وقت پر پراسیس کیا جائے گا۔

اس سے ایک دن قبل پی ٹی آئی کے ایک پارلیمانی وفد نے اسلام آباد میں گورنر فیصل کریم کنڈی سے ملاقات کی تھی، وفد میں اسد قیصر، عاطف خان، جنید اکبر اور دیگر شامل تھے۔

پی ٹی آئی کے نمائندوں نے وزیراعلیٰ کے انتخاب کے دوران جمہوری اقدار کے تحفظ کے لیے پیپلز پارٹی سے تعاون مانگا تھا، ان کا کہنا تھا کہ پیپلز پارٹی ہمیشہ جمہوری روایات کو اہمیت دینے کا دعویٰ کرتی آئی ہے۔

گورنر فیصل کریم کنڈی نے کہا تھا کہ علی امین گنڈا پور کا استعفیٰ آئینی تقاضوں کے مطابق قبول کیا جائے گا، انہوں نے صوبے میں امن اور عوامی خدمات کے لیے مشترکہ کوششوں پر زور دیا۔

نئے وزیراعلیٰ کیلئے 4 امیدوار

اتوار کو نئے وزیراعلیٰ کے انتخاب کے لیے صوبائی اسمبلی کے اسپیکر کے پاس 4 امیدواروں نے اپنے کاغذاتِ نامزدگی جمع کرائے۔

کاغذات جمع کرانے والوں میں پی ٹی آئی کے نامزد امیدوار سہیل آفریدی، جے یو آئی (ف) کے مولانا لطف الرحمٰن، مسلم لیگ (ن) کے سردار شاہ جہان یوسف اور پیپلز پارٹی کے ارباب زَرک خان شامل ہیں۔

اسمبلی اسپیکر بابر سلیم سواتی نے جانچ پڑتال کے بعد تمام امیدواروں کے کاغذات منظور کر لیے۔

کاغذات جمع کرانے کے بعد پی ٹی آئی کے امیدوار سہیل آفریدی نے صحافیوں سے بات کرتے ہوئے کہا کہ جمہوریت کو قائم رہنا چاہیے اور آئین نے وزیراعلیٰ کے انتخاب کا واضح طریقہ کار بتایا ہے۔

انہوں نے کہا کہ کسی کو بھی نئے وزیراعلیٰ کے انتخاب کے عمل میں مداخلت نہیں کرنی چاہیے۔

اپوزیشن لیڈر ڈاکٹر عباداللہ نے اسمبلی میں گفتگو کرتے ہوئے حیرت کا اظہار کیا کہ خیبر پختونخوا میں دو وزرائے اعلیٰ کیسے ہو سکتے ہیں؟ موجودہ وزیراعلیٰ کا استعفیٰ تاحال گورنر نے منظور نہیں کیا، جب کہ پی ٹی آئی ایک اور وزیراعلیٰ منتخب کرنے جا رہی ہے۔

ان کا کہنا تھا کہ یہ ایک عجیب صورتِ حال ہے کہ جب موجودہ وزیراعلیٰ نے باضابطہ طور پر عہدہ نہیں چھوڑا، صوبائی کابینہ بدستور موجود ہے، تو پھر نئے وزیراعلیٰ کے انتخاب کا انعقاد کیسے ہو رہا ہے، انہوں نے کہا کہ ہم سیاسی طور پر ناتجربہ کار لوگوں سے دوچار ہیں۔

بنوں پولیس کے ترجمان کاشف نواز خان نے ڈان نیوز کو بتایا کہ آج ( اتوار ) دوپہر پولیس پارٹی، سیکیورٹی اہلکاروں کے ہمراہ علاقے میں تلاشی آپریشن کر رہی تھی کہ اچانک بارودی سرنگ (آئی ای ڈی ) کا دھماکا ہوا، جس کے فوراً بعد دہشت گردوں نے بھاری ہتھیاروں سے حملہ کر دیا۔

ترجمان کے مطابق آئی ای ڈی باران شاہ پل کے قریب میران شاہ روڈ پر نصب کیا گیا تھا۔

انہوں نے بتایا کہ اس واقعے میں سیکیورٹی فورسز کے حوالدار دوست محمد خان شہید جبکہ سپاہی شمیم خان زخمی ہوئے۔

پولیس ترجمان نے مزید بتایا کہ پولیس اور سیکیورٹی فورسز کے اہلکاروں نے بھرپور جوابی کارروائی کی، جس کے نتیجے میں دہشت گرد پہاڑی علاقوں کی طرف فرار ہو گئے۔

انہوں نے کہا کہ باقی تمام پولیس اور سیکیورٹی اہلکار محفوظ رہے، تاہم واقعے کے بعد علاقے میں سرچ آپریشن شروع کر دیا گیا۔

دریں اثنا آج بنوں میں ایک کواڈ کاپٹر حملے میں چار بچے بھی زخمی ہوگئے۔

پولیس ترجمان کاشف نواز خان کے مطابق خیبر پختونخوا کے ضلع بنوں کے خدری مامند خیل علاقے میں اتوار کی شام دہشت گردوں کے کواڈ کاپٹر نے ایک گھر کو نشانہ بنایا، جس کے نتیجے میں تین بچے زخمی ہوئے۔

ترجمان کے مطابق زخمی بچوں کو ضلعی ہیڈکوارٹر اسپتال بنوں منتقل کیا گیا، جہاں ان کی حالت خطرے سے باہر بتائی گئی۔

بنوں پولیس کے ترجمان نے زخمی بچوں کی شناخت مامون، معصوم، سلمان اور مہمان کے نام سے کی، چاروں بچے ایک ہی خاندان سے تعلق رکھتے ہیں، اور ان کی عمریں 8 سے 13 سال کے درمیان ہیں۔

اسپیکر کے پی اسمبلی بابر سلیم سواتی کی جانب سے جاری کردہ انتخابی شیڈول کے مطابق آج (اتوار کو) سہ پہر 3 بجے تک کاغذات نامزدگی جمع کرائے جاسکیں گے، 3 بجے سے شام تک کاغذات نامزدگی کی جانچ پڑتال کی جائے گی، کے پی اسمبلی کا اجلاس کل صبح 10 بجے طلب کرلیا گیا ہے۔

شیڈول کے مطابق سہ پہر 3 بجے سے شام تک کاغذات نامزدگی کی جانچ پڑتال کی جائے گی۔

صوبائی اسمبلی کا اجلاس کل صبح 10 بجے طلب کیا گیا ہے، اجلاس کا کا ایجنڈا بھی جاری کردیا گیا ہے، اعلامیے کے مطابق وزیر اعلیٰ کے انتخاب سے قبل اسمبلی کی حاضری کے لیے گھنٹی بجائے جائے گی۔

واضح رہے کہ 8 اکتوبر کو پاکستان تحریک انصاف ( پی ٹی آئی) کے سیکریٹری جنرل سلمان اکرم راجا نے وزیراعلیٰ خیبرپختونخوا کی تبدیلی کی تصدیق کرتے ہوئے کہا تھا کہ علی امین گنڈا پور کی جگہ سہیل آفریدی وزیراعلیٰ کے امیدوار ہوں گے۔

ان کا کہنا تھا کہ وزیراعلی کی پوزیشن بانی پی ٹی آئی کی امانت تھی، یہ امانت ان کو واپس کر کے اپنا استعفی دے رہا ہوں، تاہم سہیل آفریدی کو میری مکمل حمایت اور سپورٹ حاصل ہوگی اور ہم عمران خان کی رہائی اور پارٹی پالیسی کے لیے ایک ہوکر آگے بڑھیں گے۔

قبل ازیں، ترجمان گورنر ہاؤس خیبر پختونخوا نے علی امین گنڈا پور کا استعفیٰ موصول ہونے کی تصدیق کرتے ہوئے کہا تھا کہ آج (11 اکتوبر) کی دوپہر ڈھائی بجے وزیراعلیٰ خیبر پختونخوا کا اپنے عہدے سے استعفیٰ باقاعدہ طور پر گورنر ہاؤس کو موصول ہوگیا۔

ترجمان گورنر ہاؤس نے بتایا کہ آئین و قانون کے مطابق استعفے کی جانچ پڑتال کی جائے گی اور تمام معاملے کو شفاف انداز میں آگے بڑھایا جائے گا۔

9 اکتوبر کو وفاقی وزیر اطلاعات عطا تارڑ نے کہا تھا کہ تحریک انصاف انتشاری ٹولہ اور دہشت گردوں کا سہولت کار ہے، جیل میں بیٹھے شخص کے دور میں دہشت گردوں کو واپس لایا گیا اور اب سہیل آفریدی کو وزیراعلیٰ خیبرپختونخوا کا امیدوار اس لیے نامزد کیا گیا ہے کہ وہ دہشت گردوں کی کھل کر سہولت کاری کرسکیں۔

لیفٹیننٹ جنرل احمد شریف چوہدری نے گزشتہ روز پریس کانفرنس کرتے ہوئے کہا تھا کہ بدقسمتی سے خیبرپختونخوا میں سوچے سمجھے منصوبے کے تحت دہشت گردوں اور ان کے سہولت کاروں کو اسپیس دی گئی، یہاں گورننس اور عوامی فلاح و بہبود کو جان بوجھ کر کمزور کیا گیا، جس کا خمیازہ آج تک خیبرپختونخوا کے بہادر اور غیور عوام اپنے خون اور اپنی قربانیوں کے ذریعے بھگت رہے ہیں۔

نامزد وزیر اعلیٰ سہیل آفریدی کون ہیں؟

خیبرپختونخوا کے نئے نامزد وزیراعلیٰ سہیل آفریدی کا تعلق ضلع خیبر سے ہے اور انصاف اسٹوڈنٹس فیڈریشن کے صوبائی صدر رہ چکے ہے۔

سہیل آفریدی 2024 کے عام انتخابات میں پہلی بار ضلع خیبر سے رکن صوبائی اسمبلی منتخب ہوئے۔

اس کے علاوہ سہیل آفریدی علی امین گنڈا پور کی کابینہ میں بحثیت معاون خصوصی برائے موصلات ذمہ داریاں ادا کرچکے ہیں۔

تاہم، گزشتہ ہفتے صوبائی کابینہ میں تبدیلی کے بعد سہیل آفریدی کو معاون خصوصی سے صوبائی وزیر برائے اعلی تعلیم بنایا گیا تھا، وہ پی ٹی آئی کی مرکزی ایگزیکٹو کمیٹی کے رکن بھی ہیں۔

ڈان نیوز کے مطابق کاغذات کی جانچ پڑتال کے بعد 13 اکتوبر کی صبح 10 بجے نئے قائد ایوان کا انتخاب کیا جائے گا۔

واضح رہے کہ 8 اکتوبر کو پاکستان تحریک انصاف ( پی ٹی آئی) کے سیکریٹری جنرل سلمان اکرم راجا نے وزیراعلیٰ خیبرپختونخوا کی تبدیلی کی تصدیق کرتے ہوئے کہا تھا کہ علی امین گنڈا پور کی جگہ سہیل آفریدی وزیراعلیٰ کے امیدوار ہوں گے۔

جس کے بعد علی امین گنڈا پور نے عہدے سے مستعفی ہونے کا اعلان کرتے ہوئے کہا تھا کہ عمران خان کے حکم پر وزارت اعلیٰ کے عہدے سے استعفیٰ دے رہا ہوں۔

ان کا کہنا تھا کہ وزیراعلی کی پوزیشن بانی پی ٹی آئی کی امانت تھی، یہ امانت ان کو واپس کر کے اپنا استعفی دے رہا ہوں، تاہم سہیل آفریدی کو میری مکمل حمایت اور سپورٹ حاصل ہوگی اور ہم عمران خان کی رہائی اور پارٹی پالیسی کے لیے ایک ہوکر آگے بڑھیں گے۔

قبل ازیں، ترجمان گورنر ہاؤس خیبر پختونخوا نے علی امین گنڈا پور کا استعفیٰ موصول ہونے کی تصدیق کرتے ہوئے کہا تھا کہ آج (11 اکتوبر) کی دوپہر ڈھائی بجے وزیراعلیٰ خیبر پختونخوا کا اپنے عہدے سے استعفیٰ باقاعدہ طور پر گورنر ہاؤس کو موصول ہوگیا۔

ترجمان گورنر ہاؤس نے بتایا کہ آئین و قانون کے مطابق استعفے کی جانچ پڑتال کی جائے گی اور تمام معاملے کو شفاف انداز میں آگے بڑھایا جائے گا۔

9 اکتوبر کو وفاقی وزیر اطلاعات عطا تارڑ نے کہا تھا کہ تحریک انصاف انتشاری ٹولہ اور دہشت گردوں کا سہولت کار ہے، جیل میں بیٹھے شخص کے دور میں دہشت گردوں کو واپس لایا گیا اور اب سہیل آفریدی کو وزیراعلیٰ خیبرپختونخوا کا امیدوار اس لیے نامزد کیا گیا ہے کہ وہ دہشت گردوں کی کھل کر سہولت کاری کرسکیں۔

لیفٹیننٹ جنرل احمد شریف چوہدری نے گزشتہ روز پریس کانفرنس کرتے ہوئے کہا تھا کہ بدقسمتی سے خیبرپختونخوا میں سوچے سمجھے منصوبے کے تحت دہشت گردوں اور ان کے سہولت کاروں کو اسپیس دی گئی، یہاں گورننس اور عوامی فلاح و بہبود کو جان بوجھ کر کمزور کیا گیا، جس کا خمیازہ آج تک خیبرپختونخوا کے بہادر اور غیور عوام اپنے خون اور اپنی قربانیوں کے ذریعے بھگت رہے ہیں۔

نامزد وزیر اعلیٰ سہیل آفریدی کون ہیں؟

خیبرپختونخوا کے نئے نامزد وزیراعلیٰ سہیل آفریدی کا تعلق ضلع خیبر سے ہے اور انصاف اسٹوڈنٹس فیڈریشن کے صوبائی صدر رہ چکے ہے۔

سہیل آفریدی 2024 کے عام انتخابات میں پہلی بار ضلع خیبر سے رکن صوبائی اسمبلی منتخب ہوئے۔

اس کے علاوہ سہیل آفریدی علی امین گنڈا پور کی کابینہ میں بحثیت معاون خصوصی برائے موصلات ذمہ داریاں ادا کرچکے ہیں۔

تاہم، گزشتہ ہفتے صوبائی کابینہ میں تبدیلی کے بعد سہیل آفریدی کو معاون خصوصی سے صوبائی وزیر برائے اعلی تعلیم بنایا گیا تھا، وہ پی ٹی آئی کی مرکزی ایگزیکٹو کمیٹی کے رکن بھی ہیں۔