یہ بولیاں جمعرات کو اسلام آباد کے جناح کنونشن سینٹر میں ہونے والی نیلامی کے دوران سامنے آئیں۔

او زی ڈویلپرز اور سافٹ ویئر کمپنی آئی ٹو سی کے درمیان سیالکوٹ ٹیم کے لیے سخت مقابلہ ہوا۔

آئی ٹو سی کی آخری بولی 1 ارب 82 کروڑ روپے تھی، جس کے بعد او زی ڈویلپرز نے بولی بڑھا کر 1 ارب 85 کروڑ روپے کر دی، جو پی ایس ایل کی تاریخ کی اب تک کی سب سے بڑی بولی ہے۔

نیلامی کے پہلے مرحلے میں ایف کے ایس گروپ نے حیدرآباد کی فرنچائز حاصل کی، جہاں اس کا مقابلہ بھی آئی ٹو سی سے تھا، جس کی آخری بولی 1 ارب 70 کروڑ روپے رہی۔

پی ایس ایل میں شامل ہونے والی ساتویں ٹیم کی بنیادی قیمت 1 ارب 10 کروڑ روپے جبکہ آٹھویں ٹیم کی بنیادی قیمت 1 ارب 70 کروڑ روپے مقرر کی گئی تھی۔

حیدرآباد اور سیالکوٹ پہلی بار 2015 میں لیگ کے آغاز کے بعد پی ایس ایل کا حصہ بنیں گے۔

رواں سیزن 26 مارچ سے 3 مئی تک شیڈول ہے۔

فرنچائز کے لیے زیر غور شہروں میں فیصل آباد، گلگت، حیدرآباد، مظفرآباد، راولپنڈی اور سیالکوٹ شامل تھے۔

اس وقت پی ایس ایل کی ٹیموں میں لاہور قلندرز، اسلام آباد یونائیٹڈ، پشاور زلمی، کوئٹہ گلیڈی ایٹرز، کراچی کنگز اور ملتان سلطانز شامل ہیں۔

دو نئی ٹیموں کے لیے بولی دینے والوں میں ایف کے ایس، او زی ڈویلپرز، ایم نیکسٹ انک، ڈہرکی شوگر ملز، انویریکس سولر، آئی ٹو سی، جاز، پرزم ڈویلپرز، وی جی او ٹییل اور ولی پاکستان شامل تھے۔

نیلامی کی میزبانی سابق کپتان اور معروف کمنٹیٹر وسیم اکرم نے کی، جبکہ پی ایس ایل کے چیف ایگزیکٹو سلمان نصیر بھی اسٹیج پر ان کے ہمراہ موجود تھے۔

سلمان نصیر نے کہا کہ پی ایس ایل کے دس سال ہمیں اس تاریخی لمحے تک لے آئے ہیں۔ وسیم اکرم نے بولی دہندگان کو یہ باور کرایا کہ فرنچائز حاصل کرنا محض ملکیت نہیں بلکہ ٹیم کے لوگو، کِٹس اور کھلاڑیوں سے رابطے سمیت کئی امکانات کا دروازہ کھولتا ہے۔

نیلامی سے قبل پاکستان کرکٹ بورڈ کے چیئرمین محسن نقوی نے رائزنگ اسٹار ایشیا کپ جیتنے والی ٹیم کو 9 کروڑ روپے کا انعام دیا، جبکہ ہانگ کانگ سکسز جیتنے والی ٹیم کو 1 کروڑ 85 لاکھ روپے کا کیش پرائز دیا گیا۔

واضح رہے کہ بولی جمع کرانے کی آخری تاریخ میں کئی بار توسیع کی گئی تھی، پہلے 15 دسمبر سے 22 دسمبر اور بعد ازاں 24 دسمبر تک، کیونکہ یورپ، امریکا اور مشرق وسطیٰ سمیت مختلف خطوں سے سرمایہ کاروں کی دلچسپی میں اضافہ ہوا تھا۔ جس کی وجہ لندن اور نیویارک میں ہونے والے روڈ شو بھی بنے۔

بنگلہ دیش کی ٹیم کو آئندہ ماہ کولکتہ میں ٹی ٹوئنٹی ورلڈ کپ کے تین میچ کھیلنے ہے۔ 7 فروری سے 8 مارچ تک جاری رہنے والے اس ٹورنامنٹ کے بھارت اور سری لنکا مشترکہ میزبان ہیں۔

اتوار کو بنگلہ دیش کرکٹ بورڈ نے ہنگامی اجلاس کے بعد کہا تھا کہ اس نے انٹرنیشنل کرکٹ کونسل سے باضابطہ طور پر درخواست کی ہے کہ بنگلہ دیش کے میچز سری لنکا منتقل کیے جائیں۔

وزارتِ اطلاعات و نشریات کے بیان میں کہا گیا کہ مستفیض الرحمٰن کو آئی پی ایل سے نکالنے کے فیصلے کی کوئی وجہ نہیں بتائی گئی، جس سے بنگلہ دیشی عوام میں شدید اضطراب پیدا ہوا ہے۔

بیان کے مطابق اس تناظر میں آئی پی ایل میچز کی نشریات سے متعلق فیصلہ کیا گیا ہے، جو عوامی مفاد میں ہے۔

یہ بیان وزارت کے اسسٹنٹ سیکریٹری فیروز خان کے دستخط سے جاری کیا گیا۔

بیان میں مزید کہا گیا کہ بھارتی کرکٹ بورڈ کے اس فیصلے کی کوئی منطقی وجہ نہیں اور اس نے بنگلہ دیشی عوام کو پریشان، حیران اور غصے میں مبتلا کر دیا ہے۔

حکومت کی جانب سے ہدایت دی گئی ہے کہ مزید احکامات تک آئی پی ایل کے تمام میچز اور ایونٹس کی تشہیر اور نشریات بند کر دی جائیں۔

ای ایس پی این کرک انفو کے مطابق 2008 میں آئی پی ایل کے آغاز سے اب تک بنگلہ دیش میں اس کی نشریات ٹی وی چینلز اور اسٹریمنگ پلیٹ فارمز پر ہوتی رہی ہیں، یہ پہلا موقع ہے کہ بنگلہ دیشی حکومت نے دنیا میں کہیں بھی کسی بین الاقوامی کرکٹ ٹورنامنٹ کی نشریات پر پابندی عائد کی ہے۔

بنگلہ دیش کرکٹ بورڈ کے صدر امین الاسلام بلبُل نے ہفتے کی شب صحافیوں سے کہا کہ ہمارے کھلاڑیوں کی عزت اور سکیورٹی ہماری اولین ترجیح ہے اور ہم اسی کو مدنظر رکھتے ہوئے مناسب وقت پر فیصلہ کریں گے۔

مستفیض الرحمٰن، جو اس سے قبل بھی مختلف ٹیموں کی جانب سے آئی پی ایل کھیل چکے ہیں، کو دسمبر میں ہونے والی نیلامی میں کولکتہ نے ایک ملین ڈالر سے زائد رقم میں خریدا تھا۔

بنگلہ دیش کی عبوری حکومت میں نوجوانوں اور کھیلوں کے مشیر آصف نذرل نے اتوار کو سرکاری خبر رساں ادارے بی ایس ایس کے ذریعے جاری بیان میں کہا کہ ہم کسی بھی صورت بنگلہ دیشی کرکٹ، کرکٹرز اور بنگلہ دیش کی توہین قبول نہیں کریں گے، غلامی کے دن ختم ہو چکے ہیں۔

بنگلہ دیش کے فاسٹ باؤلر مستفیض الرحمان کو ہفتے کے روز انڈین پریمیئر لیگ کی ٹیم کولکتہ نائٹ رائیڈرز نے نکال دیا، جب بھارتی کرکٹ بورڈ کی جانب سے ہمسایہ ممالک کے درمیان کشیدگی کے تناظر میں ایسا کرنے کا مشورہ دیا گیا۔

بنگلہ دیش کے مشیر نذرل نے کہا کہ انہوں نے بنگلہ دیش کرکٹ بورڈ کو ہدایت دی ہے کہ وہ انٹرنیشنل کرکٹ کونسل کو خط لکھے۔

انہوں نے کہا کہ بورڈ کو یہ بات آگاہ کرنی چاہیے کہ اگر کسی بنگلہ دیشی کرکٹر کو معاہدے کے باوجود بھارت میں کھیلنے کی اجازت نہیں دی جاتی تو پوری بنگلہ دیشی ٹیم خود کو ورلڈ کپ کھیلنے کے لیے محفوظ محسوس نہیں کر سکتی۔

انہوں نے مزید کہا کہ میں نے بورڈ کو یہ بھی ہدایت دی ہے کہ بنگلہ دیش کے ورلڈ کپ میچز سری لنکا میں کرانے کی درخواست کی جائے۔

ٹی ٹوئنٹی ورلڈ کپ سات فروری سے شروع ہو رہا ہے، جس کی میزبانی بھارت اور سری لنکا مشترکہ طور پر کر رہے ہیں۔

بنگلہ دیش کو اپنے چاروں گروپ میچز بھارت میں کھیلنے ہیں۔

پاکستان اپنے تمام میچز سری لنکا میں کھیلے گا، جو ایک ایسے معاہدے کا حصہ ہے جس کے تحت بھارت اور پاکستان کثیر الملکی ٹورنامنٹس میں غیر جانبدار مقامات پر کھیلتے ہیں۔

بھارت اور بنگلہ دیش کے سیاسی تعلقات اس وقت کشیدہ ہو گئے تھے جب 2024 میں ڈھاکا میں عوامی بغاوت کے نتیجے میں اُس وقت کی وزیرِ اعظم شیخ حسینہ، جو نئی دہلی کی قریبی اتحادی تھیں، اقتدار سے بے دخل ہوگئی تھیں۔

بھارتی وزارتِ خارجہ نے گزشتہ ماہ بنگلہ دیش میں اقلیتوں کے خلاف مسلسل دشمنی کی مذمت کی تھی۔

بنگلہ دیش کے عبوری رہنما اور نوبیل امن انعام یافتہ محمد یونس نے بھارت پر تشدد کے پیمانے کو بڑھا چڑھا کر پیش کرنے کا الزام عائد کیا ہے۔

بنگلہ دیش کرکٹ بورڈ کے صدر امین الاسلام بلبل نے کہا کہ بورڈ اتوار کو ہنگامی اجلاس کرے گا۔

انہوں نے کہا کہ ہمارے کرکٹرز کی عزت اور سلامتی ہماری اولین ترجیح ہے اور ہم ان نکات کو مدنظر رکھتے ہوئے مناسب وقت پر فیصلہ کریں گے۔

آصف نذرل نے یہ بھی کہا کہ وہ بنگلہ دیش میں آئی پی ایل کی نشریات روکنے کی درخواست کریں گے۔

انہوں نے کہا کہ میں نے اطلاعات و نشریات کے مشیر سے درخواست کی ہے کہ بنگلہ دیش میں آئی پی ایل ٹورنامنٹ کی نشریات بند کی جائیں۔

یہ پیش رفت اس کے بعد سامنے آئی جب بھارتیہ جنتا پارٹی کے رہنما سنگیت سوم نے بالی ووڈ اسٹار شاہ رخ خان پر اپنی فرنچائز میں مستفیض الرحمان کو شامل کرنے پر تنقید کی اور انہیں غدار قرار دیا۔

مستفیض الرحمان کی کولکتہ نائٹ رائیڈرز میں شمولیت ایسے وقت ہوئی تھی جب بھارتی دائیں بازو کی جانب سے بنگلہ دیش میں ہندوؤں پر مبینہ حملوں کے الزامات سامنے آ رہے تھے۔

گزشتہ ماہ نئی دہلی میں بنگلہ دیش کے ہائی کمیشن کے قریب سینکڑوں افراد نے احتجاج کیا تھا، یہ احتجاج بنگلہ دیش کے ضلع میمن سنگھ میں ہندو فیکٹری ورکر دیپو چندر داس کو ایک ہجوم کی جانب سے تشدد کا نشانہ بنانے اور زندہ جلانے کے واقعے کے بعد کیا گیا۔ ہجوم نے الزام عائد کیا تھا کہ دیپو چندر داس نے حضور اکرم ﷺ کے بارے میں توہین آمیز ریمارکس دیے تھے۔

اس واقعے میں مجموعی طور پر 12 افراد کو گرفتار کیا گیا۔

دیوجیت سائکیا نے بھارتی خبر رساں ادارے اے این آئی کو بتایا کہ حالیہ پیش رفت کے باعث بی سی سی آئی نے فرنچائز کولکتہ نائٹ رائیڈرز کو ہدایت دی ہے کہ وہ اپنے اسکواڈ سے بنگلہ دیش کے کھلاڑی مستفیض الرحمان کو ریلیز کریں۔

انہوں نے کہا کہ اگر ضرورت ہو تو ٹیم متبادل کھلاڑی کی درخواست کر سکتی ہے، جس کی بی سی سی آئی اجازت دے گا۔

کولکتہ نائٹ رائیڈرز نے اپنے بیان میں کہا کہ آئی پی ایل کے قواعد کے مطابق ٹیم کو متبادل کھلاڑی شامل کرنے کی اجازت دی جائے گی اور اس حوالے سے مزید تفصیلات بعد میں جاری کی جائیں گی۔

خبر رساں ادارے رائٹرز نے اس معاملے پر مستفیض الرحمان سے مؤقف لینے کے لیے رابطہ کیا ہے۔

30 سالہ مستفیض الرحمان اس سے قبل آئی پی ایل میں سن رائزرس حیدرآباد، ممبئی انڈینز، راجستھان رائلز، چنئی سپر کنگز اور دہلی کیپیٹلز کی نمائندگی کر چکے ہیں۔

انہوں نے آئی پی ایل کے 60 میچز میں 65 وکٹیں حاصل کیں۔

گزشتہ ماہ ہونے والی نیلامی میں کولکتہ نائٹ رائیڈرز نے انہیں 92 ملین بھارتی روپے (تقریباً 10 لاکھ 20 ہزار ڈالر) میں خریدا تھا، جس کے ساتھ وہ آئی پی ایل کی تاریخ کے سب سے مہنگے بنگلہ دیشی کھلاڑی بن گئے تھے۔

ہندوستان ٹائمز کے مطابق جمعرات کو اپوزیشن کانگریس پارٹی نے سنگیت سوم کی جانب سے شاہ رخ خان پر کی جانے والی تنقید کی مذمت کی۔

اتر پردیش کے سابق رکن اسمبلی سنگیت سوم نے شاہ رخ خان کو غدار قرار دیتے ہوئے ان سے سوال کیا کہ وہ ایک ایسے ملک کے کھلاڑی پر سرمایہ کاری کیوں کر رہے ہیں جو بھارت کے خلاف کام کر رہا ہے۔

ہندوستان ٹائمز کے مطابق ایک ویڈیو کلپ میں سنگیت سوم نے کہا کہ جس طرح بنگلہ دیش میں ہندوؤں پر مظالم ہو رہے ہیں، خواتین اور بچیوں کی عصمت دری کی جا رہی ہے، ان کے گھروں کو جلایا جا رہا ہے اور وہاں بھارت مخالف نعرے لگائے جا رہے ہیں، اس کے باوجود شاہ رخ خان جیسے لوگ، جنہیں انہوں نے غدار کہا، ایسے ملک کے کھلاڑیوں میں سرمایہ کاری کر رہے ہیں جو بھارت کے خلاف کام کر رہا ہے۔

اس واقعے نے بھارت اور اس کے ہمسایہ ملک کے درمیان تعلقات کو مزید خراب کر دیا ہے، جو پہلے ہی 2024 میں بنگلہ دیش کی سابق وزیر اعظم شیخ حسینہ کے حکومت مخالف احتجاج کے بعد نئی دہلی منتقل ہونے کے بعد کشیدہ تھے۔

آئی پی ایل کا 19واں ایڈیشن 26 مارچ سے شروع ہوگا، اس سے قبل بھارت اور سری لنکا فروری میں شروع ہونے والے ٹی ٹوئنٹی ورلڈ کپ کی مشترکہ میزبانی کریں گے۔

میچ ریفری جیف کرو نے کہا کہ ایم سی جی کی پچ حد سے زیادہ باؤلرز کے حق میں تھی، پہلے دن 20 وکٹیں گریں، دوسرے دن 16 وکٹیں گریں اور کوئی بھی بلے باز نصف سنچری تک نہ پہنچ سکا، اسی لیے گائیڈ لائنز کے مطابق پچ کو ناقص قرار دیا گیا اور وینیو کو ایک ڈی میرٹ پوائنٹ ملا۔

واضح رہے کہ انگلینڈ نے دوسرے دن کے آخری سیشن میں چار وکٹوں سے آسٹریلیا کو شکست دی، چاروں اننگز میں کسی بھی بلے باز کا زیادہ سے زیادہ اسکور 46 رہا۔

پرٹھ ٹیسٹ بھی دو دن میں ختم ہوا تھا تاہم اس پچ کو آئی سی سی نے بہت اچھی ریٹنگ دی تھی۔

ایم سی جی کے کیوریٹر میٹ پیج اور ان کی ٹیم نے وکٹ پر 10 ملی میٹر گھاس چھوڑی، جس سے فاسٹ باؤلرز کو سیم اور باؤنس ملا اور بیٹنگ نہایت مشکل ہوگئی۔

اس صورتحال کے باعث کرکٹ آسٹریلیا کو تقریباً ایک کروڑ آسٹریلوی ڈالر کے مالی نقصان کا سامنا کرنا پڑا کیونکہ تیسرے اور چوتھے دن کے ٹکٹ واپس کرنا پڑے۔

کرکٹ آسٹریلیا کے چیف آف کرکٹ جیمز آل سوپ نے کہا کہ تیسرے اور چوتھے دن کے ٹکٹ رکھنے والے شائقین اور دنیا بھر میں میچ دیکھنے کے منتظر لاکھوں مداحوں کے لیے یہ مایوس کن تھا کہ پچ بلے اور گیند کے درمیان ایم سی جی کا روایتی توازن فراہم نہ کر سکی۔

آئی سی سی کے فیصلے سے قبل آسٹریلوی کوچ اینڈریو میکڈونلڈ نے میٹ پیج کا دفاع کرتے ہوئے پچ کی تیاری میں مداخلت کے خلاف خبردار کیا تھا۔ ان کا کہنا تھا کہ میٹ پیج نے برسوں سے شاندار کام کیا ہے اور کم اسکور کرنے میں بلے بازوں کو بھی ذمہ داری قبول کرنی چاہیے۔

ایشیز سیریز میں آسٹریلیا کو 1-3 کی برتری حاصل ہے جبکہ پانچواں اور آخری ٹیسٹ اتوار(4 جنوری) سے سڈنی میں شروع ہوگا۔

آئی سی سی اکیڈمی گراؤنڈ دبئی پر پاکستان فتح کی جانب بڑھ رہا تھا کہ ایک ناخوشگوار لمحہ سامنے آیا۔ آؤٹ ہونے کے بعد ایک بھارتی بلے باز نے جوتا دکھانے کا اشارہ کیا اور ایک بار پھر دونوں ٹیموں کے درمیان میچ کے بعد مصافحہ نہیں ہوا، جو حالیہ پاک بھارت مقابلوں میں افسوسناک طور پر معمول بنتا جا رہا ہے۔ ایسے میں جب کھلاڑی جذباتی ہو سکتے تھے، سرفراز احمد کی آواز براڈکاسٹ پر صاف سنائی دی، ’تمیز کے دائرے میں رہنا، جاہلوں کی طرح جاہل نہیں ہو جانا‘۔

پاک بھارت ٹاکرا بالکل یک طرفہ رہا۔ سمیر منہاس نے 172 رنز کی شاندار اننگز کھیلی، جو انڈر 19 ایشیا کپ فائنل میں کسی بھی کھلاڑی کا سب سے بڑا انفرادی اسکور ہے، اور پاکستان کو 8 وکٹوں پر 347 رنز تک پہنچا دیا۔ بھارت کی بیٹنگ ابتدا ہی سے بکھر گئی اور 156 رنز پر ڈھیر ہو گئی، جب علی رضا نے بیٹنگ لائن اپ کو تہس نہس کر دیا۔ گروپ مرحلے کی شکست کے بعد مکمل واپسی ہوئی اور پاکستان نے بھرپور انداز میں ٹرافی اپنے نام کی۔

روایتی حریف کو عبرتناک شکست دینے کے بعد ایکس پر سرفراز احمد کے چرچے ہوگئے۔

ایک صارف نے ان کے الفاظ کو پاک بھارت مقابلے کے لیے بہترین نصیحت قرار دیا اور فتح کو وقار کے ساتھ منانے پر سراہا، نہ کہ غیر ضروری اچھل کود پر۔

ایک اور صارف نے ڈگ آؤٹ کے ان الفاظ کو Chef’s Kiss لمحہ کہا، جبکہ کئی شائقین تمیز کے دائرے میں کے جملے کو ایسے دہرانے لگے جیسے یہ نیا قومی نعرہ ہو۔

میمز بھی فوراً سامنے آ گئے۔ ایک وائرل پوسٹ میں بھارت کے خلاف فائنل میں سرفراز کی موجودگی کو کینئے ویسٹ کے 2005 گریمی لمحے سے تشبیہ دی گئی، جبکہ ایک اورپوست میں ایک پرانی ویڈیو دوبارہ سامنے آئی جس میں ایک مداح سرفراز کو گلے لگا کر چیخ رہا تھا کہ سرفراز بھائی کبھی دھوکا نہیں دیتا۔

ایک پوسٹ میں بھارت کے خلاف فائنلز میں سرفراز احمد کے ریکارڈ کو ٹرافیوں کی فہرست کی طرح گنوایا گیا: 2006 انڈر 19 ورلڈ کپ فائنل، 2017 چیمپئنز ٹرافی فائنل، اور اب اگلی نسل کی رہنمائی کرتے ہوئے انڈر 19 ایشیا کپ کا ٹائٹل۔

کئی صارفین نے سرفراز کو مینٹور مقرر کرنے کے پی سی بی کے فیصلے کی تعریف کی اور انہیں پرجوش، بے لوث اور ایماندار قرار دیا، خاص طور پر اس بات پر کہ وہ نوجوان کھلاڑیوں کو دباؤ اور سیاست زدہ مقابلوں میں خود پر قابو رکھنا سکھا رہے ہیں۔

بعد ازاں سرفراز احمد نے واضح کیا کہ ان کا پیغام اتفاقیہ نہیں تھا۔ میچ کے بعد پریس کانفرنس میں انہوں نے ماضی کی بھارتی ٹیموں کی کھیل دوستی کا موجودہ رویے سے موازنہ کیا اور کہا کہ موجودہ رویہ مناسب نہیں اور اس بات پر زور دیا کہ وقار ہر چیز سے بڑھ کر ہے، چاہے حریف کتنا ہی پرانا ہو۔

ایک ایسی کھیل rivalry میں جو مسلسل سیاست کا شکار رہی ہے، ایسے میں سرفراز احمد کی تعریفیں ان کے تحمل و برداشت کے مظاہرے کی تلقین کرنے پر کی گئیں۔ بہت سے شائقین کے لیے ڈگ آؤٹ سے کہا گیا وہ ایک جملہ ایک سبق بن گیا۔ ’انہیں مکمل شکست دو، دل کھول کر جشن مناؤ، مگر اپنی ’تمیز‘ کبھی مت بھولو‘۔

انڈر 19 ایشیا کپ میں شاندار کامیابی کے بعد قومی انڈر 19 ٹیم کے کوچ، مینٹور اور کھلاڑیوں نے اسلام آباد میں مشترکہ پریس کانفرنس کی، جہاں ٹیم کے مینٹور سرفراز احمد نے بھارتی کھلاڑیوں کے رویے پر تنقید کی۔

پریس کانفرنس سے خطاب کرتے ہوئے انڈر 19 ٹیم کے ہیڈ کوچ شاہد انور نے کہا کہ ایشیا کپ کے لیے ٹیم نے منظم اور بھرپور تیاری کی تھی۔ کھلاڑیوں نے طے شدہ حکمتِ عملی کے مطابق کھیل پیش کیا، جس کا نتیجہ کامیابی کی صورت میں سامنے آیا۔

اس موقع پر ٹیم کے مینٹور سرفراز احمد نے بتایا کہ وزیراعظم کی جانب سے کھلاڑیوں کے لیے فی کس ایک کروڑ روپے کے انعام کا اعلان کیا گیا ہے، جس سے نوجوان کرکٹرز کی حوصلہ افزائی ہوگی۔

انہوں نے کہا کہ بھارت کو شکست دے کر کھلاڑیوں نے قوم کا سر فخر سے بلند کیا، فائنل میں سمیر منہاس نے شاندار اننگز کھیلی، جبکہ دیگر کھلاڑیوں نے بھی مجموعی طور پر عمدہ کارکردگی کا مظاہرہ کیا۔

ان کا کہنا تھا کہ ورلڈ کپ سے قبل اس کامیابی نے ٹیم کے اعتماد میں نمایاں اضافہ کیا ہے۔

ایک سوال کے جواب میں سرفراز احمد نے کہا کہ فی الحال مینٹور کی ذمہ داری نبھانا ہی کافی ہے، ورلڈ کپ سے قبل ایسی فتح یقیناً اعتماد میں اضافہ کرتی ہے۔

بھارتی ٹیم کے حوالے سے بات کرتے ہوئے انہوں نے کہا کہ بھارتی کھلاڑیوں کا رویہ کھیل کی روایات کے مطابق نہیں تھا اور ان کا طرزِ عمل نامناسب رہا۔ انہوں نے بتایا کہ میں نے اپنے کھلاڑیوں کو اسپورٹس مین اسپرٹ برقرار رکھنے کی ہدایت کی تھی۔

پریس کانفرنس کے دوران ٹیم کے کپتان فرحان یوسف نے کہا کہ ٹیم مینجمنٹ نے کھلاڑیوں کو بھرپور سپورٹ فراہم کی، جس کے باعث میدان میں بہتر نتائج حاصل ہوئے۔ ان کا کہنا تھا کہ ورلڈ کپ سے قبل ٹیم اپنی خامیوں پر کام کرے گی تاکہ کارکردگی میں مزید بہتری لائی جا سکے۔

فائنل میں شاندار بیٹنگ کرنے والے سمیر منہاس نے کہا کہ ٹیم کا منصوبہ یہی تھا کہ پورے ٹورنامنٹ میں بے خوف ہو کر کرکٹ کھیلی جائے اور یہی حکمتِ عملی ٹیم کی کامیابی کی بنیاد بنی۔

واضح رہے کہ پاکستان نے گزشتہ روز آئی سی سی اکیڈمی گراؤنڈ دبئی میں کھیلے گئے انڈر 19 ایشیا کپ کے فائنل میں شاندار کارکردگی کا مظاہرہ کرتے ہوئے روایتی حریف بھارت کو 191 رنز کے بھاری مارجن سے شکست دے کر ٹائٹل اپنے نام کیا تھا۔

اوپنر سمیع منہاس نے ریکارڈ ساز اننگز کھیلی، انہوں نے 172 رنز اسکور کیے، جو انڈر 19 ایشیا کپ فائنل کی تاریخ میں کسی بھی کھلاڑی کا سب سے بڑا انفرادی اسکور ہے۔ پاکستان نے پہلے بیٹنگ کرتے ہوئے 8 وکٹوں پر 347 رنز کا بھاری ہدف دیا۔

جواب میں بھارت کی مضبوط سمجھی جانے والی بیٹنگ لائن اپ بری طرح بکھر گئی اور پوری ٹیم محض 26.2 اوورز میں 156 رنز پر ڈھیر ہو گئی۔ فاسٹ بولر علی رضا نے 42 رنز دے کر 4 وکٹیں حاصل کرتے ہوئے بھارتی بیٹنگ کی کمر توڑ دی۔

یہ فتح پاکستان کے لیے بھرپور واپسی ثابت ہوئی، کیونکہ گروپ مرحلے میں اسی حریف کے ہاتھوں بھاری شکست کے بعد فائنل میں پاکستان کو ناقابلِ شکست بھارتی ٹیم کے مقابلے میں انڈرڈاگ سمجھا جا رہا تھا۔

تاہم فائنل میں پاکستان نے ہر شعبے میں کلینیکل کارکردگی دکھاتے ہوئے بھارت کو مکمل طور پر زیر کر لیا اور شاندار جشن کے ساتھ ٹرافی اٹھا لی۔

بھارتی کپتان آیوش مہاترے نے ٹاس جیت کر پہلے بولنگ کا فیصلہ کیا، غالباً اس امید پر کہ پچ ابتدائی طور پر فاسٹ بولرز کے لیے مددگار ثابت ہو گی، مگر یہ فیصلہ بری طرح الٹا پڑ گیا۔

سمیع منہاس نے آغاز سے ہی جارحانہ بیٹنگ کی۔ حمزہ ظہور 18 رنز بنا کر جلد آؤٹ ہو گئے، جس کے بعد سمیع نے عثمان خان 35 اور احمد حسین 56 کے ساتھ بالترتیب دوسری وکٹ کے لیے 92 اور تیسری وکٹ کے لیے 137 رنز کی شراکتیں قائم کر کے پاکستان کو مکمل کنٹرول دلا دیا۔

دائیں ہاتھ کے بلے باز سمیع نے 71 گیندوں پر سنچری مکمل کی اور 113 گیندوں پر 172 رنز تک پہنچے۔ ان کی اننگز میں 17 چوکے اور 9 چھکے شامل تھے۔ وہ 43ویں اوور میں دیپیش دیویندرن کی سلو گیند پر آؤٹ ہوئے۔

اختتامی اوورز میں 45 رنز کے اندر 5 وکٹیں گرنے سے پاکستان 400 رنز تک نہ پہنچ سکا، تاہم 347 رنز کا اسکور انڈر 19 ایشیا کپ فائنل کی تاریخ کا سب سے بڑا مجموعہ ثابت ہوا۔

بھارت کی جانب سے پٹیل 44 رنز دے کر 2 وکٹیں لے کر نمایاں رہے، جبکہ دیویندرن نے 83 رنز کے عوض 3 کھلاڑی آؤٹ کیے۔

348 رنز کے تعاقب میں بھارت نے تیز آغاز کیا اور علی رضا کے پہلے ہی اوور میں 21 رنز بنا لیے۔ ویبھو سوریا ونشی نے ایک اوور میں چھکا اور چوکا لگایا، جس میں نو بال اور اضافی رنز بھی شامل تھے۔

سوریا ونشی نے جارح مزاجی جاری رکھتے ہوئے 10 گیندوں پر 26 رنز کی تیز اننگز کھیلی، جس میں تین چھکے اور ایک چوکا شامل تھا۔

تاہم پیس بولنگ نے میچ کا رخ یکسر بدل دیا۔ کپتان مہاترے 2 رنز بنا کر مڈ آف پر کیچ آؤٹ ہوئے، ایرن جارج 9 گیندوں پر 16 رنز بنا کر پل شاٹ مس ٹائم کر گئے، جبکہ سوریا ونشی کیچ دے بیٹھے۔ یہ تینوں وکٹیں علی رضا اور محمد سیام کے حصے میں آئیں اور پانچویں اوور تک بھارت کا اسکور 49 رنز پر 3 وکٹیں ہو گیا۔

وکٹیں گرنے کا سلسلہ جاری رہا۔ ویہان ملہوترا 7 رنز بنا کر عبدالسبحان کی گیند پر بولڈ ہوئے، ویدانت ترویدی 9 رنز پر شارٹ مڈ وکٹ پر کیچ آؤٹ ہوئے، جبکہ ابھیگیان کنڈو 13 رنز بنا کر ڈیپ تھرڈ مین پر کیچ دے بیٹھے۔ کنشک چوہان 9 اور کھلن پٹیل 19 رنز کے ساتھ کچھ مزاحمت دکھا سکے، مگر مسلسل وکٹیں گرتی رہیں۔

نچلے نمبر پر دیپیش دیویندرن نے 16 گیندوں پر 36 رنز کی تیز اننگز کھیل کر کچھ دیر مقابلہ زندہ رکھا، جس میں چھ چوکے اور دو چھکے شامل تھے، تاہم علی رضا کی گیند پر پوائنٹ کی جانب اونچا شاٹ کھیلتے ہوئے ان کا آؤٹ ہونا بھارت کی آخری امیدوں کا بھی خاتمہ ثابت ہوا۔

عبدالسبحان نے 29 رنز دے کر 2 وکٹیں حاصل کیں جبکہ آف اسپنر حذیفہ احسن نے صرف 12 رنز کے عوض 2 کھلاڑی آؤٹ کیے۔ محمد سیام نے 38 رنز دے کر 2 وکٹیں لے کر بھرپور ساتھ دیا۔

بھارت کی پوری اننگز محض 26.2 اوورز میں اختتام پذیر ہو گئی، جو وقفے کے بعد پاکستان کی باؤلنگ برتری اور شاندار فیلڈنگ کا واضح ثبوت تھی۔

جیت کا مارجن انڈر 19 ایشیا کپ فائنلز کی تاریخ کا سب سے بڑا ثابت ہوا اور یوں پاکستان نے ایک مکمل اور فیصلہ کن فتح اپنے نام کی۔

میچ کے بہترین کھلاڑی سمیع منہاس کو ساتھی کھلاڑیوں نے کاندھوں پر اٹھا لیا اور پاکستان نے زبردست جشن منایا، جبکہ فائنل تک ناقابلِ شکست رہنے والی بھارتی ٹیم ایک ایسے دن پر افسوس کرتی رہ گئی جب اس کے لیے کچھ بھی ٹھیک ثابت نہ ہو سکا۔

تفصیلات کے مطابق پاکستان کرکٹ بورڈ(پی سی بی) کے چیئرمین محسن نقوی کے مطابق کرکٹ بورڈ نے مظفر آباد کرکٹ اسٹیڈیم میں پی ایس ایل میچز کروانے کا فیصلہ کیا ہے۔

مقبوضہ جموں و کشمیر میں بھارتی ریاستی تشدد کے برعکس آزاد کشمیر ترقی اور خوشحالی کی جانب گامزن ہے جہاں پاکستان سپر لیگ کے میچز منعقد کروانے کے لیے اقدامات بھی کیے جارہے ہیں۔

پی ایس ایل کے تاریخی لندن روڈ شو میں چیئرمین پی سی بی محسن نقوی نے کہا کہ مظفرآباد کرکٹ اسٹیڈیم کو بھی بہترین انداز میں تیار کرنے جا رہے ہیں۔

ان کا کہنا تھا کہ عالمی کھلاڑیوں کے لیے مظفر آباد میں اعلیٰ معیار کا فائیو اسٹار ہوٹل بھی موجود ہے جب کہ پی ایس ایل میچز کے ساتھ دیگر بین الاقوامی میچز بھی آزاد جموں و کشمیر میں کروائے جائیں گے۔

پاکستان کے خوش آئند اقدام نےثابت کردیا کہ امن، کھیل اور ترقی کشمیر کی اصل شناخت ہیں جب کہ مقبوضہ کشمیر میں بھارت کے ظلم و ستم کے برعکس پاکستان جنت نظیر وادی میں کھیل کے ذریعے امن کی تاریخ لکھ رہا ہے۔

آزاد جموں و کشمیر میں خوشگوار کھیلوں کی فضا واضح پیغام ہے کہ پاکستان ایک امن پسند ملک ہے جو ظلم و بربریت کے خلاف ہر لمحہ اپنے کشمیری بھائیوں کے ساتھ ہے۔

بابر اعظم لندن روڈ شو میں شرکت کے بعد آسٹریلیا روانہ ہوئے جہاں انھوں نے اپنی ٹیم سڈنی سکسرز کو جوائن کرلیا۔

قومی ون ڈے کپتان شاہین شاہ آفریدی نے بھی اپنی ٹیم برسبین ہیٹ کو جوائن کرلیا ہے جب کہ سابق کپتان محمد رضوان پہلے ہی میلبرن کی ٹیم کو جوائن کرچکے ہیں۔

پاکستان کے کئی کھلاڑی اس سال بگ بیش لیگ میں ایکشن میں نظر آئیں گے، لیگ کا آغاز 14 دسمبر سے ہوگا۔

یاد رہے کہ بگ بیش لیگ (بی بی ایل) کے لیے قومی کرکٹرز کو 14 دسمبر سے 28 جنوری تک این او سی جاری کیے گئے ہیں۔

پی سی بی کی جانب سے بابر اعظم ، محمد رضوان ، شاہین آفریدی ، حارث روف شاداب خان اور حسن علی کو این او سی جاری ہوئے ہیں۔

ذرائع کے مطابق ریکی ٹیم قذافی اسٹیڈیم این سی اے اور ایل سی سی اے گراونڈ کا بھی جائزہ لیا ریکی ٹیم کو پی سی بی اور سیکورٹی حکام نے بریفنگ بھی دی۔

اس سے قبل کمشنر لاہور مریم خان نے بھی سیکیورٹی انتظامات پر آسٹریلین ریکی ٹیم کو بریفنگ دی۔

آسٹریلیا ٹی20 ٹیم نے آئندہ ماہ کے آخر میں پاکستان کا دورہ کرنا ہے، پاکستان اور آسٹریلیا کے مابین تین ٹی 20 میچز کی سیریز شیڈولڈ ہے۔

واضح رہے کہ پاکستانی کھلاڑی بگ بیش لیگ میں شرکت کے لیے آسٹریلیا پہنچ گئے ہیں تاہم قومی کرکٹرز ٹیم میں منتخب ہونے کی صورت میں آسٹریلیا سے سری لنکا جائیں گے اور وہاں سے ہوم سیریز کے لیے وطن واپس آئیں گے۔

واضح رہے کہ پاکستان ٹیم کو سری لنکا کے خلاف 7، 9 اور 11 جنوری کو ٹی20 سیریز کھیلنا ہے جب کہ جنوری کے آخری میں ٹی 20 سیریز کے لیے آسٹریلیا نے پاکستان کا دورہ کرنا ہے۔

کرکٹ ویب سائٹ ’کرک انفو‘ کے مطابق بنگلہ دیش کے آل راؤنڈر شکیب الحسن نے انکشاف کیا ہے کہ جب اُن کی باؤلنگ ایکشن پر اعتراض کیا گیا اور پھر 2024 میں کاؤنٹی کلب سرے کے ساتھ سیزن کے بعد اُن پر پابندی عائد کی گئی، تو وہ تھوڑا بہت جان بوجھ کر غیرقانونی ایکشن کے ساتھ باؤلنگ کر رہے تھے۔

یاد رہے کہ گزشتہ سال دسمبر میں لوفبرا یونیورسٹی میں کیے گئے ٹیسٹ میں ان کے ایکشن کو غیر قانونی قرار دیا گیا تھا جس کے بعد شکیب پر ای سی بی کی جانب سے تمام مقابلوں میں باؤلنگ کرنے پر پابندی عائد کی گئی تھی۔

آئی سی سی کے قوانین کے مطابق، یہ پابندی خودبخود انٹرنیشنل کرکٹ میں بھی نافذ ہوگئی تھی۔

شکیب نے ایک پوڈکاسٹ میں گفتگو کرتے ہوئے کہا کہ میرے خیال میں میں تھوڑا بہت جان بوجھ کر ایسا کر رہا تھا کیونکہ میں نے ایک میچ میں 70 سے زیادہ اوورز باؤلنگ کی تھی۔

مزید کہا کہ میں نے اپنی ٹیسٹ کرکٹ میں کبھی 70 اوورز نہیں پھینکے، میں سرے کی جانب سے ٹاؤنٹن میں سمرسیٹ کے خلاف چار روزہ میچ کھیل رہا تھا، اور میں بہت تھک گیا تھا۔

بنگلہ دیش کے سابق کپتان نے کہا کہ میں سوچ رہا تھا امپائر مجھے وارننگ دیں گے لیکن انہوں نے قانون کے مطابق کام کیا، رپورٹ کیے جانے پر میں نے شکایت بھی نہیں کی اور پھر میں باؤلنگ ایکشن کے ٹیسٹ میں بھی فیل ہوا، پھر دوبارہ ٹیسٹ دیا اور وہ کلیئر ہوا۔

بنگلادیشی آل راؤنڈر نے اس میچ میں مجموعی طور پر 63.2 اوورز کرائے تھے جب کہ شکیب الحسن کو رواں برس کے آغاز میں تیسرے ٹیسٹ کے بعد بولنگ کے لیے کلیئر قرار دیا گیا۔

فرانسیسی خبر رساں ادارے ’اے ایف پی‘ کے مطابق میزبان ٹیم نے صرف 10 اوورز میں انتہائی چھوٹے ہدف 65 رنز کا تعاقب مکمل کرلیا، جس میں کپتان اسٹیو اسمتھ نے گس ایٹکنسن کو اسکور کرنے کے لیے اسکوائر لیگ کی جانب شاندار چھکا مارا۔

اگرچہ یہ پہلے ٹیسٹ میں پرتھ میں 2 روزہ شکست جتنی ذلت آمیز نہیں تھی، مگر انگلینڈ ہر شعبے میں مکمل طور پر پیچھے رہا۔

اسمتھ نے کہا کہ زبردست دن تھا، پہلے 2 دن کافی برابر تھے، کھیل اس وقت بدل گیا جب ہم نئی گیند کو لائٹس کے نیچے کھیلنے میں کامیاب ہوئے، یہ ہمارے لیے بہت اہم تھا۔

اسمتھ نے انگلش بالر جوفرا آچر کے ساتھ لفظی جھڑپ بھی کی، اور آسٹریلیا کو جیت کی راہ پر گامزن کیا۔

انہوں نے کہا کہ پِنک بال کے ساتھ کھیلنا تھوڑا مشکل ہو سکتا ہے، یہ بہت جلد بدلتی ہے اور آپ کو اپنے کھیل کو اس کے مطابق ڈھالنا پڑتا ہے۔

انگلینڈ کے لیے یہ مزید بدقسمتی تھی۔

ان کی بیٹنگ، سوائے جو روٹ اور زیک کروالی کے پہلی اننگز میں اور کپتان بین اسٹوکس اور ول جیکس کے دوسری اننگز میں، پرتھ کی طرح ہی لاپرواہ رہی۔

انہوں نے گابا کے اچھلی ہوئی پچ پر ناقص شاٹس کھیل کر وکٹیں دے دیں۔

بولنگ بھی خراب رہی۔

مزید برآں، انگلینڈ نے پہلے اننگز میں پانچ کیچز گرائے، جبکہ آسٹریلوی فیلڈرز نے ہر گیند پکڑی۔

جوش انگلس کی اسٹوکس کو پہلی اننگز میں رن آؤٹ کرنے کی شاندار کارکردگی نے میچ کا رخ بدل دیا۔

اب آسٹریلیا کے پاس ایشز برقرار رکھنے کے لیے زبردست امکانات ہیں، جبکہ اگلے میچ ایڈیلیڈ، میلبرن اور سڈنی میں ہونے والے ہیں۔

اسٹوکس نے کہا کہ ظاہر ہے، بہت مایوس کن ہے، میرا خیال ہے کہ زیادہ تر یہ اس وجہ سے ہوا کہ ہم اس کھیل کے دباؤ اور اس فارمیٹ میں کھڑے نہیں ہو سکے جب کھیل اہم تھا۔

انگلینڈ کھیل میں پیچھے تھا، جب انہوں نے آسٹریلیا کی ٹیل کی مدد سے میزبان ٹیم کو 511 رنز بنانے دیے، یعنی مجموعی طور پر 177 رنز کی برتری حاصل ہوئی تھی۔

اس کے بعد انہوں نے لائٹس آن ہونے پر 6 وکٹیں گنوا دیں اور تیسرے دن کے اختتام پر 6-134 پر پہنچ گئے تھے، پھر بھی آسٹریلیا کے کل اسکور سے 43 رنز پیچھے تھے۔

جبکہ بہت سے لوگوں نے اتوار کو توقع کی تھی کہ انگلینڈ آسانی سے ہار مان لے گا، اسٹوکس اور آل راؤنڈر جیکس نے مزاحمت کی اور یقینی بنایا کہ آسٹریلیا کو دوبارہ بیٹنگ کرنی پڑے۔

اسٹوکس اور جیکس نے شدید گرم دن میں آسٹریلوی پیس اٹیک کا مقابلہ کیا اور ابتدائی ہدف سے آگے بڑھ کر آسٹریلیا کے لیے کچھ تعاقب چھوڑا۔

انگلینڈ کے بیٹنگ کوچ مارکس ٹریسکوٹھک نے کہا کہ ہفتے کے دن ان کے بلے باز اپنی جارحانہ پالیسی بدلیں گے نہیں، چاہے کئی وکٹیں ضائع ہوں۔

لیکن اسٹوکس اور جیکس نے اتوار کے پہلے سیشن میں صبر کا مظاہرہ کیا۔

انہوں نے غیر ضروری گیندیں چھوڑ دیں اور بڑے شاٹس کے بجائے سنگلز لے کر رنز جمع کیے۔

انہوں نے پہلے گھنٹے میں صرف 28 رنز بنائے اور 96 منٹ میں 43 رنز کی کمی کو عبور کیا، اور دو گھنٹے میں صرف 59 رنز بنائے۔

آسٹریلوی بولرز، جو پِنک بال کے ساتھ ہفتے کو روشنیوں میں راج کر رہے تھے، اتوار کو زیادہ مؤثر نہیں رہے، حالانکہ وکٹ نے کھیل میں چالیں دکھائیں۔

انگلش کھلاڑیوں نے صرف ایک موقع دیا، جب اسکاٹ بولینڈ نے اسٹوکس کو بال کھائی، جس پر وہ سلپس پر ایج دے بیٹھے۔

دوسرے سیشن میں آسٹریلوی کھلاڑیوں کو کافی حد تک پریشان کرتے رہے، یہاں تک کہ ڈرنکس بریک سے قبل جیکس نے مائیکل نیزر کو ایج دیا اور اسمتھ نے زبردست کیچ پکڑا، پوری لمبائی سے دائیں جانب چھلانگ لگا کر گیند زمین کے قریب پکڑی۔

نیزر نے اگلے اوور میں دوبارہ اسٹوکس کو آؤٹ کیا، جس سے انگلینڈ کا اسکور 227-8 ہوا، یعنی 50 رنز کی برتری۔

ایٹکنسن، بریڈن کارس اور آچر نے واقعی مزاحمت نہیں کی، جبکہ نیزر نے کیریئر بیسٹ 5-42 ریکارڈ کیا اور اسمتھ نے 210 آؤٹ فیلڈ کیچز کے ساتھ راہول دریوڈ کے برابر ہو گئے، جو موجودہ ریکارڈ ہولڈر روٹ سے 3 کیچ کی کمی پر ہیں۔

65 رنز کبھی کافی نہیں تھے، اور اگرچہ آسٹریلیا نے ٹریوس ہیڈ اور مارنس لیبوشاگنے کھو دیے، اسمتھ اور جیک ویٹیرالڈ نے میزبان ٹیم کو شاندار انداز میں آسان جیت دلائی۔

اسمتھ نے کہا کہ آج ان کی پارٹنرشپ واقعی شاندار تھی، جیکس اور اسٹوکس، اور آپ کبھی نہیں جانتے اسٹوکس کریز پر موجود ہوں تو کیا ہو سکتا ہے۔

قذافی سٹیڈیم لاہور میں کھیلے گئے 5 روزہ فائنل میں کراچی بلیوز نے سیالکوٹ کو جیت کے لیے 533 رنز کا ہدف دیا تھا، سیالکوٹ کی ٹیم ہدف کے تعاقب میں 314 رنز بناکر آل آؤٹ ہوگئی۔

کراچی بلوز نے 10 ویں مرتبہ یہ ٹورنامنٹ جیتا ہے جب کہ کراچی کی کسی ٹیم نے 22 ویں مرتبہ یہ ٹورنامنٹ اپنے نام کیا ہے۔
سیالکوٹ نے آخری دن بغیر کسی نقصان کے 12 رنز پر اننگز شروع کی تو اسے جیت کے لیے مزید 521 رنز درکار تھے، 35 کے مجموعی اسکور پر پہلی وکٹ گری جب ثاقب خان نے اذان اویس کو 11 رنز پر ایل بی ڈبلیو کر دیا۔

محمد ہریرہ 39 رنز بنا کر محمد عمر کی گیند پر سعد بیگ کے ہاتھوں کیچ ہوئے تو مجموعی اسکور 81 رنز تھا، عبدالرحمٰن کو 18 کے انفرادی اسکور پر رمیز عزیز نے عبداللہ فضل کے ہاتھوں کیچ کرا دیا تو سیالکوٹ کا اسکور اُس وقت 3 وکٹوں کے نقصان پر 121 رنز تھا۔

سیالکوٹ کی مشکلات اس وقت بڑھ گئیں جب اسکور 144 تک آتے آتے محسن ریاض 6 اور عبداللہ شفیق 59 رنز بنا کر آؤٹ ہوگئے، دونوں کی وکٹیں ثاقب خان نے حاصل کیں۔

افضال منظور جارحانہ بیٹنگ کرتے ہوئے13 چوکوں کی مدد سے63 رنز بناکر رمیز عزیز کی گیند پر آؤٹ ہوئے انہوں نے حمزہ نذر کے ساتھ چھٹی وکٹ کی شراکت میں 112 رنز کا اضافہ کیا، حمزہ نذر 9 چوکوں کی مدد سے 56 رنز بناکر مشتاق احمد کی گیند پر سعد بیگ کے ہاتھوں کیچ ہوئے۔

سیالکوٹ کی ساتویں وکٹ281 رنز پر گری، حسن علی کی 25 رنز کی اننگز کا خاتمہ بھی مشتاق احمد نے 304کے مجموعی سکور پر کیا، سیالکوٹ کی نویں وکٹ 310 کے سکور پر گری جب ثاقب خان نے محمد علی کو6 رنز پر سعد بیگ کے ہاتھوں کیچ کرادیا۔

ثاقب خان نے اننگز کی پانچویں وکٹ حسنین کو صفر پر بولڈ کرکے حاصل کی انہوں نے 86 رنز دے کر 5 وکٹیں حاصل کیں، انہوں نے پہلی اننگز میں بھی 4 وکٹیں حاصل کی تھیں، ثاقب خان نے قائداعظم ٹرافی کا اختتام 47 وکٹوں پر کیا۔
پلیئر آف دی میچ ایوارڈ پہلی اننگز میں 88 اور دوسری اننگز میں 114رنز بنانے والے عبداللہ فضل نے حاصل کیا، جب کہ چیئرمین پی سی بی محسن نقوی نے کامیاب ٹیم اور کھلاڑیوں میں انعامات تقسیم کیے۔

آئی سی سی کے جاری کردہ اعلامیے کے مطابق فخر زمان کو ٹرائی نیشن سیریز کے فائنل مقابلے میں کوڈ آف کنڈکٹ کے لیول ون کی خلاف ورزی کا مرتکب قرار دیا گیا۔

کونسل کے مطابق فخر زمان نے سری لنکا کے خلاف سہ فریقی سیریز کے فائنل میچ میں آؤٹ قرار دینے پر امپائر کے ساتھ بحث کی تھی، جس کی وجہ سے ان پر جرمانہ عائد کیا گیا اور ساتھ ہی ایک ڈی میرٹ پوائنٹ بھی دیا گیا۔

آئی سی سی اعلامیے میں مزید بتایا گیا کہ فخر زمان نے اپنے غلطی تسلیم کر لی ہے لہذا باقاعدہ سماعت کی ضرورت پیش نہیں آئی۔

واضح رہے کہ پاکستان نے ٹرائی نیشن سیریز کے فائنل میں سری لنکا کو بآسانی 6 وکٹوں سے شکست دے کر ٹرافی اپنے نام کی تھی۔

راولپنڈی کرکٹ اسٹیڈیم میں کھیلے گئے فائنل مقابلے میں پاکستان نے سری لنکا کا 115 رنز کا ہدف بآسانی 4 وکٹوں کے نقصان پر حاصل کیا، بابر اعظم کی 34 گیندوں پر 37 رنز کی زمہ دارانہ اننگز ، شاہین شاہ آفریدی اور محمد نواز کی 3،3 وکٹوں نے پاکستان کی جیت میں اہم کردار ادا کیا تھا۔

امریکی شہر نیو یارک میں پاکستان سپر لیگ (پی ایس ایل) کا روڈ شو آئندہ ہفتے کے اختتام پر ہونے کا امکان ہے، نیو یارک میں پی ایس ایل روڈ شو میں قومی ٹی20 کپتان سلمان علی آغا، ٹیسٹ کپتان شان مسعود اور سعود شکیل شرکت کریں گے۔

اس سے قبل، پاکستان کرکٹ بورڈ (پی سی بی) کی جانب سے لندن میں پی ایس ایل روڈ شو کروانے کا اعلان کیا تھا جو 7 دسمبر کو لارڈز کرکٹ گراؤنڈ میں ہوگا۔

لندن روڈ شو میں پی ایس ایل اور پی سی بی کے اعلی عہدیداران شریک ہوں گے جب کہ لندن روڈ شو میں سابق کپتان بابر اعظم، صاحبزادہ فرحان اور حارث روف شرکت کر رہے ہیں۔

پی ایس ایل کی مقبولیت میں بے پناہ اضافے کے بعد دو نئی ٹیموں بیچنے کی تیاریاں تیز ہو گئیں ہیں، نئی ٹیموں میں برطانوی سرمایہ کاروں کی گہری دلچسپی لے رہے ہیں، روڈ شوز میں عالمی سرمایہ کار، کمرشل پارٹنرز اور شائقین کی شرکت متوقع ہے۔

اس حوالے سے چیئرمین پی سی بی محسن نقوی کا کہنا تھا کہ لندن روڈ شو کا مقصد لیگ کا وژن، کمرشل ماڈل اور مستقبل کی حکمتِ عملی کی ترویج ہے، لارڈز میں روڈ شو پاکستان کرکٹ کی عالمی شناخت کا ثبوت ہے۔

انہوں نے کہا کہ لندن کا روڈ شو ایچ بی ایل پی ایس ایل کی بین الاقوامی اپیل کو مزید فروغ دے گا۔

دوسری جانب، پی ایس ایل کے سی ای او سلمان نصیر کا کہنا تھا کہ پاکستانی لیگ عالمی فالوونگ اور مضبوط کمرشل ویلیو رکھتی ہے، دو نئی ٹیموں کے اضافے سے سرمایہ کاروں کے لیے بڑے مواقع پیدا ہوں گے۔

تاریخی ایشنز سریز کا دوسرا ٹیسٹ میچ بریسبن میں جاری ہے، جہاں مچل اسٹارک نے ایک بار پھر اپنی باؤلنگ سے حریف ٹیم کو سخت دباؤ میں ڈال دیا ہے، لیفٹ آرم باؤلر نے نہ صرف پہلی اننگز میں 71 رنز کے عوض 6 وکٹیں اپنے نام کر لی ہیں بلکہ تیسری وکٹ حاصل کرنے کے بعد انہوں نے لیجنڈری باؤلر وسیم اکرم کا ریکارڈ توڑ کر اپنے نام کر لیا ہے۔

مچل اسٹارک نے ہیری بروک کو 31 رنز پر آؤٹ کرنے کے بعد ٹیسٹ میں سب سے زیادہ وکٹیں لینے والے لیفٹ آرم فاسٹ باؤلر بننے کا اعزاز اپنے نام کیا۔

واضح رہے کہ سابق پاکستانی فاسٹ باؤلر وسیم اکرم نے 104 ٹیسٹ میچز میں 414 ٹیسٹ وکٹیں اپنے نام کیں تھیں جب کہ مچل اسٹارک نے 101 ٹیسٹ میچز میں اس ریکارڈ کو توڑ دیا ہے۔

بائیں ہاتھ سے فاسٹ باؤلنگ کرنے والے دیگر باؤلرز میں چمندا واس 355 وکٹوں کے ساتھ تیسرے نمبر پر موجود ہیں، ٹرینٹ بولٹ 317 کے ساتھ چوتھے جب کہ مچل جانسن 313 وکٹوں کے ساتھ پانچویں نمبر پر براجمان ہیں۔

خبر رساں ادارے ’اے ایف پی‘ کے مطابق بھارت کے قائم مقام کپتان کے ایل راہول نے تسلیم کیا کہ وہ اس ناقابلِ فہم بدقسمتی پر حیران ہیں، جو 2023 ورلڈ کپ فائنل (احمد آباد) سے شروع ہوئی تھی، جب روہت شرما ٹیم کی قیادت کر رہے تھے۔

3 دسمبر کو جنوبی افریقہ کے خلاف رائے پور میں دوسرے ون ڈے میں ایک بار پھر ٹاس ہارنے کے بعد راہول نے کہا کہ میں پریکٹس کر رہا تھا لیکن صاف ظاہر ہے کہ وہ پریکٹس کام نہیں آئی۔

20 ٹاس مسلسل ہارنے کے امکانات 10 لاکھ میں سے ایک سے بھی کم ہیں، ایک ایسا شماریاتی اتفاق جس کا خاتمہ راہول 6 دسمبر کو ویزاگ میں ہونے والے تیسرے ون ڈے میں کرنا چاہتے ہیں۔

کے ایل راہول نے کہا کہ ایمانداری سے کہوں تو مجھے سب سے زیادہ دباؤ اسی چیز کا ہے کیونکہ ہم بہت عرصے سے ٹاس نہیں جیتے، انہوں نے یہ بات اُس وقت کی جب دوسری جانب پروٹیز کپتان ٹیمبا باووما نے ایک بار پھر درست کال کر کے ٹاس جیت لیا تھا۔

تین بھارتی کپتانوں روہت شرما، مستقل ون ڈے کپتان شبھمن گل اور کے ایل راہول، سب 15 نومبر 2023 کو ممبئی میں نیوزی لینڈ کے خلاف ورلڈ کپ سیمی فائنل کے بعد سے ایک بھی ٹاس نہیں جیت سکے، نیوزی لینڈ کے خلاف اُس ٹاس کے بعد سے بھارت کے ہاتھ ناکامی ہی آئی ہے۔

بیٹنگ لیجنڈ سنیل گواسکر نے جیو اسٹار سے گفتگو کرتے ہوئے کہا کہ راہول کہہ رہے تھے کہ وہ پریکٹس کر رہے ہیں، لیکن آپ کو کیسے پتا کہ مخالف کپتان کیا کال کرے گا ؟

انہوں نے مزید کہا کہ پہلے میچ میں ایڈن مارکرم کپتان تھا، ممکن ہے مارکرم ‘ہیڈز’ پسند کرتا ہو اور ٹیمبا باووما ‘ٹیلز’ کو ترجیح دیتا ہو۔

سابق جنوبی افریقی فاسٹ باؤلر ڈیل اسٹین نے بتایا کہ فاف ڈو پلیسی نے ایک بار طویل ہار کے سلسلے کے بعد ٹمبا باووما سے کہا تھا کہ وہ اس کی جگہ ٹاس کرے۔

ڈیل اسٹین نے کہا کہ میں نے پہلی بار دیکھا تھا کہ ایک کپتان کسی اور کھلاڑی سے ٹاس کروا رہا تھا تاہم ٹیمبا باووما وہ ٹاس بھی ہار گیا تھا۔

رائے پور میں کھیلے گئے دوسرے ایک روزہ میچ میں پروٹیز نے 358 رنز کے بڑے ہدف کا کامیابی سے تعاقب کیا اور 6 وکٹوں کے نقصان پر 4 گیندیں قبل ہی فتح اپنے نام کر لی۔

مہمان ٹیم کی جانب سے ایڈن مارکرم نے شاندار 110 رنز کی اننگز کھیل کر بڑے ٹارگٹ کو آسانی سے حاصل کرنے میں مدد فراہم کی، میتھیو بریٹزکے 68 اور ڈیوالڈ برویس 54 رنز بنا کر نمایاں رہے، کپتان ٹمبا باووما 46 رنز بنا کر پویلین لوٹے۔

بھارت کی طرف سے پریساد کرشنا اور ارشدیپ سنگھ نے 2،2، ہرشیت رانا نے ایک وکٹ اپنے نام کی۔

اس سے قبل بھارت نے پہلے بیٹنگ کرتے ہوئے اسٹار بیٹر ویرات کوہلی اور رتوراج گایئکواڈ کی شاندار سنچریوں کی بدولت 358 رنز کا بڑا مجموعہ اسکور بورڈ پر سجایا، کپتان کے ایل راہول 66 بنا کر آؤٹ ہوئے۔

جنوبی افریقہ کی جانب سے مارکو یانس نے 2 اور لنگی نگیڈی اور نیدرے برجر نے ایک، ایک وکٹ اپنے نام کی۔

واضح رہے کہ بھارت نے ویرات کوہلی کی ریکارڈ 52ویں ایک روزہ سنچری کی بدولت جنوبی افریقہ کو پہلے مقابلے میں 17 رنز سے شکست دی تھی۔

ذرائع کے مطابق پاکستان کرکٹ بورڈ (پی سی بی) نے جن کھلاڑیوں کو این او سی دیا ہے ان کو نیشنل ڈیوٹی سے متعلق تیار رہنے کا بھی کہہ دیا گیا ہے۔

ذرائع نے بتایا کہ ہے کہ سری لنکا اور آسٹریلیا کے ساتھ شیڈول ٹی20 سیریز کے لیے قومی اسکواڈ میں منتخب ہونے کی صورت میں کرکٹرز کو لیگ چھوڑنا پڑے گی۔

یاد رہے کہ بگ بیش لیگ (بی بی ایل) کے لیے قومی کرکٹرز کو 14 دسمبر سے 28 جنوری تک این او سی جاری کیے گئے ہیں۔

پی سی بی کی جانب سے بابر اعظم ، محمد رضوان ، شاہین آفریدی ، حارث روف شاداب خان اور حسن علی کو این او سی جاری ہوئے ہیں۔

دوسری جانب فخر زمان، نسیم شاہ اور حسن نواز کو آئی ایل ٹی ٹوئنٹی کے لیے 4 جنوری تک این او سی جاری کیا گیا ہے۔

اس دوران پاکستان ٹیم کو سری لنکا کے خلاف 7، 9 اور 11 جنوری کو ٹی20 سیریز کھیلنا ہے جب کہ جنوری کے آخری میں ٹی 20 سیریز کے لیے آسٹریلیا نے پاکستان کا دورہ کرنا ہے۔

قومی کرکٹرز ٹیم میں منتخب ہونے کی صورت میں آسٹریلیا سے سری لنکا جائیں گے اور وہاں سے ہوم سیریز کے لیے وطن واپس آئیں گے۔

آئی سی سی کی تازہ رینکنگ میں بھارت کے ویرات کوہلی نے ترقی کرتے ہوئے ون ڈے بیٹرز رینکنگ میں اپنی پوزیشن بہتر بنالی ہے، جب کہ پاکستان کے صائم ایوب ایک بار پھر ٹی20 کے نمبر ون آل راؤنڈر بن گئے ہیں۔

جنوبی افریقہ کے خلاف رانچی میں 135 رنز کی شاندار اننگز کے بعد کوہلی ایک درجہ ترقی پا کر چوتھے نمبر پر آ گئے اور اب وہ نمبر ون روہت شرما سے صرف 32 پوائنٹس کے فاصلے پر ہیں۔

ون ڈے انٹرنیشنل میں روہت شرما بدستور پہلے، نیوزی لینڈ کے ڈیرل مچل دوسرے اور افغانستان کے ابراہیم زدران تیسرے نمبر پر موجود ہیں۔

ٹی20 میں پاکستان کے صائم ایوب نے سری لنکا کے خلاف ٹرائی سیریز فائنل میں آل راؤنڈ کارکردگی دکھا کر دوبارہ پہلی پوزیشن حاصل کرلی، فائنل میں 36 رنز اور ایک اہم وکٹ نے ان کی رینکنگ میں اہم کردار ادا کیا۔

صائم ایوب 294 ریٹنگ پوائنٹس کے ساتھ پہلے نمبر پر پہنچ گئے، صائم ایوب نے سکندر رضا سے پہلی پوزیشن چھین لی جب کہ ٹی 20 آل راؤنڈر رینکنگ میں محمد نواز چوتھے نمبر پر آگئے۔

باؤلر رینکنگ میں پاکستان کے ابرار احمد 4 درجے ترقی کے ساتھ ٹی20 باؤلرز رینکنگ میں چوتھے جب کہ محمد نواز 11ویں نمبر پر پہنچ گئے ہیں۔

جنوبی افریقہ کے مارکو یانسن ٹیسٹ بولرز میں پانچویں اور آل راؤنڈرز میں دوسرے نمبر پر آ گئے ہیں، جب کہ سائمن ہارمر نے 13 درجے ترقی کے بعد 11ویں پوزیشن حاصل کرلی ہے۔

پی سی بی کے اعلامیے میں بتایا گیا کہ پاکستان سپر لیگ کے روڈ شو میں عالمی سرمایہ کار، کمرشل پارٹنرز اور شائقین کی شرکت متوقع ہے۔

بیان میں کہا گیا کہ پی ایس ایل دنیا کی تیزی سے بڑھتی ہوئی ٹی 20 لیگز میں شامل ہے، لیگ کی 2 نئی ٹیموں بیچنے کی تیاریاں بھی جاری ہیں جس میں شامل ہونے والی 2 نئی ٹیموں میں برطانوی سرمایہ کاروں نے بھی گہری دلچسپی دکھائی ہے۔

پی سی بی کے مطابق لندن روڈ شو کا مقصد لیگ کا وژن، کمرشل ماڈل اور مستقبل کی حکمتِ عملی کی ترویج ہے۔

چیئرمین پی سی بی محسن نقوی نے اس حوالے سے کہا کہ لارڈز میں روڈ شو پاکستان کرکٹ کی عالمی شناخت کا ثبوت ہے، جو پی ایس ایل کی بین الاقوامی اپیل کو مزید فروغ دے گا۔

چیف آپریٹنگ آفیسر (سی ای او) پی ایس ایل سلمان نصیر کا کہنا تھا کہ پاکستانی لیگ عالمی فالوونگ اور مضبوط کمرشل ویلیو رکھتی ہے، 2 نئی ٹیموں کے اضافے سے سرمایہ کاروں کے لیے بڑے مواقع پیدا ہوں گے، پی ایس ایل روڈ شو میں کاروباری شخصیات، ممکنہ فرنچائز مالکان اور شائقین کی بڑی تعداد شریک ہوگی۔

اعلامیے میں کہا گیا کہ لندن روڈ شو کے لیے 30 سپر فینز کو ایونٹ میں شرکت کا خصوصی موقع دیا جائے گا جب کہ میگا ایونٹ کی ٹکٹس حاصل کرنے کی تفصیلات جلد جاری کی جائیں گی۔

تفصیلات کے مطابق 50 اوورز پر مشتمل 8 ٹیموں کا ٹورنامنٹ 12 سے 21 دسمبر تک دبئی میں منعقد ہوگا۔

پاکستان کو گروپ ‘اے’ میں رکھا گیا ہے جہاں اُس کے ساتھ بھارت کے علاوہ کوالیفائر ون اور کوالیفائر تھری شامل ہیں، جب کہ گروپ ‘بی’ میں افغانستان، بنگلہ دیش کے علاوہ کوالیفائر 2 اور سری لنکا شامل ہیں۔

پی سی بی کے مطابق 8 ٹیموں پر مشتمل یہ ٹورنامنٹ پاکستان انڈر 19 ٹیم کو آئی سی سی انڈر 19 ورلڈ کپ کی تیاریوں کا بہترین موقع فراہم کرے گا، جو 15 جنوری سے 6 فروری 2026 تک زمبابوے اور نمیبیا میں منعقد ہوگا۔”

گزشتہ ایڈیشن میں پاکستان نے سیمی فائنل تک رسائی حاصل کی تھی جہاں انہیں بنگلہ دیش نے ٹورنامنٹ سے باہر کردیا تھا۔

پاکستان اپنا افتتاحی میچ 12 دسمبر کو کوالیفائر 3 کے خلاف دی سیونز اسٹیڈیم دبئی میں کھیلے گا جب کہ دوسرا گروپ میچ 14 دسمبر کو آئی سی سی اکیڈمی گراؤنڈ دبئی میں بھارت کے خلاف ہوگا۔

آخری گروپ میچ 16 دسمبر کو اسی مقام پر کوالیفائر ون کے خلاف شیڈول ہے جب کہ سیمی فائنلز تین دن بعد منعقد ہوں گے اور فائنل 21 دسمبر کو کھیلا جائے گا۔

قومی اسکواڈ:

فاران یوسف (کپتان)، عثمان خان (نائب کپتان)، عبدالسبحان، احمد حسین، علی حسن بلوچ، علی رضا، دانیال علی خان، حمزہ ظہور، حذیفہ احسن، مومن قمر، محمد حذیفہ، محمد صیّام، محمد شایان، نقاب شفیق، سمیر منہاس اسکواڈ کا حصہ ہیں۔

پشاور زلمی اور زلمی فاؤنڈیشن کا یو فون ، یو این ویمن اور حکومتِ خیبر پختونخوا کے اشتراک سے زلمی ویمن لیگ سیزن ٹو پشاورمیں انعقاد کیا گیا۔

زلمی ویمن کرکٹ لیگ سیزن ون کی شاندار کامیابی کے بعد سیزن ٹو کا اختتام ہزارہ کی شاندار جیت سے ہوا۔

حیات آباد اسپورٹس کمپلیکس پشاور میں کھیلے گئے فائنل میں پشاور نے پہلے بیٹنگ کرتے ہوئے 3 وکٹوں پر 59 رنز بنائے جس کے جواب میں ہزارہ نے مطلوبہ ہدف آسانی سے 3 وکٹوں پر حاصل کرلیا۔

ہزارہ کی طرف سے ماہ نور قیوم نے 28 رنز بناکر جیت میں اہم کردار ادا کیا۔

فائنل کے موقع پر زلمی سپر اسٹار محمد حارث ، پاکستان ٹیسٹ اسٹار ساجد خان ، ڈپٹی کنٹری ریپرزنٹیٹو یو این ویمن پاکستان جیکی کیتونتی, یو این ایف پی اے ڈاکٹر ڈاکٹر لوئے شبانہ، سیکرٹری اسپورٹس تاشفین، سیکرٹری ایجوکیشن کامران آفریدی ،پشاور زلمی کے چیف آپریٹنگ آفیسر میاں عباس لائق موجود تھے۔

اس سے قبل، کھیلے گئے پہلے سیمی فائنل میں ہزارہ ڈیفوڈلز نے پشاور تھنڈر بولٹس کو 23 رنز سے ہرایا تھا، ہزارہ نے پہلے کھیلتے بغیر بغیر کسی نقصان کے 77 رنز بنائے، جواب میں پشاور کی ٹیم 3 وکٹوں پر 54 رنز بناکر بناسکی جب کہ دوسرے سیمی فائنل پشاور آل اسٹارز نے مالاکنڈ کو شکست دی تھی۔

کرکٹ ویب سائٹ ’کرک انفو‘ کے مطابق عثمان خواجہ پرتھ میں کھیلے گئے پہلے میچ میں ہونے والے کمر کی انجری سے مکمل نجات حاصل نہ کرسکے، خواجہ نے انجری کے بعد پہلی مرتبہ منگل کے روز 30 منٹ کے نیٹ سیشن میں بیٹنگ کی، تاہم وہ ٹیم میں اپنی جگہ برقرار رکھنے کے قابل نہیں ہو پائے۔

عثمان خواجہ کی غیر موجودگی سے ٹریوس ہیڈ کے لیے اوپننگ رول جاری رکھنے کے دروازے کھل گئے ہیں، انہوں نے پرتھ میں دوسری اننگز میں 83 گیندوں پر 123 رنز کی شاندار اننگز کھیل کر جیت میں اہم کردار ادا کیا تھا۔

عثمان خواجہ کی غیر موجودگی میں جوش انگلس اور بیو ویبسٹر اسکواڈ میں اضافی بیٹنگ آپشنز ہیں۔

تاہم، پرتھ کے بعد ٹرویس ہیڈ یہ واضح کر چکے ہیں کہ وہ مستقل طور پر اوپننگ کرنے کے لیے تیار ہیں، تاہم اب بھی یہ بحث جاری ہے کہ وہ نمبر 5 پر زیادہ قیمتی ہیں۔

ایشز سیریز سے قبل بھی عثمان خواجہ کی فارم زیرِ بحث تھیم وہ 2023 ایشیز کے اختتام کے بعد سے وہ 31.84 کی اوسط رکھتے ہیں اور 45 اننگز میں صرف ایک سنچری اسکور کر سکے ہیں۔

دوسری جانب، ہیڈ کے بطور اوپنر شاندار کارکردگی اور اس کردار کے لیے ان کی دلچسپی نے یہ بحث چھیڑ دی ہے کہ کیا اب خواجہ کے ٹیسٹ کیریئر کے اختتام پر غور کرنے کا وقت آگیا ہے؟

اگر ہیڈ دوبارہ اوپننگ کرتے ہیں اور کامیاب رہتے ہیں، اور جو بھی کھلاڑی خواجہ کی جگہ الیون میں شامل ہوگا وہ بھی اچھا پرفارم کرے، تو خواجہ کی واپسی بہت مشکل ہو سکتی ہے۔

ادھر انگلش ٹیم سے بھی مارک ووڈ انجری کی وجہ سے دوسرے ٹیسٹ میچ سے باہر ہوگئے ہیں۔

واضح رہے کہ ایشز سیریز میں آسٹریلیا کو 0-1 کی برتری حاصل ہے، دونوں ٹیموں کے درمیان ایشز سیریز کا دوسرا ٹیسٹ 4 دسمبر سے ایڈیلیڈ میں شروع ہوگا۔

آسٹریلیا نے پیر کو نیشنل کرکٹ اسٹیڈیم میں کھیلے گئے فائنل میں پاکستان کو 7 وکٹوں سے شکست دے کر آئی ایم سی اوور 40 ٹی ٹوئنٹی کرکٹ ورلڈ کپ 2025 کا ٹائٹل اپنے نام کر لیا۔

نیشنل اسٹیڈیم کراچی میں کھیلے گئے فائنل میں آسٹریلیا نے یکطرفہ مقابلے کے بعد کامیابی حاصل کی۔

151 رنز کے ہدف کے تعاقب میں آسٹریلیا کے اسٹیو ناٹل نے 40 گیندوں پر 47 رنز اسکور کیے، جب کہ اسٹیون پالسن نے 34 گیندوں پر 42 قیمتی رنز جوڑے جب کہ میچ کے آخری لمحات میں ناصر جلیل نے صرف 10 گیندوں پر 25 رنز کی جارحانہ اننگز کھیل کر آسٹریلیا کی فتح یقینی بنا دی۔

پاکستان کی جانب سے فواد عالم نے بہترین بولنگ کا مظاہرہ کرتے ہوئے 16 رنز کے عوض 2 وکٹیں حاصل کیں، لیکن وہ ٹیم کو فتح دلانے میں کامیاب نہ ہو سکے۔

اس سے قبل پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں پر 150 رنز اسکور کیے۔

تاہم، آسٹریلیا کے مارک کلیری نے شاندار بولنگ کرتے ہوئے 22 رنز کے عوض 5 وکٹیں حاصل کیں اور پاکستان کو کھل کر کھیلنے نہ دیا۔

پاکستان کی جانب سے ندیم جاوید (24)، فواد عالم (24) اور عبدالرزاق (19) نے مفید اننگز کھیلیں، مگر پوری ٹیم 20 اوورز میں 150 رنز بنا سکی۔

آئی ایم سی اوور 40 ٹی ٹوئنٹی کرکٹ ورلڈ کپ 2025 میں 12 بین الاقوامی ٹیموں نے حصہ لیا، جب کہ مجموعی طور پر 42 میچز کراچی کے مختلف مقامات پر منعقد ہوئے۔

رپورٹ کے مطابق کپلن ڈوریگا نے 25 اگست کی رات تقریباً ڈھائی بجے ہوٹل واپسی پر سینٹ ہیلیئر میں ہلیری اسٹریٹ پر ایک خاتون کو دیکھا اور اس پر اچانک حملہ کرکے اس سے موبائل فون چھین لیا۔

پولیس نے خاتون کو فوری طور پر بچا لیا تھا، خاتون نے پولیس کو بتایا کہ کسی نے اسے گھونسہ مار کر زمین پر گرا دیا اور اس کا موبائل فون چھین لیا۔

واقعہ پیش آنے کے فوراََ بعد ہی کرکٹر کو گرفتار کر لیا تھا اور اگلے ہی روز ان کے خلاف ڈکیتی کے الزام میں باقاعدہ مقدمہ درج کرلیا گیا تھا ۔

اس کے اگلے روز اسے باضابطہ طور پر ڈکیتی کے الزام میں چارج کیا گیا اور وہ 27 اگست کو جرسی کی مجسٹریٹ کورٹ میں پیش ہوا، جہاں اس نے جرم کا اعتراف کیا۔

عدالتی کارروائی مکمل ہونے کے بعد رائل کورٹ آف جرسی نے اس کی ضمانت کی درخواست مسترد کر دی اور اسے 3 سال قید کی سزا سنا دی۔

رانچی میں کھیلے گئے پہلے ایک روزہ میچ میں ویرات کوہلی نے شاندار 120 گیندوں پر 135 رنز بنائے اور روہت شرما کے ساتھ دوسری وکٹ کی شراکت میں 136 رنز جوڑ کر بھارت کا 8 وکٹوں کے نقصان پر مجموعہ 349 تک پہنچایا۔

جنوبی افریقہ کی جانب سے کاربن بوش نے شاندار مزاحمت کرتے ہوئے 51 گیندوں پر 67 رنز بنائے اور آخری لمحوں تک مقابلہ جاری رکھا، 50ویں اوور میں جنوبی افریقہ کو جیت کے لیے 18 رنز درکار تھے جبکہ ایک وکٹ باقی تھی، اس دوران کاربن بوش دوسری گیند پر آؤٹ ہوگئے اور پوری ٹیم 332 رنز پرہمت ہار گئی۔

متھیو بریٹزکے 72 اور مارکو یانسن 70 نے چھٹی وکٹ کی شراکت میں 97 رنز بنا کر میچ کو دوبارہ مقابلے کی پوزیشن میں لایا، اس سے پہلے ٹیم 11 رنز پر 3 کھلاڑیوں کے پویلین واپس لوٹنے اور 77 رنز پر چوتھی وکٹ گرنے پر مشکلات میں دکھائی دے رہی تھی۔

بھارت کی جانب سے کلدیپ یادیو نمایاں باؤلر رہے، انہوں نے 4 وکٹیں 68 رنز دے کر حاصل کیں، مارکو یانسن اور بریٹزکے کی لگاتار وکٹیں حاصل کرنا میچ کا ٹرننگ پوائنٹ ثابت ہوا، جس کے بعد بھارت نے 3 میچوں کی سیریز میں 0-1 کی برتری حاصل کرلی۔

37 سالہ ویرات کوہلی نے انٹرنیشنل کرکٹ کے تینوں فارمیٹس میں اپنی 83ویں سنچری مکمل کی، انہوں نے مارکو یانسن کی گیند پر باؤنڈری لگا کر اپنی سنچری مکمل کی۔

ویرات کوہلی دنیا میں سب سے زیادہ ون ڈے سنچریاں بنانے والے بیٹر ہیں، دوسرے نمبر پر بھارت کے لیجنڈ سچن ٹنڈولکر ہیں جن کی 49 سنچریاں ہیں۔
بھارت کے لیے صرف ایک روزہ فارمیٹ کھیلنے والے ویرات کوہلی اور 38 سالہ روہت شرما نے ٹیم کی بیٹنگ لائن کو مضبوط کیا، روہت شرما نے 18 رنز پر یشاسوی جیسوال کے آؤٹ ہونے کے بعد اننگز کو سنبھالا، لیکن بعد میں یانسن نے انہیں ایل بی ڈبلیو کردیا، روہت شرما نے اپنی 51 گیندوں کی اننگز میں 3 چھکے لگائے، جس کے ساتھ ان کے ون ڈے کرکٹ میں چھکوں کی تعداد 352 ہوگئی، یوں انہوں نے پاکستان کے شاہد آفریدی کے 351 چھکوں کا ریکارڈ بھی توڑ دیا۔

کوہلی نے جنوری کے بعد اپنی پہلی سنچری مکمل کی اور اس کے فورا بعد جارحانہ کھیل شروع کیا، انہوں نے آف اسپنر پرنینلن سبریان کو ایک اوور میں دو چوکے اور دو چھکے لگا کر 21 رنز لیے۔

ویرات کوہلی آخرکار ناندرے برگر کی گیند پر ریان ریکلٹن کے ہاتھوں کیچ آؤٹ ہوئے، اس سے قبل وہ 11 چوکے اور 7 چھکے لگا چکے تھے، کے ایل راہول نے بھی 56 گیندوں پر 60 رنز بنا کر اسکور کو مزید آگے بڑھایا، جبکہ رویندرا جڈیجا نے 20 گیندوں پر 32 رنز بنائے۔

شاداب نے آخری مرتبہبنگلادیش کے خلاف جون میں ٹی 20 سیریز میں پاکستان کی نمائندگی کی تھی، جس کے بعد وہ انجری کے باعث ٹیم سے باہر ہو گئے تھے۔
ہفتے کے روز پاکستان نے سری لنکا کو شکست دے کر سہ فریقی سیریز جیت لی، میچ میں محمد نواز کی 3 وکٹوں نے میزبان ٹیم کے حق میں میچ کا پانسہ پلٹ دیا تھا۔

محمد نواز کے علاوہ اوپنر صائم ایوب نے بھی پاکستان کے بااثر اسپن آپشن کے طور پر اپنی جگہ مضبوط کر لی ہے، جب کہ ابرار احمد اور عثمان طارق نے خود کو قابل اعتماد اسپیشلسٹ کے طور پر منوایا ہے۔

تاہم سلمان علی آغا نے ٹی 20 ورلڈ کپ کے دوران شاداب کی واپسی کے امکان کو رد نہیں کیا، انہوں نے میچ کے بعد پریس کانفرنس میں شاداب کے بارے میں کہا کہ جب وہ بدقسمتی سے زخمی ہوئے تو وہ ٹیم کے نائب کپتان تھے اور جب آپ کے پاس ایسا کھلاڑی موجود ہو جو اتنے ورلڈ کپ کھیل چکا ہو، جس کے پاس تجربہ ہو، جو نمبر 5 اور 6 پر بیٹنگ کر سکے اور آپ کو اسپن بولنگ بھی دے سکے، اگر ہمیں لگا کہ وہ فٹ بیٹھتا ہے، تو ظاہر ہے، کیوں نہیں؟

پاکستان کے اسپن ڈپارٹمنٹ کی بڑھتی ہوئی گہرائی اُن کی حالیہ وائٹ بال کرکٹ میں واپسی کی نمایاں وجوہات میں سے ایک رہی ہے۔

کپتان نے مزید کہا کہ اگر کنڈیشنز ہمیں 2 اسپیشلسٹ اسپنرز یا اس سے بھی زیادہ کھلانے کی اجازت دیتی ہیں، تو ہم بالکل ہچکچاہٹ نہیں دکھائیں گے۔
ہمارے پاس نواز، صائم، ابرار اور عثمان، چار بہت مختلف آپشنز ہیں، ہمارا کام صرف پاکستان کے لیے بہترین اسکواڈ میدان میں اتارنا ہے، اگر پچز اسپنرز کا ساتھ دیں تو آپ ان سب کو ایک ساتھ کھیلتے دیکھ سکتے ہیں۔

راولپنڈی کرکٹ اسٹیڈیم میں کھیلے گئے فائنل مقابلے میں پاکستان نے سری لنکا کا 115 رنز کا ہدف بآسانی 4 وکٹوں کے نقصان پر حاصل کر لیا، بابر اعظم 34 گیندوں پر 37 رنز کی زمہ دارانہ اننگز کھیل کر وکٹ پر موجود رہے۔

دیگر بیٹرز میں صائم ایوب 33 گیندوں پر 36 رنز بنا کر آؤٹ ہوئے، صاحب زادہ فرحان 23 اور کپتان سلمان علی آغا 14 رنز بنا کر پویلین واپس لوٹے، فخر زمان 3 رنز بنا کر آؤٹ ہوئے۔

سری لنکا کی جانب سے پاون رتھنایک نے 2، وانندو ہاسارنگا اور ایشان مالینگا نے ایک،ایک وکٹ اپنے نام کی۔

اس سے قبل، پاکستانی باؤلرز کی عمدہ باؤلنگ کے نتیجے میں سری لنکا ٹیم بڑا ہدف دینے میں ناکام رہی اور ٹائیگرز 114 رنز پر ہی ڈھیر ہوگئے۔

سری لنکا ٹیم کی پہلی وکٹ 20 رنز پر گری تاہم اس کے بعد کامل مشارا اور وکٹ کیپر بیٹر کوسال مینڈس نے47 گیندوں پر 64 رنز کی عمدہ پارٹنر شپ قائم کی۔

84 کے مجموعے پر کوسال مینڈس کے آؤٹ ہونے کے بعد لنکن بیٹر کی پویلین واپس لوٹنے کی لائن لگ گئی، پوری ٹیم 20 اوورز بھی نہ کھیل سکی اور 114 رنز پر آل آؤٹ ہوگئی۔

پاکستان کی جانب سے شاہین شاہ آفریدی اور محمد نواز نے 3،3 کھلاڑیوں کو آؤٹ کیا، ابرار احمد نے 2 وکٹیں اپنے نام کیں جبکہ صائم ایوب اور سلمان مرزا کے حصے میں ایک،ایک وکٹ آئی۔