دنیا بھرمیں مسیحی برادری کرسمس کا تہوار منارہی ہے، پاکستان میں مقیم مسیحی برادری نے بھی اپنا مذہبی تہوار روایتی جوش وخروش سے منایا۔

پاکستان بھر میں موجود گرجاگھروں میں خصوصی دعائیہ تقریبات کا انعقاد کیا گیا جن میں ملک کی ترقی وخوشحالی کیلئے خصوصی دعائیں مانگی گئیں۔

وزارت ریلوے نے مسیحی برادری کے ساتھ اظہاریکجہتی کیلئے اس سال خصوصی کرسمس امن ٹرین چلائی جبکہ وزیراعظم نوازشریف کی ہدایات پر کرسمس اور قائد اعظم محمد علی جناب کے یوم پیدائش کے موقع پر لوڈشیڈنگ نہ کرنے کا اعلان کیا گیا۔

ملک بھر میں ان علاقوں کو برقی قمقوں سے سجایا گیا جہاں عیسائیوں کی اکثریت ہے، مسیحی برادری نے اپنے گھروں کو خصوصی کرسمس ٹری، سانتا کلاز، سنو مین اور ستاروں سے آراستہ کیا۔

ریڈیو پاکستان کی رپورٹ کے مطابق کرسمس کے موقع پر جاری کردہ اپنے پیغام میں صدر ممنون حسین اور وزیراعظم نواز شریف نے پاکستان اور دنیا بھر میں بسنے والے عیسائیوں کو مبارک باد دی۔

انہوں نے کہا کہ حکومت پاکستان بین المذاہب ہم آہنگی کے فروغ اور مذہبی تعصب کی حوصلہ شکنی کے لیے کوشاں ہے۔