بھارتی فلموں کی ٹی وی پر نمائش کی اجازت
لاہور ہائی کورٹ کے چیف جسٹس نے درست لائسنس کے حامل تمام نجی چینلز کو ہندوستانی فلموں کو ٹی وی پر نشر کرنے کی اجازت دے دی۔
ڈان اخبار کی ایک رپورٹ کے مطابق چیف جسٹس سید منصور علی شاہ نے یہ اجازت پیمرا کی ایک رپورٹ کے تناظر میں دی، جس میں بتایا گیا تھا کہ ٹی وی چینلز کو لائسنس ٹو اسٹیبلش اینڈ آپریٹ سیٹلائٹ ٹی وی براڈ کاسٹ چینل اسٹیشن کی شق 7.2 (ii) کے تحت ہندوستانی فلموں کو نشر کرنے کی اجازت ہے۔
چیف جسٹس لاہور ہائی کورٹ نے لیو کمیونیکیشنز اور دیگر اداروں کی جانب سے ہندوستانی مواد پر پابندی کے حوالے سے پیمرا کے فیصلے کو چیلنج کرنے کی درخواست پر گذشتہ ہفتے ہونے والی سماعت کا تحریری حکم نامہ جاری کیا۔
پیمرا کے وکیل نے دلائل دیئے تھے کہ یہ اجازت پیمرا آرڈیننس برائے 2002 کے قوائد و ضوابط سے مشروط ہوگی۔
درخواست گزاروں کے وکیل نے دلائل دیئے کہ چینلز کو ہندوستانی ڈرامے دکھانے کی بھی اجازت ملنی چاہیے، کیوں کہ لائسنس کے مطابق ان کا شمار بھی 'انٹرٹینمنٹ' کے زمرے میں کیا جاتا ہے۔
تاہم پیمرا کے وکیل نے اس دلیل سے اختلاف کرتے ہوئے کہا کہ انڈین ڈراموں کا شمار 'انٹرٹینمنٹ' میں کیا جاسکتا ہے، دلائل کے لیے مزید وقت طلب کرلیا، انہوں نے کہا کہ چینلز کو لائسنس کے تحت صرف ہندوستانی فلموں کی نمائش کی اجازت دی جاسکتی ہے۔
بعدازاں کیس کی سماعت اگلے ماہ 2 مارچ تک کے لیے ملتوی کردی گئی۔
تبصرے (2) بند ہیں