اگر تو آپ نوکیا 3310 اور اس کے نئے تین اینڈرائیڈ اسمارٹ فونز کے منتظر ہیں تو اچھی خبر یہ ہے کہ پاکستان میں اس کی آمد کی تاریخ کا اعلان کردیا گیا ہے۔

نوکیا موبائل فونز کی فروخت کا لائسنس رکھنے والی کمپنی ایچ ایم ڈی گلوبل نے اعلان کیا ہے کہ اگلے تین ماہ کے اندر پاکستان میں نئے فونز کو متعارف کرایا جائے گا۔

ایچ ڈی ایم گلوبل کے مشرق وسطیٰ اور شمالی افریقہ کے نائب صدر پر ایکمین نے گزشتہ روز بتایا ' پاکستان ہمارے لیے ایک اہم مارکیٹ ہے اور ہمارے تین اسمارٹ فونز یعنی نوکیا سکس، نوکیا فائیو اور نوکیا تھری اور نوکیا 3310 کا نیا ورژن صارفین کو ضرور پسند آئیں گے۔

یہ فون جون تک پاکستان میں دستیاب ہوں گے اور ان کی قیمتیں بھی اسی وقت سامنے آسکیں گی۔

نوکیا سکس

فوٹو بشکریہ نوکیا
فوٹو بشکریہ نوکیا

نوکیا سکس 5.5 ایچ ڈی اسکرین والا فون ہے جس میں اینڈرائیڈ نوگیٹ آپریٹنگ سسٹم دیا گیا ہے۔

اس کے دیگر فیچرز میں 16 میگا پکسلز کا بیک کیمرہ جبکہ 8 میگا پکسلز کا فرنٹ کیمرہ، کوالکوم اسنیپ ڈراگون 430 پراسیسر، 4 جی بی ریم اور 64 جی بی اسٹوریج وغیرہ قابل ذکر ہیں۔

اس کی قیمت 229 یورو (25 ہزار پاکستانی روپے سے زائد) رکھی گئی ہے۔

نوکیا فائیو

فوٹو بشکریہ نوکیا
فوٹو بشکریہ نوکیا

اس کے مقابلے میں نوکیا فائیو 5.2 انچ کی ڈیوائس ہے جس میں تیرہ میگا پکسلز کا رئیر اور 8 میگا پکسل کا فرنٹ کیمرہ ہے۔

اس میں بھی اینڈرائیڈ نوگیٹ آپریٹنگ سسٹم دیا گیا ہے، 2 جی بی ریم، 16 جی بی اسٹوریج اور 3000 ایم اے ایچ بیٹری وغیرہ قابل ذکر ہیں۔

اس فون کی قیمت 189 یورو (لگ بھگ اکیس ہزار پاکستانی روپے) ہے۔

نوکیا تھری

فوٹو بشکریہ نوکیا
فوٹو بشکریہ نوکیا

نوکیا تھری پانچ انچ اسکرین، 1.3 گیگا ہرٹز کواڈ کور پراسیسر، 8، 8 میگا پکسلز کے بیک اور فرنٹ کیمرے، ٹو جی بی ریم، اینڈرائیڈ نوگیٹ، 16 جی بی اسٹوریج اور 2650 ایم اے ایچ بیٹری وغیرہ کے ساتھ ہے۔

اس کی قیمت 139 یورو (15 ہزار پاکستانی روپے سے زائد) ہے۔

کمپنی کی جانب سے اعلان کیا گیا کہ یہ تینوں اسمارٹ فونز رواں سال کی دوسری سہ ماہی میں دنیا بھر میں فروخت کے لیے پیش کردیئے جائیں گے۔

نوکیا 3310

اس بار کا ڈیزائن پہلے کے مقابلے میں مختلف ہے جبکہ اسکرین کو بھی کلر کردیا گیا ہے۔

2 میگا پکسل ایل ای ڈی فلیش کیمرے کا اضافہ کیا گیا جبکہ 2.4 انچ کی اسکرین کے ساتھ اس کا نیا ڈیزائن پہلے کے مقابلے میں زیادہ خوبصورت ہے۔

اور بات یہاں ختم نہیں ہوتی بلکہ اس میں مائیکرو یو ایس بی چارجنگ پورٹ، ہیڈ فون جیک، 16 ایم بی اسٹوریج جسے مائیکرو ایس ڈی کارڈ اسٹوریج سے 32 جی بی تک بڑھایا جاسکتا ہے جبکہ بلیو ٹوتھ جیسے اضافے بھی ہوئے ہیں تاہم وائی فائی، جی پی ایس وغیرہ نہیں۔

مگر پھر بھی آپ 2.5 جی انٹرنیٹ اس پر چلا سکتے ہیں جبکہ کالز،ایف ایم ریڈیو، ایم پی تھری پلیئر، ٹیکسٹ اور اسنیک گیم بھی اس کا حصہ ہیں۔

اور ہاں اس کی بیٹری پہلے سے بھی زیادہ طاقتور ہے اور ایک چارج پر لگاتار 22 گھنٹے تک فون کال کی جاسکتی ہے اور ایک مہینے کا اسٹینڈبائی ٹائم ہے۔

کمپنی کی جانب سے جاری بیان کے مطابق چار رنگوں میں متعارف کرائے جانے والا یہ فون رواں سال کی دوسری سہ ماہی یعنی اپریل سے جون کے دوران پاکستان سمیت مختلف ممالک میں فروخت کے لیے پیش کیا جائے گا۔

اس کی اوسط قیمت دنیا بھر میں 52 ڈالرز یا 5200 پاکستانی روپوں سے زائد ہے تاہم پاکستان میں اس کا تعین مقامی ٹیکسز اور ڈیوٹیز کے بعد ہوگا۔

ضرور پڑھیں

تبصرے (1) بند ہیں

Mian mUskrahat Ali Mar 22, 2017 05:51pm
Nokia 3 is more reasonable choice. I can't wait for Nokia 3