بھارتی تاریخ کی سب سے مہنگی فلم باہو بلی کا دوسرا حصہ آئندہ ہفتے ریلیز ہورہا ہے مگر اس کے فلمساز اس سے قبل ہی 500 کروڑ بھارتی روپوں سے زائد کا بزنس کرچکے ہیں۔

جی ہاں اگر مختلف رپورٹس پر یقین کیا جائے تو باہو بلی: The Conclusion نے ریلیز سے قبل ہی 500 کروڑ روپے سے زائد کا بزنس کرلیا ہے جن میں سے بیشتر حصہ اس کے نشریاتی حقوق کی فروخت سے حاصل ہوا۔

یہ فلم تین زبانوں تیلگو، تامل اور ہندی میں ریلیز ہوگی جس کے ہندی ورژن کے ہی حقوق کرن جوہر کے ادارے دھرما پروڈکشن نے 120 کروڑ روپے میں خریدے ہیں۔

اسی طرح تیلگو ورژن کے حقوق 130 کروڑ روپے میں فروخت ہوئے جبکہ تامل ورژن سے بھی کروڑوں روپے کمائے گئے۔

اسی طرح سونی ٹی وی نیٹ ورک نے اس کے ہندی ورژن کے سیٹلائیٹ رائٹس 51 کروڑ روپے میں خریدیں جو کہ کسی بھی دوسری زبان سے ڈب فلم کے حوالے سے ریکارڈ ڈیل ہے۔

اس فلم کے حوالے سے سرمایہ کاروں کی دلچسپی کی وجہ لوگوں کی جانب سے اس کا بے صبری سے انتظار ہے۔

اس فلم کے پہلے ٹریلر نے بھی بھارت میں یوٹیوب میں سب سے زیادہ دیکھے جانے والے ٹریلر کا ریکارڈ قائم کردیا ہے۔

اس فلم کا پہلا حصہ 2015 میں ریلیز ہوا تھا جس کے بعد سے ہی لوگ دوسرے حصے کے منتظر تھے۔

باہو بلی : دی کنکلوزن میں ایک بار پھر جنوبی بھارت کے سپراسٹار پربھاز مرکزی کردار ادا کریں گے جبکہ رانا درگا بتی ولن کے روپ میں نظر آئیں گے۔

ڈائریکٹر ایس ایس راجا میولی کی اس فلم کا آغاز پہلے حصے کے اختتامی حصے سے ہوگا۔

مختلف ماہرین کے خیال میں یہ پہلی بھارتی فلم ہوسکتی ہے جو دنیا بھر میں ایک ہزار کروڑ روپے کا بزنس کرسکتی ہے تاہم اس کا فیصلہ آنے والا وقت ہی کرے گا۔