آپ کو مکڑیاں دیکھ کر ڈر لگتا ہو یا نہ ہو مگر آٹھ ٹانگوں والی یہ مخلوق گھروں میں دندناتی پھرتی ہے، چھتوں پر جالے بناتی ہے اور اکثر انہیں دیکھنا کوئی خوشگوار تجربہ تو نہیں ہوتا۔

عام طور پر یہ مکڑیاں غذا یا گرم جگہ کی تلاش میں خزاں کے دوران گھروں کا رخ کرتی ہیں جبکہ گرمیوں میں کھلی کھڑکیاں انہیں راستہ دکھاتی ہیں۔

مگر گھروں کو مکڑیوں سے صاف کرنا، وہ بھی زیادہ محنت کیے بغیر کتنا ممکن ہے ؟ تو اس کا جواب ہے کہ یہ کچھ زیادہ مشکل بھی نہیں۔

یہ بھی مددگار ہوسکتا ہے : چھپکلیوں کو گھر سے دور رکھنے کا موثر طریقہ

کیمیکلز اور دیگر کیڑے مار ادویات بھی اس کے لیے استعمال کی جاسکتی ہیں مگر یہ صحت کے لیے نقصان بھی ثابت ہوسکتی ہیں۔

تو اگر آپ بھی گھر سے مکڑیوں سے نجات چاہتے ہیں تو درج ذیل میں چند آسان اقدامات کو آزما کر دیکھیں۔

صفائی کا خیال

اگر تو ویکیوم کلینیر ہو تو اسے ایسے مقامات جیسے سنک یا واش بیسن کے نیچے، الماری کے پیچھے یا بڑے فرنیچر کے نیچے یا پیچھے ضرور استعمال کریں، تاہم وہ نہ ہو تو بھی جھاڑو اس مقصد کے لیے استعمال کی جاسکتی ہے۔

جالوں کا خاتمہ

نمایاں نظر آنے والے جالوں کو صاف کرنا بھی معمول بنالیں۔

یہ بھی دیکھیں : چوہوں سے نجات دلانے والے آسان طریقے

دراڑیں بھریں

دیواروں میں دراڑوں کو بھر دیں، پائپوں اور دروازوں کے نیچے خلاءکو بھی بھرنا مکڑیوں کو گھر میں داخل ہونے سے روکتا ہے۔

ان کی پناہ گاہیں بننے والی چیزوں کو ہٹا دیں

اس بات کو یقینی بنائیں کہ گھر میں لکڑی کے ڈھیر، کھاد کے ڈھیر یا ایسے کسی بھی چیز کے ڈھیر کو گھر کے قریب جمع نہ ہونے دیں۔

کیڑوں کی روک تھام

گھر میں مکھیوں یا دیگر کیڑوں کی آمد روکنا بھی مکڑیوں کو گھروں میں سے دور رکھنے میں مددگار ثابت ہوسکتا ہے، کیونکہ خوراک کے بغیر ان کے لیے اپنی بقاءمشکل ہوتی ہے۔