پاکستان اور برطانیہ کے سفارتی تعلقات اور دوستی کو 70 سال مکمل ہونے پر ملک کے سب سے بڑے شہر اور صوبہ سندھ کے دارالحکومت کراچی میں شاندار ایئر شو کا اہتمام کیا گیا۔

ایئر شو میں جہاں پاکستان کے معروف ’جے ایف 17 تھنڈر‘ طیاروں نے کرتب دکھائے، وہیں برٹش رائل ایئرفورس کے ’ریڈ اروز‘ نے بھی شاندار مظاہرہ کیا۔

باہمی تعلقات اور دوستی کے 70 سالہ جشن منانے کے لیے منعقد کی گئی اس ایئر شو کی تقریب میں وزیر اعلیٰ سندھ سید مراد علی شاہ، گورنر سندھ محمد زبیر، پاک فضائیہ کے عہدیداروں اور برطانوی سفارتکاروں سمیت دیگر سرکاری عہدیداروں نے بھی شرکت کی۔

اس ایئر شو کو دیکھنے کے لیے ہزاروں شہری ساحل سمندر پر امڈ آئے، جب کہ ایئر شو کو ٹیلی وژن پر بھی براہ راست دکھایا گیا۔