ملک بھر میں چہلم امام حسینؓ پر شہدائے کربلا کو خراج عقیدت پیش کرنے کے لیے ماتمی جلوس نکالے گئے۔

کراچی میں چہلم کا مرکزی جلوس نشتر پارک سے برآمد ہو کر آخری منزل حسینیہ ایرانیان امام بارگاہ کھارادر پہنچ کر اختتام پذیر ہوا۔

لاہور میں حویلی الف شاہ سے برآمد ہونے والا جلوس کربلا گامے شاہ پہنچ کر ختم ہوگیا۔

راولپنڈی میں چہلم کا مرکزی جلوس امام بارگاہ عاشق حسین سے نکالا گیا، جس میں عزاداروں نے شہدائے کربلا کو پرسہ دیا۔

پشاور میں نکالے جانے والے تین ماتمی جلوس اپنی منازل پر پہنچ کر پرامن طور پر اختتام پذیر ہوگئے۔

کوئٹہ میں بھی نواسہ رسولؐ کو خراج عقیدت پیش کیا گیا اور مرکزی جلوس میں اکیس ماتمی دستے شامل ہوئے۔

ملک بھر میں جلوسوں کے راستوں پر سیکیورٹی کے سخت اقدامات کیے گئے تھے۔

کراچی بھر میں 17 ہزار پولیس اہلکار تعینات تھے، مرکزی جلوس کے اطراف 5 ہزار سے زائد سیکیورٹی اہلکاروں کا پہرا لگایا گیا، جبکہ راستے کو کنٹینرز لگا کر سیل کردیا گیا تھا۔

چہلم امام حسینؓ کے موقع پر کراچی، پشاور، راولپنڈی اور کوئٹہ سمیت ملک کے کئی شہروں میں موبائل فون سروس بھی معطل رہی۔