پاک فوج کے سربراہ جنرل قمر جاوید باجوہ نے پاکستان کی ترقی کے عزم کا اظہار کرتے ہوئے کہا ہے کہ پاکستان کے عروج کے لیے بطور قوم متحد اور ثابت قدم رہنے کی ضرورت ہے۔

پاک فوج کے شعبہ تعلقات عامہ (آئی ایس پی آر) کے مطابق منگلا کور کے جوانوں سے خطاب کرتے ہوئے آرمی چیف جنرل قمر جاوید باجوہ نے بانی پاکستان قائد اعظم محمد علی جناح کے قول کا حوالہ دیتے ہوئے کہا کہ کوئی طاقت پاکستان کو ختم نہیں کرسکتی اور اس مقصد کے لیے قوم اور ریاستی اداروں کو ملک کے بہترین مفاد کے لیے مربوط انداز میں کام کرنا ہوگا۔

آرمی چیف جنرل قمر باجوہ نے کہا کہ 'ہم چیلنجوں کا جواب دیتے ہوئے طویل سفر طے کر چکے ہیں اور انشااللہ پاکستان ترقی کرے گا جس کے لیے بطور قوم صرف متحد اور ثابت قدم رہنے کی ضرورت ہے'۔

انھوں نے اپنے خطاب میں تربیت کے اعلیٰ معیار اور حوصلے کو سراہتے ہوئے کہا کہ مغربی سرحد اور اندرونی سیکیورٹی کے حوالے سے ہمارے بھرپور عزم کے باوجود روایتی خطرات کو ہم نظراندازنہیں کرسکتے جس کے لیے اعلیٰ معیار کی تریبت اور بلند حوصے کی ضرورت ہے۔

قبل ازیں آرمی چیف منگلا کور کے دورے پر پہنچے تو کورکمانڈر لیفٹننٹ جنرل اظہر صالح عباسی نے استقبال کیا اور اس موقع پر انسپکٹرجنرل ٹریننگ اینڈ ایوالویشن لیفٹننٹ جنرل ہدایت الرحمٰن بھی موجود تھے۔

آرمی چیف جنرل قمر جاوید باجوہ نے افسران اور جوانوں سے خطاب کے علاوہ جاری تربیتی مشقوں کا بھی معائنہ کیا۔