کراچی: رینجرز، سی ٹی ڈی کی مشترکہ کارروائی، 16 مبینہ دہشتگرد گرفتار

اپ ڈیٹ 05 جنوری 2018

ای میل

کراچی کے علاقے سہراب گوٹھ گنا منڈی کے قریب رینجرز اور محکمہ انسداد دہشت گردی (سی ٹی ڈی) نے مشترکہ کارروائی کرتے ہوئے کالعدم تحریک طالبان پاکستان کے 16 دہشت گردوں کو گرفتار کرلیا، ملزمان کے قبضے سے اسلحہ گولہ بارود اور دیگرسامان بھی برآمد کیا گیا۔

ترجمان رینجرز کے مطابق محکمہ انسداد دہشت گردی اوررینجرز نے دو روز قبل بلدیہ قائم خانی کالونی میں مقابلے کے دوران فرار ہونے والے ملزمان کی موجودگی کی اطلاع پر سپرہائی وے گنامنڈی اور مومن آباد میں سرچ آپریشن کیا۔

ان کا کہنا تھا کہ کئی گھنٹے تک علاقے کے داخلی اور خارجی راستے سیل کرکے گھر گھر تلاشی کا عمل جاری رہا۔

انہوں نے دعویٰ کیا کہ رینجرز اور سی ٹی ڈی کی جانب سے کئی گھنٹے جاری آپریشن کے بعد کالعدم تحریک طالبان پاکستان سے تعلق رکھنے والے 16 دہشت گردوں کو گرفتار کرلیا۔

مزید پڑھیں: کراچی: پولیس کا 5 ’دہشت گردوں‘ کو ہلاک کرنے کا دعویٰ

ترجمان کے مطابق گرفتار ملزمان دو روز قبل بلدیہ میں رینجرز آپریشن کے دوران فرار ہوگئے تھے۔

رینجرز نے دعویٰ کیا کہ ملزمان کے قبضے سے بلاک بم اسلحہ اور گولہ بارود برآمد ہوا۔

ترجمان رینجرز کے مطابق ملزمان کا تعلق کالعدم تحریک طالبان استاد اسلم گروہ سے ہے۔

ان کی جانب سے جاری کی گئی فہرست کے مطابق گرفتار کیے گئے ملزمان میں رفیع اللہ عارف عرف قاری، عبدالماجد عرف مفتی، محمد یونس عرف انس عرف یوسف سلیم، محمد رزاق عرف شل دادا، شمس الہدا عرف مولوی، عمر خالق عرف حسین، محمد جنید عرف عبدالمنان، جنید احمد، خان بہادر، عبدالغفار عرف ابو حریرا، محمد زین العابدین عرف صدیقی عرف سیف اللہ، سیف اللہ عرف سیفو، محمد آصف عرف ڈاکٹرعرف لنگڑا، ثنا ء اللہ عرف ثناء، عبدالعزیز عرف کامران، عمر علی زرگر شامل ہیں۔

یہ بھی پڑھیں: کراچی: دہشت گردی کی بڑی کارروائی ناکام، اسلحہ بردار شخص گرفتار

ترجمان رینجرز کا کہنا تھا کہ تمام دہشت گردوں کو سی ٹی ڈی کے حوالے کر دیا گیا ہے۔

خیال رہے کہ رواں ہفتے کراچی پولیس نے شہر کے نواحی علاقے میں کارروائی کے دوران ’داعش‘ سے تعلق رکھنے والے 5 مشتبہ دہشت گردوں کو ہلاک کرنے کا دعویٰ کیا تھا۔

اس سے قبل 23 دسمبر 2017 کو سیکیورٹی اداروں نے تخریب کراچی کے قائدِ اعظم انٹرنیشل ایئرپورٹ پر ملیشیاء سے تعلق رکھنے والے ایک شخص کو گرفتار کرتے ہوئے تخریب کاری کی بڑی کارروائی ناکام بنادی۔