نیوزی لینڈ نے ایک مرتبہ پھر عمدہ کھیل پیش کرتے ہوئے پاکستان کو پانچویں ون ڈے میچ میں 15 رنز سے شکست دے کر سیریز میں 5-0 سے کلین سوئپ مکمل کر لیا ہے۔

نیوزی لینڈ نے ٹاس جیت کر پہلے بیٹنگ کا فیصلہ کیا تو مارٹن گپٹل کی سنچری اور روس ٹیلر کی ففٹی سے تقویت پاتے ہوئے میزبان ٹیم نے 271 رنز کا مجموعہ اسکور بورڈ پر سجایا۔

ہدف کے تعاقب میں قومی ٹیم کی صورتحال گزشتہ چار میچوں سے مختلف نہ تھی اور 57 رنز پر کپتان سرفراز احمد سمیت پانچ کھلاڑی پویلین لوٹ چکے تھے۔

حارث سہیل اور شاداب خان نے نصف سنچریوں کے ساتھ ساتھ سنچری شراکت قائم کی اور ٹیل اینڈرز نے بھی عمدہ کھیل پیش کیا لیکن ان تمام کی یہ کاوش ابتدائی کھلاڑیوں کی غیر ذمے داری کا ازالہ نہ کر سکی اور پاکستان کو میچ میں 15 رنز سے شکست کا منہ دیکھنا پڑا۔

اس میچ میں شکست کے ساتھ ہی قومی ٹیم کو سیریز میں 5-0 سے کلین سوئپ کا سامنا کرنا پڑا۔