جسمانی توانائی کو بڑھانے کا آسان نسخہ

26 فروری 2018
یہ بات امریکا میں ہونے والی ایک طبی تحقیق میں سامنے آئی— شٹر اسٹاک فوٹو
یہ بات امریکا میں ہونے والی ایک طبی تحقیق میں سامنے آئی— شٹر اسٹاک فوٹو

کیا آپ اکثر یا جلد تھکاوٹ کا شکار ہوجاتے ہیں؟ اگر ہاں تو ایک معمولی سی ٹرک آپ کو جسمانی توانائی سے بھرپور کرنے کے لیے کافی ہے۔

یہ بات امریکا میں ہونے والی ایک طبی تحقیق میں سامنے آئی۔

کولوراڈو یونیورسٹی کی تحقیق کے مطابق جو لوگ دن بھر بیٹھ کر گزارتے ہیں انہیں ہر گھنٹے میں پانچ منٹ کی چہل قدمی یقینی بنا کر خود کو تھکاوٹ سے محفوظ اور جسمانی طور پر توانائی کی سطح بہتر بناسکتے ہیں۔

مزید پڑھیں : کیا آپ یہ 10 فٹنس ٹیسٹ پاس کرسکتے ہیں؟

تحقیق کے دوران تیس صحت مند افراد کو لیا گیا جو کہ دن بھر جسمانی طور پر زیادہ متحرک نہیں رہتے تھے اور ان کو تین حصوں میں تقسیم کیا گیا۔

ایک گروپ کو دفتر میں 6 گھنٹے تک بس بیٹھے رہنے کی ہدایت کی گئی، دوسرے گروپ کو صبح آدھے گھنٹے کی تیز چہل قدمی جبکہ تیسرے کو دفتر میں ہر گھنٹے بعد پانچ منٹ کے لیے چہل قدمی کا کہا گیا۔

نتائج سے معلوم ہوا کہ دوسرے اور تیسرے گروپ دن کے اختتام پر زیادہ جسمانی توانائی محسوس کرتے تھے۔

تاہم دن بھر ہر گھنٹے میں پانچ منٹ کی چہل قدمی کرنے والے افراد میں جسمانی توانائی زیادہ بہتر، مزاج خوشگوار اور تھکاوٹ نہ ہونے کے برابر دیکھی گئی اور جنک فوڈ کی خواہش بھی ایسے افراد کے اندر کم ہوگئی۔

محققین کا کہنا تھا کہ صبح کی ورزش کے اثرات دن گزرنے کے ساتھ ختم ہونے لگتے ہیں مگر دن بھر کچھ دیر کی چہل قدمی کا اثر زیادہ وقت تک برقرار رہتا ہے۔

یہ بھی پڑھیں : جسمانی وزن میں اضافہ کیسے کریں؟

محققین نے ان افراد کی ذہنی کارکردگی، توجہ کی صلاحیت اور معلومات کے تجزیے وغیرہ کا بھی جائزہ لیا تاہم اس معاملے میں تینوں گروپ یکساں رہے۔

یہ تحقیق طبی جریدے جرنل آف بی ہیویریل نیوٹریشن اینڈ فزیکل ایکٹیویٹی میں شائع ہوئی۔

ضرور پڑھیں

تبصرے (0) بند ہیں