جہاں گوگل دیگرعالمی دنوں کی اہمیت کو اجاگر کرنے کے لیے خصوصی ڈوڈل جاری کرتا ہے، وہیں سرچ انجن نے خواتین کو بھی خراج تحسین پیش کرنے کے لیے منفرد ڈوڈل جاری کردیا۔

گوگل نے عالمی یوم خواتین پر جاری کیے گئے ڈوڈل پر 12 مختلف خواتین آرٹسٹوں کی کہانیوں کو شیئر کیا ہے۔

اگرچہ ڈوڈل تھوڑا سا منفرد ہے، تاہم یوم خواتین پر جاری کیے گئے ڈوڈل میں خواتین کی 12 مختلف کہانیاں بتائی گئی ہیں، جنہیں تصویروں میں بیان کیا گیا ہے۔

گوگل ڈوڈل کے ہوم پیج پر نظر آنے والی 12 خواتین آرٹسٹوں میں سے کسی ایک آرٹسٹ کی تصویر کو کلک کرنے پر اس کی تیار کردہ کہانی کھلتی ہے۔

آرٹسٹ کی کہانی کھلنے کے بعد ماؤس کی مدد سے اس کہانی میں شامل مزید تصاویر کو دیکھا جاسکتا ہے۔

گوگل کے ڈوڈل میں جن 12 آرٹسٹوں کی کہانیاں شیئر کی گئی ہیں، ان میں تہیرو تکوئچی کی کہانی میں انسان کی عمر کی مختلف اسٹیجز کو دکھایا گیا ہے، اسی طرح ایسٹیلی میزا کی کہانی میں ان کی چچی کی دلچسپ کہانی دکھائی گئی ہے۔

صفا خان کی کہانی میں ملک کی کہانی، فلپا رائسا کی کہانی میں اعتبار، فرانسسکا سانا کی کہانی میں ’دی باکس‘ جب کہ اینا ہفیسچی کی کہانی میں ’نومبر 1989‘ کی تاریخ اور جدوجہد دکھائی گئی ہے۔

یوں 12 آرٹسٹوں کی 12 تصاویر میں چھپی تمام 12 ہی کہانیاں الگ اور منفرد موضوعات پر ہیں۔

ایک کہانی دیکھنے کے بعد واپس مین پیج پر جانے کے لیے صارف کو ’مینیو‘ کو کلک کرنا پڑتا ہے، جب کہ یوم خواتین کے ڈوڈل کو سوشل میڈیا پر شیئر کرنے کی سہولت بھی دی گئی ہے۔