صوبہ سندھ کے شہر نواب شاہ میں مبینہ طور پر سائیکل چوری کرنے کے الزام میں پولیس کی جانب سے خاتون کو زبردستی گرفتار کرنے اور گھسیٹ کر گاڑی میں ڈالنے کی ویڈیو کے منظر عام پر آنے کے بعد متعلقہ ایس ایچ او سمیت تین اہلکاروں کو معطل کردیا گیا۔

واقعہ نواب شاہ کے علاقے لیاقت آباد میں اُس وقت پیش آیا جب تہمینہ نامی خاتون اپنے بھائی کے ہمراہ شاپنگ کے لیے بازار آئی جہاں پر دکانداروں نے مزکورہ خاتون پر مبینہ سائیکل چوری کا الزام عائد کرکے پولیس کو طلب کرلیا۔

بعدازاں، پولیس نے موقع پر پہنچ کر خاتون سے بدسلوکی کی اور زبردستی گرفتار کرنے کے بعد تھانے لے جاکر تشدد کا نشانہ بھی بنایا۔

سوشل میڈیا پر فوٹیج وائرل ہونے کے بعد وزیر داخلہ سندھ سہیل انور سیال نے واقعے کا نوٹس لیا، جس کے بعد سینئر سپرنٹنڈنٹ پولیس (ایس ایس پی) نوابشاہ نے ایس ایچ او سمیت اس واقعے میں ملوث دیگر تین اہلکاروں کو بھی معطل کردیا۔

ویڈیو میں دیکھا جاسکتا ہے کہ اہلکار خاتون کو سڑک پر سرِ عام گھیسٹ کر پولیس موبائل میں ڈال رہے ہیں، جبکہ اس موقع پر لوگوں کا ہجوم بھی موجود ہے۔