اگر تو آپ ہائی بلڈ پریشر کے شکار ہیں تو اپنی غذا میں ایک سستی چیز کا اضافہ اس سے نجات میں مدد دے سکتا ہے۔

یہ بات کینیڈا میں ہونے والی ایک طبی تحقیق میں سامنے آئی۔

مینی ٹوبا یونیورسٹی کی تحقیق میں انکشاف کیا گیا ہے کہ دالوں کا غذا میں اکثر استعمال ہائی بلڈ پریشر کو قابو کرنے میں مدد دیتا ہے۔

اس حوالے سے محققین نے چوہوں کو دالیں، سالن اور سوپ کا استعمال کرایا تو ان جانوروں میں عمر بڑھنے سے بلڈ پریشر کے مسئلے میں کمی آنے لگی۔

فشار خون یا بلڈ پریشر ایک خاموش قاتل ہے جو ہارٹ اٹیک، فالج اور ہارٹ فیلیئر کا خطرہ بڑھاتا ہے۔

محققین کے مطابق دالوں کا اکثر استعمال ہائی بلڈ پریشر پر قابو پانے کا ایک سستا اور آسان نسخہ ثابت ہوسکتا ہے۔

محققین نے یہ بھی دریافت کیا کہ دالوں کو کھانا خون کی شریانوں میں عمر کے ساتھ آنے والی تنزلی کو ریورس کرنے میں بھی مدد دیتا ہے۔

انہوں نے کہا کہ دالوں کے بلڈ پریشر پر اثرات حیرت انگیز ثابت ہوئے اور خون کی شریانوں کی تنزلی سے لاحق ہونے والے امراض پر قابو میں مدد مل سکتی ہے۔

یہ پہلی تحقیق ہے جس میں انکشاف کیا گیا ہے کہ دالوں کو مکس کرکے کھانے سے ٹانگوں کی شریانوں کے مرض کے شکار چوہوں میں دوران خون بہتر ہوا۔

اس قسم کا عارضہ امراض قلب جیسا ہوتا ہے، تاہم یہ ٹانگوں میں سامنے آتا ہے جس کے دوران چربی کا اجتماع شریانوں کی دیواروں میں ہوجاتا ہے۔

اسی طرح ہائی بلڈ پریشر کو قابو پانے کے لیے بھی یہ غذا موثر ثابت ہوتی ہے جس کے شکار پاکستان میں کروڑوں افراد ہیں۔

اس تحقیق کے نتائج امریکن ہارٹ ایسوسی ایشن کی سالانہ کانفرنس میں پیش کیے جائیں گے۔