صحت غذ١ کاروبار موبائل فون‎حیرت انگیز غزہ المیہ ایران اسرائیل کشیدگی

آنے والی بھارتی ایکشن تھرلر سائنس فکشن فلم ’پوائنٹ ٹو زیرو‘ کا یقینا سبھی کو انتظار ہے۔

اس فلم میں نہ صرف بھارتی اداکار رجنی کانت ایک طاقتور ہیرو کے طور پر سامنے آئیں گے، بلکہ اکشے کمار بھی پہلی بار ایک ایسے ولن کے طور پر نظر آئیں گے، جو ہیرو سے بھی زیادہ طاقتور ہوتا ہے۔

یہ پہلی مرتبہ ہے کہ اکشے تامل اداکار رجنی کانتھ کے ساتھ کسی فلم میں کام کرتے ہوئے نظر آئیں گے۔ اس فلم کو بھارت کی مہنگی ترین فلم بھی کہا جا رہا ہے۔

اگرچہ فلم کی ریلیز کی حتمی تاریخ کا اعلان نہیں کیا گیا، تاہم امکان ہے کہ اسے رواں برس کے اختتام تک ریلیز کردیا جائے گا۔

اس فلم کے حوالے سے تازہ خبر یہ ہے کہ اس میں سابق حسینہ عالم ایشوریا رائے بھی جلوے بکھیرتی نظر آئیں گی۔

فلم فیئر کی رپورٹ کے مطابق اطلاعات ہیں کہ روبوٹ کی سیکوئل فلم پوائنٹ ٹو زیرو میں بھی ایشوریا رائے اپنا کردار ادا کرتی نظر آئیں گی۔

اکشے اور ایشوریا آخری بار 2010 میں ایک ساتھ نظر آئے تھے—اسکرین شاٹ

خیال رہے کہ ’پوائنٹ 2 زیرو‘ سیریز کی پہلی فلم 'اینتھیران' (Enthiran) یعنی 'روبوٹ' 2010 میں ریلیز ہوئی تھی، جس میں رجنی کانت نے ہی ہیرو اور ولن کا کردار ادا کیا تھا۔

یہ بھی پڑھیں: فلم 'ٹو پوائنٹ زیرو' میں اکشے کا ناقابل شناخت روپ

اس فلم میں ایشوریا رائے نے ’ثنا‘ نامی لڑکی کا کردار ادا کیا تھا، اب اطلاعات ہیں کہ وہ سیکوئل میں بھی اپنے کردار کو برقرار رکھتی نظر آئیں گی۔

پہلی فلم کی طرح وہ دوسری فلم میں بھی 67 سالہ رجنی کانت سے ہی پیار کرتی نظر آئیں گی۔

اگرچہ اکشے کمار اور ایشوریا رائے ’پوائنٹ 2 زیرو‘ میں ایک دوسرے سے رومانس کرتے نظر نہیں آئیں گے، تاہم دونوں 8 سال بعد ایک ساتھ نظر آئیں گے۔

اکشے کمار اور ایشوریا رائے کی آخری فلم ’ایکشن ریپلائی‘ تھی، جو 2010 میں ریلیز ہوئی تھی۔

قریبا ساڑھے 4 ارب روپے کی لاگت سے تیار ہونے والی ’2 پوائنٹ 0‘ کو اب تک کی بھارت کی سب سے بڑی بجٹ والی فلم کہا جا رہا ہے، جس کا تاحال کوئی بھی ٹریلر سامنے نہیں آسکا۔