دبنگ تھری: چلبل پانڈے کی ’رجو‘ سوناکشی یا مونی راؤ؟
بولی وڈ کی آںے والی ایکشن تھرلر فلم ’دبنگ تھری‘ کا سب کو انتظار ہے، تاہم دلچسپ بات یہ ہے کہ اس فلم کی شوٹنگ کے حوالے سے کوئی اپڈیٹ موجود نہیں۔
بولی وڈ بھائی جان سلمان خان کی اس ایکشن تھرلر فلم سیریز کی پہلی دونوں فلمیں سپر ہٹ ثابت ہوئیں جس کے بعد گزشتہ ایک سال سے اس کی تیسری فلم بنانے کی باتیں جاری ہیں۔
اگرچہ فلم ساز اور سلمان خان کے بھائی ارباز خان اس بات کا اعلان کر چکے ہیں کہ وہ ’دبنگ تھری‘ بنانے پر کام کر رہے ہیں، تاہم انہوں نے فلم کی مکمل کاسٹ اور کام کے حوالے سے کوئی وضاحت جاری نہیں کی۔
پہلے تو اطلاعات تھیں کہ ’دبنگ تھری‘ میں سوناکشی سنہا کے بجائے دوسری اداکارہ کو کاسٹ کیا جائے گا، تاہم بعد میں یہ خبر بھی سامنے آئی کہ تیسری فلم میں بھی وہی ’چلبل پانڈے‘ کی ’رجو‘ بنیں گی۔
لیکن چند ہفتوں سے یہ خبریں بھی گردش کر رہی تھیں کہ ’دبنگ تھری‘ مرکزی کردار سوناکشی سنہا کے نہیں بلکہ ٹی وی اداکارہ مونی راؤ کا ہوگا۔
یہ بھی پڑھیں: دبنگ تھری کی تیاری شروع
لیکن اب یہ خبر سامنے آئی ہے کہ ان خبروں میں کوئی سچائی نہیں کہ مونی راؤ فلم میں سلمان خان کی ’رجو‘ بنیں گی۔
ڈی این اے انڈیا نے اپنی خبر میں بتایا کہ اس خبر میں کوئی صداقت نہیں کہ ’دبنگ تھری‘ میں مونی راؤ مرکزی کردار کریں گی۔
خبر کے مطابق فلم میں مونی راؤ نہیں بلکہ سوناکشی سنہا ہی مرکزی کردار میں نظر آئیں گی، البتہ فلم میں مونی راؤ کو سلمان خان کی سابق محبوبہ کے طور پر دکھایا جائے گا۔
اطلاعات ہیں کہ مونی راؤ ’دبنگ تھری‘ میں صرف 15 سے 20 منٹ کے کردار میں سلمان خان کی سابق محبوبہ کے طور پر نظر آئیں گی، تاہم فلم میں سوناکشی سنہا ہی ان کی ’رجو‘ بنیں گی۔
مزید پڑھیں: سوناکشی کے علاوہ کوئی اداکارہ ’دبنگ 3‘ کا حصہ نہیں، ارباز
ابھی یہ واضح نہیں ہے کہ فلم کو کب ریلیز کیا جائے گا اور اس کی دیگر کاسٹ میں کون شامل ہوں گے، تاہم امکان ہے کہ فلم رواں برس کے آخر تک ریلیز کردی جائے گی۔
’دبنگ تھری‘ میں سنی لیونی کو بھی مختصر کردار دیے جانے یا پھر ان کا آئٹم سانگ شامل کیے جانے کا امکان ہے۔
واضح رہے کہ اس سیریز کی پہلی فلم ’دبنگ‘ 2010 اور دوسری فلم ’دبنگ ٹو‘ 2012 میں ریلیز ہوئی تھی، دونوں میں سلمان خان اور سوناکشی سنہا نے مرکزی کردار ادا کیے تھے۔
پہلی دونوں فلموں میں سلمان خان بہادر پولیس افسر ’چلبل پانڈے‘ جب کہ سوناکشی سنہا ان کی بیوی ’رجو‘ کا کردار ادا کیا تھا۔
تبصرے (0) بند ہیں