سام سنگ کے نئے فلیگ شپ فون گلیکسی نوٹ 9 کو 9 اگست کو متعارف کرایا جائے گا، تاہم ایک نئی رپورٹ سے اندازہ ہوتا ہے کہ یہ جنوبی کورین کمپنی کا سب سے مہنگا فون ثابت ہوگا۔

ایک رپورٹ میں سام سنگ کے ایک بے نام عہدیدار کے حوالے سے دعویٰ کیا گیا ہے کہ گلیکسی نوٹ 9 اب تک متعارف کرایا جانے والا سب سے مہنگا سام سنگ فون ثابت ہوگا۔

اس فون کے سکس جی بی ریم اور 128 جی بی اسٹوریج والے ماڈل کی قیمت 11 سو 63 ڈالرز (ایک لاکھ 41 ہزار پاکستانی روپے سے زائد) ہوگی۔

مزید پڑھیں : سام سنگ گلیکسی نوٹ 9 کا ایک اور منفرد پہلو سامنے آگیا

یہ فون 3 رنگوں بلیو، بلیک اور پرپل میں دستیاب ہوگا۔

اس سے قبل گزشتہ ماہ امریکی جریدے فوربس کی ایک رپورٹ میں بتایا گیا تھا کہ گلیکسی نوٹ 9 ممکنہ طور پر 6.4 انچ ڈسپلے کے ساتھ ہوگا یعنی گزشتہ سال کے گلیکسی نوٹ 8 سے ایک انچ بڑا، اس طرح یہ مارکیٹ میں دستیاب سام سنگ کا سب سے بڑا ڈسپلے والا فون ثابت ہوگا۔

اس سے قبل یہ بات پہلے ہی سامنے آچکی ہے کہ یہ سام سنگ کا پہلا فون ہوگا جس میں 512 جی بی اسٹوریج دی جارہی ہے، جبکہ مائیکرو ایس ڈی کارڈ سلاٹ کی مدد سے صارفین اسٹوریج کو 1 ٹی بی تک بڑھا سکیں گے۔

سام سنگ نے اس فون کے بیک کیمرہ سیٹ اپ اور فنگر پرنٹ اسکینر کی پوزیشن کو تھوڑا تبدیل کیا ہے، جس کی بدولت اب فون میں 4000 ایم اے ایچ بیٹری کو دینے کا موقع مل سکے گا اور اس طرح یہ ابھی دستیاب پہلا سام سنگ فون ہوگا، جس میں اتنی بڑی بیٹری دی جارہی ہے۔

اور ہاں یہ پہلا سام سنگ فون بھی ثابت ہونے والا ہے جس میں 8 جی بی ریم دیئے جانے کا امکان ہے۔

یہ بھی پڑھیں : سام سنگ کا نیا گلیکسی نوٹ 9 کیسا ہوگا؟

سام سنگ کو ماضی میں گلیکسی ایس 8، ایس 8 پلس، ایس 9 اور ایس 9 پلس کے ساتھ گلیکسی نوٹ 8 کے فرنٹ کیمرے کے رزلٹ کے حوالے سے تنقید کا نشانہ بنایا گیا تھا تو اب جنوبی کورین کمپنی نوٹ 9 میں بھی اپنی تاریخ کا سب سے بڑا فرٹ کیمرہ دینے والی ہے، جس سے کم روشنی میں اچھی تصاویر لینے میں مدد ملے گی۔

اس سے ہٹ کر فون میں ایس 9 پلس جیسا 12، بارہ میگا پکسل کا بیک کیمرہ سیٹ اپ دیا جائے گا، ڈیجیٹل اسسٹنٹ بیکسبی کا نیا ورڑن اور اسنیپ ڈراگون 845 پراسیسر دیا جائے گا۔