کوک اسٹوڈیو ہر سال مداحوں کو نئے انداز سے متاثر کرنے کی کوشش کرتا ہے، کوک اسٹوڈیو ایکسپلورر کے بعد اب اس میوزیکل شو نے اپنے نئے سیزن کی پہلی ویڈیو ریلیز کردی۔

کوک اسٹوڈیو سیزن 11 کی پہلی میوزک ویڈیو میں فیض احمد فیض کی نظم ’ہم دیکھیں گے‘ کو نئے انداز سے پیش کیا گیا جس کے ساتھ اس سیزن میں پرفارم کرنے والے تمام فنکاروں کو بھی متعارف کروایا گیا۔

اس ویڈیو میں علی عظمت، علی سیٹھی، مومنہ مستحسن، عابدہ پروین، عاصم اظہر، عائمہ بیگ، شجا حیدر، ساحر علی بگا، حسن جہانگیر، بلال خان، ابرارالحق، جواد احمد اور حمیرا ارشد جیسے گلوکار پرفارم کرتے نظر آئے۔

کون جانتا تھا کہ اپنے ڈرامے ’یقین کا سفر‘ سے شہرت حاصل کرنے والے اداکار احد رضا میر گلوکاری بھی کرسکتے ہیں؟ وہ بھی تمام فنکاروں کے ساتھ اس ویڈیو میں گلوکاری کرتے نظر آئے۔

اس ویڈیو میں خواجہ سرا لکی اور نغمہ نے بھی پرفارم کیا۔

یاد رہے کہ یہ کوک اسٹوڈیو کا پہلا سیزن ہوگا جس میں خواجہ سرا بھی پرفارم کریں گے۔

کوک اسٹوڈیو سیزن 11 کی پہلی قسط رواں سال 10 اگست کو نشر ہوگی۔

اس سیزن کی پروڈکشن زوہیب قاضی اور علی حمزہ کررہے ہیں۔

تبصرے (0) بند ہیں