چین کی بڑی کمپنی علی بابا کی آن لائن اور موبائل پیمنٹ سروس علی پے رواں سال کے آخر تک پاکستان میں کام شروع کردے گی۔

اس بات کا انکشاف ٹیلی نور کے چیف ایگزیکٹو آفیسر عرفان وہاب خان نے کیا۔

علی پے چین سے تعلق رکھنے والا تھرڈ پارٹی موبائل اور آن لائن پیمنٹ پلیٹ فارم ہے اور صرف چین میں ہی روزانہ 80 کروڑ سے زائد صارفین اس کے ذریعے 85 لاکھ ٹرانزیکشنز کرتے ہیں۔

اس طرح سروسز سے آپ کو خریداری کے بعد ادائیگی کرنے میں مدد ملتی ہے اور آن لائن کے ساتھ اسے سپرمارکیٹس وغیرہ میں بھی استعمال کیا جاسکتا ہے، اسی لیے یہ کریڈٹ کارڈ کا متبادل بھی سمجھی جاتی ہے۔

یہ بھی پڑھیں: چینی کمپنی علی بابا پاکستان میں سرمایہ کاری کی خواہشمند

خیال رہے کہ ٹیلی نور کے مائیکرو فنانس بینک کے 45 فیصد حصص علی پے کے پیچھے موجود کمپنی Ant Financial نے رواں سال مارچ میں 184.5 ملین ڈالرز کے عوض خریدے تھے جو کہ علی بابا گروپ سے منسلک ہے۔

پرو پاکستانی کی ایک رپورٹ کے مطابق پاکستان میں 5 کروڑ 60 لاکھ موبائل انٹرنیٹ صارفین اور ایک ارب ڈالرز مالیت کی ای کامرس مارکیٹ کو دیکھتے ہوئے علی پے کی ملک میں آمد حیراکن نہیں۔

اس وقت یہ کمپنی ملکی مالیاتی ریگولیٹرز اسٹیٹ بینک آف پاکستان اور مسابقتی کمیشن آف پاکستان سے آپریشنر کے آغاز کے لیے منظوری حاصل کرنے کی کوشش کررہی ہے۔

خیال رہے کہ رواں سال مئی میں علی بابا نے پاکستان سمیت متعدد جنوبی ایشیائی ممالک میں سرگرم آن لائن کاروبار کرنے والی کمپنی 'دراز' کو خرید لیا تھا۔

مزید پڑھیں : ’دراز ‘کو چین کی کمپنی علی بابا نے خرید لیا

اس وقت جاری کیے گئے بیان میں بتایا گیا تھا کہ کمپنی اسی نام سے اپنے تمام آپریشنز علی بابا کی سربراہی میں جاری رکھے گی۔

علی پے کو پاکستان میں پے پاک، فون پے اور دیگر سروسز سے مقابلے کا سامنا ہوگا تاہم پاکستان میں ڈیجیٹل پیمنٹ سروس کی آمد سے کروڑوں ڈالرز کی سرمایہ کاری ہوگی۔

علی بابا کا شمار نہ صرف چین بلکہ دنیا کی بہت بڑی آن لائن کمپنیوں میں ہوتا ہے، یہ کمپنی پاکستان میں بھاری سرمایہ کاری کرنے کا ارادہ بھی رکھتی ہے۔

اس کے بانی جیک ما چین کے امیر ترین شخص سمجھے جاتے ہیں جو اس وقت 41 ارب ڈالرز کے مالک ہیں۔

1995 میں انہیں امریکا جانے کا موقع ملا جہاں انٹرنیٹ نے انہیں اپنی جانب کھینچا اور پھر انہوں نے 2 انٹرنیٹ کمپنیوں کو تشکیل دیا جو ناکام ثابت ہوئیں مگر پھر تیسری بار اپنی انٹرنیٹ کمپنی کو علی بابا کا نام دیا اور کامیاب ہوگئے۔

1999 میں اس کمپنی نے اپنے سفر کا آغاز کیا اور اب اس کی مالیت 500 ارب ڈالرز کے قریب ہے۔