انڈونیشیا کے دارالحکومت جکارتا میں ایشین گیمز 2018 کی رنگا رنگ افتتاحی تقریب منعقد ہوئی جہاں میزبان ملک کے صدر جوکو ویدورو اور ایشیائی اولمپک کونسل کے صدر شیخ احمد الفہد الصباح نے شرکت کی۔

ایشین گیمز 2018 کی افتتاحی تقریب انڈونیشیا کے دارالحکومت جکارتا کے گیلورا بونگ کارنو اسٹیڈیم میں ہوئی۔

انڈونیشیا میں گیمز کے منتظم ایرک تھوہر نے افتتاحی تقریب سے خطاب کیا اور کھیلوں کی مختلف تنظیموں کے سربراہوں اور صدر سمیت حکام کی شمولیت پر ان کا شکریہ ادا کیا۔

جکارتا میں منعقدہ تقریب کی خاص بات شمالی اور جنوبی کوریا کی جانب سے ایک مرتبہ پھر اتحاد کی تھی جہاں وہ ایک ہی جھنڈے تلے تقریب میں نمودار ہوئے۔

جنوبی کوریا کی خاتون باسکٹ بال کھلاڑی اور شمالی کوریا کے فٹ بالر جو کیونگ شول نے متحدہ کوریا کے جھنڈے کو تھاما ہوا تھا۔