صحت غذ١ کاروبار موبائل فون‎حیرت انگیز غزہ المیہ

ہانگ کانگ کے مارشل آرٹ اداکار جیکی چن کے مداحوں کے لیے اچھی خبر یہ ہے کہ وہ جلد ہی بولی وڈ بگ بی امیتابھ بچن کے ساتھ پہلی بار فلم میں کام کرتے نظر آئیں گے۔

جی ہاں، اطلاعات ہیں کہ 75 سالہ امیتابھ بچن اور 64 سالہ جیکی چن پہلی بار ایک بولی وڈ فلم میں ایک ساتھ جلوہ گر ہوں گے۔

یہ پہلا موقع ہوگا کہ جیکی چن کسی بھی بھارتی فلم میں جلوہ گر ہوں گے۔

اس سے قبل اگرچہ کچھ بھارتی اداکار اور اداکارائیں جیکی چن کے ساتھ چین، ہانگ کانگ اور بھارت-ہانگ کانگ کے مشترکہ منصوبوں کے تحت چند فلموں میں جلوہ گر ہوچکی ہیں، تاہم پہلی بار مارشل آرٹ کے ماہر ہیرو مکمل طور پر بولی وڈ فلم میں کام کرتے نظر آئیں گے۔

بھارتی نشریاتی ادارے ‘ممبئی مرر’ کے مطابق اطلاعات ہیں کہ 2002 میں ریلیز کی گئی تھرلر فلم ‘آنکھیں’ کے سیکوئل میں امیتابھ بچن کے ساتھ جیکی چن کو کاسٹ کیا جائے گا۔

اگرچہ جیکی چن کو کاسٹ کیے جانے کی تصدیق نہیں کی گئی، تاہم نشریاتی ادارے نے ذرائع سے بتایا کہ ہانگ کانگ کے عالمی اداکار کو فلم میں کاسٹ کیے جانے کا امکان ہے۔

خبریں ہیں کہ جیکی چن ‘آنکھیں 2‘ میں چینی کسینو یا ہوٹل کے مالک کا کردار ادا کریں گے۔

علاوہ ازیں اطلاعات ہیں کہ ‘آنکھیں’ کے سیکوئل میں امیتابھ بچن کے ساتھ نوجوان اداکار سشانت سنگھ راجپوت اور وکی کوشل کو بھی کاسٹ کیے جانے کا امکان ہے۔

یہ بھی پڑھیں: ارشد وارثی فلم ’آنکھیں‘ کے سیکوئل میں کاسٹ

خیال رہے کہ 2 روز قبل ہی ‘ایروز ناؤ’ نے اعلان کیا تھا کہ 16 سال بعد ‘آنکھیں’ کا سیکوئل بنایا جائے گا۔

پروڈکشن ہاؤس نے فلم کا سیکوئل بنانے کا اعلان کرتے ہوئے اس بات کی تصدیق کی تھی کہ فلم میں امیتابھ بچن کے ساتھ مزید کئی بڑے اداکاروں کو کاسٹ کیا جائے گا۔

‘آنکھیں’ 16 سال قبل ریلیز کی گئی تھی اور فلم نے نہ صرف باکس آفس پر اچھی کمائی کی تھی، بلکہ اسے تنقید نگاروں نے بھی سراہا تھا۔