اسلام آباد: وزارت خارجہ کے ترجمان ڈاکٹر محمد فیصل نے کہا ہے کہ گستاخانہ خاکوں کے معاملے پر ہالینڈ کے سفیر کو ملک بدر کرنے یا کوئی اور ایکشن لینے کے حوالے سے کوئی فیصلہ نہیں کیا گیا۔

ہفتہ وار میڈیا بریفنگ کے دوران ڈاکٹر محمد فیصل نے کہا کہ پاکستان نے ہالینڈ کے ناظم الامور کو طلب کر کے توہین آمیز خاکوں کے معاملے پر احتجاج کردیا تاہم خاکوں کا معاملہ او آئی سی اجلاس میں اٹھائیں گے۔

یہ بھی پڑھیں: دفتر خارجہ کا ملیحہ لودھی اور عمران خان کی ملاقات سے لاعلمی کا اظہار

انہوں نے کہا کہ ’پاکستان نے توہین آمیز خاکوں کے معاملے پر او آئی سی کو خط لکھا ہے‘۔

دفتر خارجہ کے ترجمان نے وزیر اعظم عمران خان اور امریکی سیکریٹری خارجہ مائیک پومپیو کی ٹیلی فونک گفتگو کے ٹرانسکرپٹ سے متعلق سوال کا جواب دینے سے گریز کرتے ہوئے کہا کہ پاکستان تنازع کا خاتمہ چاہتا ہے۔

ترجمان دفتر خارجہ نے کہا کہ ’وزیر خارجہ اس پر تفصلی روشنی ڈال چکے ہیں‘۔

ڈاکٹر فیصل احمد نے افغانستان میں غزنی حملے کے حوالے سے کابل کے بیانات کو محض الزامات قرار دیا۔

ان کا کہنا تھا کہ ’عافیہ صدیقی کے معاملے پر کوئی نئی معلومات نہیں ہیں‘۔

مزید پڑھیں: ڈاکٹر ملیحہ لودھی کی بنی گالا میں عمران خان سے ملاقات

ڈاکٹر محمد فیصل نے بتایا کہ ایران کے وزیر خارجہ جواد ظریف آج (30 اگست کو) پاکستان پہنچ رہے ہیں اور 2 روزہ دورے میں وزیر اعظم، وزیرخارجہ اور آرمی چیف سے ملاقاتیں کریں گے۔

ان کا کہنا تھا کہ او آئی سی کے اجلاس میں وزیر خارجہ شاہ محمود قریشی پاکستان کی نمائندگی کریں گے۔

مقبوضہ کشمیر میں انسانی حقوق کی خلاف ورزی

ڈاکٹر محمد فیصل نے بتایا کہ مقبوضہ کمشیر پر بھارتی مظالم نشر کرنے پر بھارت نے الجزیرہ ٹی وی کی نشریات پر پابندی لگادی ہے۔

ان کا کہنا تھا کہ مقبوضہ کشمیر میں انسانی حقوق کی خلاف ورزیوں کا سلسلہ جاری ہے اور گزشتہ ہفتے میں بھارتی افواج نے 10 بے گناہ کشمیریوں کو شہید کیا۔

وزارت خارجہ نے بھارتی افواج کی جانب سے پیلٹ گنز کے استعمال کی مذمت کی۔

مزید پڑھیں: پاکستان اور روس کے درمیان مشترکہ فوجی تربیت کے معاہدے پر دستخط

علاوہ ازیں انہوں نے کہا کہ پاکستان کو حریت رہنماؤں کی بگڑتی صحت اور غیر قانونی نظر بندی پر تشویش ہے۔

ڈاکٹر محمد فیصل نے عالمی برادی سے مقبوضہ کشمیر میں انسانی حقوق کی خلاف ورزی کا نوٹس لینے کا مطالبہ کیا۔

انہوں نے بتایا کہ لائن آف کنٹرول پر بھارتی اشتعال انگیزی اور شہری کی شہادت پر بھارتی ڈپٹی ہائی کمشنر کو طلب کیا گیا۔

چاہ بہار اور گوادر اعزازی بندرگاہیں

وزارت خارجہ کے ترجمان ڈاکٹر محمد فیصل نے کہا کہ چاہ بہار اور گوادر اعزازی بندرگاہیں ہیں جہاں بھارت کی موجودگی سے فرق نہیں پڑتا۔

انہوں نے کہا کہ ’ہمیں وہاں اکٹھے آگے بڑھنا ہے، ہم سرمایہ کاری کے مواقع کا جائزہ لے رہے ہیں‘.

ایک سوال کے جواب میں انہوں نے بتایا کہ ’چین پاکستان کا آہنی بھائی ہے اورسی پیک چین کا ایک فلیگ شپ منصوبہ ہے‘۔

یہ بھی پڑھیں: ’بھارت، کشمیر سے توجہ ہٹانے کیلئےتصویر کے پیچھے چھپ رہا ہے‘

انہوں نے بتایا کہ وزیراعظم نے دہشت گردی کا شکار افراد کے عالمی دن پر اظہار یکجہتی کیا۔