حال ہی میں مکس مارشل آرٹ کے آئرش باکسر مک گریگر کو شکست کا ذائقہ چکھانے والے باکسرخبیب نورماگومیدوف نے اب فلائیڈ مے ویدر کو ہرانے پر نظریں جمادیں۔

بین الاقوامی خبررساں اداروں کے مطابق سماجی رابطے کی ویب سائٹ انسٹاگرام پر روسی باکسرکے پروموٹر کی پوسٹ کی گئی ویڈیو میں وہ کہتے ہوئے دیکھے جاسکتے ہیں کہ ’چلو اٹھو فلائیڈ ، اب ہمیں لڑنا ہے‘۔

خیال رہے کہ روسی باکسر نے میک گریگور کو 6 اکتوبر کو شکست دی تھی جو گزشتہ برس فلائیڈ مےویدر کے ہاتھوں شکست کھانے کے بعد اپنا پہلا میچ لڑ رہے تھے۔

یہ بات بھی دلچسپ ہے کہ روسی باکسرخبیب کا اب تک کا ریکارڈ 0-27 ہے جبکہ انہوں نے جس امریکی باکسر کو چیلینج کیا ہے ان کا ریکارڈ اب تک 0-50 ہے یعنی دونوں باکسرز کو اب تک لڑی جانے والی تمام لڑائیوں میں سے ایک میں بھی شکست نہیں ہوئی۔

گزشتہ لڑائی میں خبیب نے میک گریگور کو جیت سے قبل ایک طاقتور مکا رسید کر کے ان کی گردن دبوچ لی تھی جس سے وہ بالکل بےبس ہوگئے تھے۔

ادھر فلائیڈ مےویدر اور مک گریگر کی لڑائی کے دسویں راؤنڈ میں امریکی باکسر آئرش باکسر کو زیر کرنے میں کامیاب ہوئے تھے جس کا حوالہ دیتے ہوئے خبیب کا کہنا تھا کہ ’ میں ہی بادشاہ ہوں کیوں کہ وہ مک گریگر کو گرانے میں کامیاب نہیں ہوسکے تھے لیکن میں نے انہیں چت کردیا تھا‘۔

یہ بھی پڑھیں: انہوں نے میرے مذہب کے بارے میں بات کی، تب ہی انہیں مارا، مسلمان فائٹر

یاد رہے کہ لاس ویگاس میں ہونے والی لڑائی کے دوران مشتعل ہوجانے پر خبیب اور میک گریگر ، دونوں کو نیواڈا اسٹیٹ اتھلیٹ کمیشن کی جانب سے تحقیقات مکمل ہونے تک معطلی کا سامنا ہے۔