’ساتھی اداکارہ کو ایک بوسہ دینا مہنگا پڑگیا‘
بولی وڈ اداکار آیوشمان کھرانہ اس وقت اپنی فلم ’بدھائی ہو‘ کی باکس آفس پر ہوئی کامیابی کا جشن منا رہے ہیں۔
ان کی فلم ’بدھائی ہو‘ حال ہی میں ریلیز ہوئی جو باکس آفس پر کامیاب ہونے کے ساتھ ساتھ تجزیہ کاروں کو بھی خوب پسند آئی۔
آیوشمان اپنی اس ہی فلم کی کامیابی کے سلسلے میں ’نو فلٹر نیہا شو‘ پر جلوہ گر ہوئے، جہاں انہوں نے کیریئر کے آغاز کا ایک ایسا واقعہ بتایا جس کی انہوں نے کبھی امید بھی نہیں کی تھی۔
آیوشمان کھرانہ نے نیہا کو بتایا کہ کس طرح ان کی ڈیبیو فلم ’وکی ڈونر‘ کی خوشی ان کے لیے افسوس میں بدل گئی اور اس فلم کے ایک واقع نے ان کی زندگی کو 3 سال تک متاثر کیا۔
اداکار کا کہنا تھا کہ ’جب میری اہلیہ نے پہلی مرتبہ ساتھ بیٹھ کر وکی ڈونر دیکھی تو اس میں موجود اداکارہ یامی گوتم کو دیے بوسے کا سین دیکھ کر وہ بےحد ناراض ہوگئیں اور تب انہوں نے میرا ہاتھ چھوڑ دیا‘۔
مزید پڑھیں: بولی وڈ ہیرو کی اہلیہ بریسٹ کینسر کا شکار
آیوشمان کے مطابق ’اس کے بعد تین سالوں تک ہمارا رشتہ اس ایک سین سے متاثر رہا، جس کے بعد آخر کار سب کچھ ٹھیک ہوگیا‘۔
انہوں نے یہ بھی بتایا کہ ان کی اہلیہ کو فلم کے اسکرپٹ کا معلوم تھا، لیکن اسکرین پر اس سین کو دیکھنے کے بعد وہ افسردہ ہوگئیں۔
طاہرہ آیوشمان کی پہلی فلم کی شوٹنگ کے دوران حاملہ تھیں جنہوں نے پہلے بیٹے کو فلم کی ریلیز سے تین ماہ قبل ہی جنم دیا۔
آیوشمان نے یہ بھی دعویٰ کیا کہ طاہرہ اب ان کے اس قسم کے سینز دیکھ کر ناراض نہیں ہوتی۔
یاد رہے کہ 35 سالہ طاہرہ کشیپ جو پیشے کے اعتبار سے لکھاری ہیں، انہوں نے رواں سال سوشل میڈیا کے ذریعے مداحوں کو بتایا تھا کہ وہ بریسٹ کینسر کا شکار ہوچکی ہیں۔
جس کے بعد اداکار آیوشمان نے رواں سال کڑوا چوتھ کے روز اپنی اہلیہ کے لیے بھوکے رہنے کا ارادہ کیا تھا۔
انہوں نے مداحوں کو بتایا تھا کہ ان کی اہلیہ اس سال ان کے لیے کھانا پینا نہیں چھوڑ سکتی اس لیے انہوں نے اپنی اہلیہ کے لیے بھوکے رہنے کا فیصلہ کیا ہے۔
واضح رہے کہ طاہرہ کشیپ نے 2011 میں آیوشمن کھرانہ سے شادی کی تھی، اس سے قبل وہ کئی سال سے ایک دوسرے سے ملتے آ رہے تھے۔
طاہرہ اور آیوشمن کھرانہ کو 2 بچے بھی ہیں، طاہرہ نے ایک کتاب بھی لکھی ہے، جب کہ انہوں نے ایک شارٹ فلم ‘ٹافی’ کو بھی بنایا ہے۔
تبصرے (0) بند ہیں