فیس بک میسنجر صارفین کا بڑا درد سر ختم ہونے کے قریب

اپ ڈیٹ 08 نومبر 2018

ای میل

— فوٹو بشکریہ فیس بک
— فوٹو بشکریہ فیس بک

دنیا کے مقبول ترین میسجنگ اپلیکشنز میں سے ایک فیس بک میسنجر صارفین کا ایک بڑا درد سر کم کرنے والی ہے۔

جی ہاں اگرچہ کمان سے نکلے تیر کی واپسی ناممکن ہے مگر بہت جلد اس ایپ میں غلطی سے بھیجے گئے پیغامات کو ضرور واپس بلانا ممکن ہوگا۔

جی ہاں فیس بک میں بہت جلد میسج ان سینڈ کا فیچر ہر ایک کے لیے متعارف ہونے والا ہے۔

تاہم صارفین کے پاس غلطی سے بھیجے گئے میسج کو ان سینڈ کرنے کے لیے صرف 10 منٹ ہوں گے، وہ بھی اگر دوسرا صارف انہیں پڑھ نہ لے۔

فیس بک کی زیرملکیت اپلیکشن واٹس ایپ میں یہ فیچر گزشتہ سال متعارف کرایا گیا تھا اور آغاز میں بھیجے گئے پیغامات کو ڈیلیٹ کرنے کے لیے 7 منٹ کا وقت دیا گیا تھا مگر اب اسے ایک گھنٹے تک بڑھا دیا گیا ہے۔

یہ بھی پڑھیں : واٹس ایپ کا میسج ڈیلیٹ کا فیچر آفیشلی متعارف

فیس بک میسنجر میں یہ نیا فیچر آئی او ایس کے ورژن 191.0 کے ریلیز نوٹ میں کمنگ سون کے طور پر موجود ہے۔

اگرچہ 10 منٹ غلطی سے بھیجے گئے پیغام کی واپسی کے لیے کچھ زیادہ نہیں مگر پھر بھی اسے ابتدائی پر کارآمد ہی سمجھا جاسکتا ہے۔

خیال رہے کہ رواں سال اپریل میں ایک رپورٹ میں یہ انکشاف سامنے آیا تھا کہ فیس بک خاموشی سے اپنے سی ای او مارک زکربرگ کے میسنجر پر بھیجے جانے والے پیغامات کو ڈیلیٹ کررہی ہے۔

اس انکشاف کے بعد کمپنی نے اعلان کیا کہ بھیجے جانے والے پیغامات کو واپس بلانے کا فیچر بہت جلد تمام میسنجر صارفین کو دستیاب ہوگا۔

میسنجر میں اس وقت سیکرٹ کنورزیشن موڈ موجود ہے، جس میں صارف اپنے پیغامات کو خودکار طور پر ختم کرنے کا وقت طے کرسکتے ہیں۔

مزید پڑھیں : فیس بک میسنجر کے 8 ' خفیہ فیچر'

واٹس ایپ کے علاوہ فیس بک کی زیرملکیت ایک اور ایپ انسٹاگرام میں بھی ان سینڈ کا فیچر موجود ہے۔