انٹرنیشنل کرکٹ کونسل (آئی سی سی) نے سری لنکا کے سابق فاسٹ باؤلر دلہارا لوکوہیٹگے کو ٹی ٹین لیگ کے پہلے سیزن میں فکسنگ کے الزام میں معطل کردیا۔

سری لنکا سے تعلق رکھنے والے 38 سالہ فاسٹ باؤلر دلہارا پر ایمریٹس کرکٹ بورڈ کے اینٹی کرپشن کوڈ کی خلاف ورزی کے بھی الزامات عائد کیے گئے ہیں۔

خیال رہے کہ شارجہ میں گزشتہ برس شروع ہونے والی ٹی ٹین لیگ میں 6 ٹیمیں حصہ لیتی ہیں جو کرکٹ کی دنیا میں اپنے طرز کی نئی لیگ ہے۔

دلہارا ٹی ٹین لیگ میں فکسنگ کے الزامات کی تفتیش کے دوران لپیٹ میں آنے والے تیسرے سری لنکن کھلاڑی ہیں، اس سے قبل سابق فاسٹ باؤلر نووان زوئیسا اور سابق کپتان سنتھ جے سوریا پر الزامات عائد کیے جاچکے ہیں۔

یہ بھی پڑھیں: آئی سی سی کے جے سوریا پر کرپشن کے الزامات

آئی سی سی کا اس حوالے سے کہنا تھا کہ دلہارا لوکوہیٹگے کے خلاف ایکشن لیا گیا ہے۔

آئی سی سی سے جاری اعلامیے کے مطابق ‘ٹی ٹین لیگ کے حوالے سے ابتدائی الزامات پر لوکوہٹیگے کو عبوری طور پر معطل کردیا گیا جس کا اطلاق فوری طور پر ہوگا’۔

اعلامیے میں مزید کہا گیا ہے کہ ‘لوکوہٹیگے میچ کو فکس کرنے یا خلل ڈالنے، میچ کے نتیجے پر اثر انداز ہونے اور ایک کھلاڑی کو براہ راست اکسانے کے عمل میں شریک تھے’۔

آئی سی سی کا کہنا ہے کہ ان پر فکسنگ کے لیے ہونے والی کسی بھی پیش کش اور دعوت کے حوالے سے مکمل تفصیلات فراہم نہ کرنے کا بھی الزام ہے۔

مزید پڑھیں: سابق سری لنکن کرکٹر زوئیسا پر میچ فکسنگ کے الزامات

دلہارا لوکوہٹیگے نے 2005 سے 2013 کے دوران سری لنکا کی جانب سے 9 ایک روزہ اور 2 ٹی ٹوئنٹی میچ کھیلے تھے۔

فاسٹ باؤلر کرکٹ میں میچ فکسنگ کے حوالے سے قطری نشریاتی ادارے 'الجزیرہ' میں نشر ہونے والی ڈاکیومنٹری میں نظر آئے تھے جہاں وہ ایک میچ میں فکسنگ کے حوالے سے بات کر رہے تھے۔

آئی سی سی کے اینٹی کرپشن یونٹ کے سربراہ الیکس مارشل کا کہنا تھا کہ گزشتہ ماہ سری لنکا میں بڑی تعداد میں رپورٹس اور تفتیش میں یہ بات سامنے آئی تھی کہ کرپشن کی جڑی مضبوط ہیں۔

ان کا کہنا تھا کہ ٹی ٹوئنٹی اور دیگر ٹورنامنٹس کی فراوانی نے ان لوگوں کے لیے بڑے مواقع پیدا کردیے ہیں جو کھلاڑیوں کو کرپٹ کرنے کی کوششیں کررہے تھے۔