پاکستان میں 4.5 جی ٹیکنالوجی براڈ بینڈ کی شکل میں تو دستیاب ہے مگر موبائل فونز صارفین کے لیے پہلی بار ایک کمپنی نے اسے متعارف کرانے کا دعویٰ کیا ہے۔

ٹیلی نار پاکستان نے دعویٰ کیا ہے کہ وہ کراچی، لاہور، راولپنڈی اور اسلام آباد میں 4.5 جی موبائل نیٹ ورک متعارف کرا رہی ہے جو کہ صارفین کو انتہائی تیز رفتار ڈیٹا نیٹ ورک کی سہولت فراہم کرے گا۔

مزید پڑھیں : پاکستان میں پہلی بار 4.5 جی انٹرنیٹ سروس متعارف

کمپنی کے مطابق یہ جدید ایل ٹی وی نیٹ ورک کو مزید تیز کرنے کی جانب قدم ہے اور اس وقت اس کے 80 فیصد صارفین تھری یا فورجی استعمال کررہے ہیں اور یہ نئی ٹیکنالوجی کسی سنگ میل سے کم نہیں۔

کمپنی کی جانب سے جاری بیان کے مطابق ہم نے 4.5 جی کو متعارف کرا دیا ہے جو کہ مستقبل میں فائیو جی کی جانب سے بڑھنے کے لیے پل بنے گی۔

اس ٹیکنالوجی سے صارفین کو تیز تر اپ لوڈنگ اور ڈاﺅن لوڈنگ اسپیڈ کے ساتھ دیگر ویب سروسز کی اسپیڈ میں نمایاں تیزی محسوس ہوگی، تاہم موبائل آپریٹر کمپنی نے یہ واضح نہیں کیا کہ 4.5 جی میں ڈاﺅن لوڈ یا اپ لوڈنگ اسپیڈ کیا ہوگی۔

یہ بھی پڑھیں : پاکستان میں 200 ایم بی پی ایس انٹرنیٹ اسپیڈ کا ریکارڈ

اس کمپنی کے تمام 4 جی صارفین کو اس نئی ٹیکالوجی کی تیز تر رفتار مطابقت رکھنے والے فونز میں خودکار طور پر مل جائے گی۔

کمپنی کا کہنا ہے کہ 4.5 جی فیچرز کو کراچی، لاہور، راولپنڈ یاور اسلام آباد میں ایکٹیویٹ کیا جاچکا ہے۔

پاکستان میں اس سے پہلے 4.5 جی انٹرنیٹ سروس کو گزشتہ سال وائی ٹرائب نے متعارف کرایا تھا جو کہ گھریلو صارفین کے لیے براڈ بینڈ پیکجز کی صورت میں دستیاب تھی۔

تبصرے (1) بند ہیں

KHAN Dec 06, 2018 07:29pm
3 جی اور 4 جی کی تو نیلامی ہوئی تھی اور اس سے حکومت کو کافی آمدنی ہوئی۔ 4.5 جی کیا بغیر نیلامی ہی شروع کی جارہی ہے؟۔ اگر ہاں تو کس کی اجازت سے۔ 5 جی کی نیلامی بھی ہوگی یا نہیں؟