کک باکسنگ چیمپیئن شپ: سندھ پولیس کے کمانڈو نے بھارتی حریف کو شکست دے دی

پاکستان کے خان سعید بھارتی کھلاڑی کو شکست دینے کے بعد قومی پرچم کے ہمراہ — تصویر بشکریہ ٹوئٹر
پاکستان کے خان سعید بھارتی کھلاڑی کو شکست دینے کے بعد قومی پرچم کے ہمراہ — تصویر بشکریہ ٹوئٹر

سندھ پولیس کے کمانڈو کی عمدہ کارکردگی کی بدولت پاکستان نے بین الاقوامی کک باکسنگ چیمپیئن شپ میں بھارت کو شکست دے دی۔

چوتھی انٹرنیشنل مارشل آرٹ/کک باکسنگ چیمپیئن شپ بنکاک میں منعقد ہوئی جس میں پاکستان کی نمائندگی سندھ پولیس کے ایس ایس یو کمانڈو خان سعید نے کی۔

پہلے راؤنڈ میں خان سعید نے 2 منٹ کے اندر مارشل آرٹس کی تکنیک کو بہترین اور عمدہ طریقے سے استعمال میں لاتے ہوئے انتہائی معیاری کھیل پیش کیا اور بھارت کے کھلاڑی تیجاسوی واسو شیمہ کو شکست سے دوچار کر کے کامیابی اپنے نام کی۔

ایس ایس یو کمانڈو خان سعید نے اپنی جیت کے سلسلے کو آگے بڑھاتے ہوئے گزشتہ روز کک باکسنگ مقابلے میں نیوزی لینڈ کے کھلاڑی کو شکست دی تھی۔

آئی جی سندھ ڈاکٹر سید کلیم امام نے بین الاقوامی مارشل آرٹ/کک باکسنگ چیمپیئن شپ میں پاکستان اور سندھ پولیس کی نمائندگی کرنے والے ایس ایس یو کمانڈو خان سعید کی کارکردگی کو سراہتے ہوئے شاباش دی اور نقد انعام کا اعلان کیا۔

یاد رہے کہ خان سعید ماضی میں مارشل آرٹس کے عالمی چیمپیئن رہنے کے ساتھ ساتھ متعدد مقامی اور بین الاقوامی مقابلوں میں کامیابی حاصل کرچکے ہیں۔

تبصرے (1) بند ہیں

KHAN Mar 14, 2019 06:50pm
خان سعید کو بہت بہت مبارکباد