صحت غذ١ کاروبار موبائل فون‎حیرت انگیز غزہ المیہ

لاہور: ملک میں پانی کے سب سے بڑے ذخیرے تربیلا ڈیم میں آئندہ ہفتے پانی کی سطح خطرناک حد تک پہنچنے کا خدشہ ہے۔

تربیلا ڈیم میں ذخیرے کی سطح 1393.35 فِٹ ہے جو 1392 فٹ کی خطرناک سطح سے صرف 1.35 فٹ دور ہے۔

تاہم انڈس ریور سسٹم اتھارٹی (ارسا) کے مطابق صورتحال تشویش ناک نہیں کیونکہ ڈیم میں پانی کا بہاؤ آئندہ ماہ درجہ حرارت کے بڑھنے کے بعد برف کے پگھلنے اور جولائی کے مہینے میں مون سون سے بڑھے گا۔

ارسا کے ترجمان نے ڈان سے گفتگو کرتے ہوئے وضاحت کی کہ ’ذخیرے میں جنوری کے مہینے میں بارشوں کے باعث پانی مناسب سطح تک تھا جس کے بعد ہم نے بارشوں کا پانی صوبوں کو دیا جس سے پانی میں 38 سے 32 فیصد کمی ہوئی، صوبے (پنجاب اور سندھ) نے بھی اس میں سے اپنا برابری کا حصہ لیا اور صوبوں کو جاری کیے جانے والے پانی میں اضافے کے باوجود ذخیرے میں پانی خطرناک سطح سے 1.35 فِٹ اوپر ہے‘۔

ان کا کہنا تھا کہ سندھ اور جنوبی پنجاب کو گندم کی فصل کے بڑھنے کی وجہ سے پانی کی ضرورت نہیں جبکہ اتھارٹی شمالی پنجاب کو آج کل فصلوں کو پانی دینے کے لیے دریائے چناب اور منگلا ڈیم سے پانی دیا جارہا ہے۔

انہوں نے کہا کہ ’اس کے علاوہ دونوں صوبوں کو پینے اور دیگر استعمال کے لیے پانی فراہم کیا جارہا ہے‘۔

حکام نے دعویٰ کیا کہ ’ڈیم میں پانی کی خطرناک سطح گزشتہ ماہ کے آخر میں عبور کرنا تھی تاہم صوبوں کو پانی دیے جانے کے باوجود اب بھی یہ اس سطح پر نہیں آئی جو کوئی خلاف معمول بات ظاہر نہیں کرتا‘۔

ان کا کہنا تھا کہ ارسا کو امید ہے کہ ملک کے شمالی علاقوں میں برف کے پگھلنے پر تربیلا ڈیم کو زیادہ سے زیادہ پانی ملے گا، برف پگھلنے کا آغاز درجہ حرارت کے بڑھنے پر اپریل کے پہلے ہفتے سے ہوگا جس کی وجہ سے اپریل میں ہمارے پاس بڑی مقدار میں پانی ہوگا کیونکہ ڈیم میں 70 سے 80 فیصد پانی برف کے پگھلنے سے ہی آتا ہے۔

حکام کا کہنا تھا کہ ’بقیہ 20 سے 30 فیصد پانی جولائی کے مہینے میں مون سون سے ذخیرے میں شامل ہوگا‘۔