سری لنکا کرکٹ بورڈ نے پاکستان انڈر 19 کے دورے کی میزبانی سے متعلق پاکستان کرکٹ بورڈ (پی سی بی) سے معذرت کرلی۔

ذرائع کے مطابق سری لنکا کرکٹ بورڈ نے پی سی بی کے سیکیورٹی کی یقین دہانی سے متعلق خط کے جواب میں کہا ہے کہ انہوں نے پاکستان انڈر 19 ٹیم کا دورہ منسوخ کرنے کا فیصلہ کیا ہے۔

سری لنکن حکام کا کہنا تھا کہ اس وقت ان کا ملک کسی بھی دوسرے ملک کی ٹیم کی میزبانی کرنے کی حالت میں نہیں ہے۔

تاہم ذرائع کا کہنا ہے کہ پاکستان کرکٹ بورڈ کی جانب سے سری لنکن بورڈ کو نیوٹرل مقام پر کھیلنے کی تجویز دی گئی تھی لیکن انہوں نے اس پر بھی معذرت کرلی تھی۔

مزید پڑھیں: پاکستان انڈر 19 ٹیم کا دورہ سری لنکا سیکیورٹی یقین دہانی سے مشروط

سری لنکن حکام نے پی سی بی کو ارسال کیے جانے والے اپنے خط میں کہا کہ ملک میں حالات معمول پر آنے کے بعد کرکٹ دوبارہ بحال کی جائے گی۔

خیال رہے کہ 21 اپریل کو کولمبو میں گرجا گھروں اور ہوٹلوں میں ہونے والے دھماکوں میں 300 سے زائد افراد ہلاک ہوئے تھے، جس کے بعد ملک میں کرفیو نافذ کردیا گیا تھا۔

واضح رہے کہ پی سی بی نے پاکستان انڈر 19 ٹیم کے دورہ سری لنکا کو سیکیورٹی سے مشروط قرار دیا تھا۔

پی سی بی ترجمان نے 21 اپریل کو کہا تھا کہ یہ دورہ میزبان کرکٹ بورڈ اور حکومت کی جانب سے دی جانے والی سیکیورٹی کلیئرنس سے مشروط ہوگا۔

یہ بھی پڑھیں: سری لنکا نے ملنگا کو ورلڈ کپ سے قبل ٹیم کی قیادت سے ہٹا دیا

ان کا کہنا تھا کہ دھماکوں کے بعد صورتحال کا جائزہ لیا جارہا ہے، تاہم سیکیورٹی کی مکمل یقین دہانی کے بعد ہی قومی انڈر 19 ٹیم کو سری لنکا بھیجنے کا فیصلہ کیا جائے گا۔

تاہم اس حوالے سے پی سی بی کی جانب سے سری لنکن کرکٹ بورڈ کو خط بھی لکھا گیا تھا۔

پاکستان انڈر 19 ٹیم کو 30 اپریل کو سری لنکا روانہ ہونا تھا جہاں اسے 2 چار روزہ جبکہ 3 ایک روزہ میچز کھیلنے تھے۔