جب پولیس اور فائر فائٹرز نے گٹر میں پھنسی گلہری کو آزاد کرایا

23 جون 2019
یہ واقعہ جرمنی میں پیش آیا — اے پی فوٹو
یہ واقعہ جرمنی میں پیش آیا — اے پی فوٹو

اگر پاکستان میں ایک گلہری کسی وجہ سے گٹر کے ڈھکن میں پھنس جائے تو اس بات کے امکانات زیادہ ہیں کہ لوگ اسے بچانے کی بجائے نظرانداز کردیں گے مگر جرمنی میں اس طرح کے واقعے پر بالکل مختلف ردعمل دیکھنے میں آیا۔

جرمن شہر ڈورٹمنڈ میں ایک سرخ گلہری گٹر کے ڈھکن کے سوراخ میں پھنس گئی جس کے بعد ایک زبردست ریسکیو آپریشن دیکھنے میں آیا اور اس جانور کو آزاد کرایا گیا اور اس کی تصاویر و تفصیلات نے انٹرنیٹ پر لاکھوں افراد کو دنگ کردیا۔

گلہری کو آزاد کرانے کے لیے فائر فائٹرز، پولیس اہلکاروں اور ایک جانوروں کے طبی مرکز کے افراد نے مل کر کام کیا اور اس کی آزادی کو ممکن بنایا۔

ڈورٹمنڈ فائر ڈیپارٹمنٹ کے مطابق انہیں اس حوالے سے ایک کال موصول ہوئی تھی کہ ایک پارک کے برابر میں واقع گٹر میں ایک گلہری پھنس گئی ہے۔

جب فائر فائٹرز اس جگہ پہنچے تو انہوں نے دیکھا کہ گلہری کا سر گٹر کے کور کے سوراخ سے باہر نکلا ہوا ہے جبکہ باقی جسم نیچے پھنس گیا ہے۔

اسے آزاد کرانے کے لیے ابتدائی کوششیں ناکام ہونے پر مین ہول کے ڈھکن کو ہی نکال لیا گیا اور پھر اسے پھنسی ہوئی گلہری کے ساتھ ایک قریبی جانوروں کے طبی مرکز پہنچایا گیا جبکہ اس موقع پر پولیس نے کھلے گٹر کی حفاظت کا کام کیا۔

طبی ماہرین نے ادویات کے ذریعے پہلے گلہری کو بے ہوش کیا اور پھر اسے ڈھکن سے باہر نکال لیا۔

بعد ازاں اس کی گردن کے زخم کا علاج بھی کیا گیا اور ان کا کہنا تھا کہ اسے بہت جلد دوبارہ پارک میں چھوڑ دیا جائے گا۔

اس سے قبل رواں سال فروری میں جرمن شہر فرینکفرٹ کے قریب بھی ایک چوہا گٹر کے ڈھکن کے سوراخ میں پھنس گیا تھا جسے 9 فائر فائٹرز نے ایک مقامی این جی او کے ساتھ مل کر کافی جدوجہد کے بعد آزاد کرایا۔

تبصرے (0) بند ہیں