پاکستان تحریک انصاف (پی ٹی آئی) کی حکومت کو ایک سال مکمل ہونے پر وزیر اعظم عمران خان 18 اگست کو قوم سے خطاب کریں گے اور انہیں ایک سالہ کارکردگی پر اعتماد میں لیں گے۔

وزیر اعظم آفس نے تمام وزارتوں اور ڈویژنز سے ایک سال کے دوران حاصل ہونے والی 5 بڑی کامیابیوں کی رپورٹ 9 اگست تک طلب کرلی ہے۔

وزیر اعظم آفس سے جاری بیان کے مطابق وزیر اعظم عمران خان تمام وزارتوں کی ایک سال کی کارکردگی کا جائزہ لیں گے۔

وفاقی حکومت کی ایک سالہ کارکردگی رپورٹ باضابطہ طور پر جاری بھی کی جائے گی، جبکہ حکومت کے ایک سال مکمل ہونے پر مختلف تقریبات بھی ہوں گی۔

صوبائی حکومتوں سے بھی کہا گیا ہے کہ وہ اپنی ایک سالہ کارکردگی کی تفصیلی رپورٹس جار کریں۔

بیان میں کہا گیا کہ وزیر اعظم عمران خان حکومت کے ایک سال مکمل ہونے پر 18 اگست کو قوم سے خطاب کریں گے اور ایک سالہ کارکردگی سے متعلق قوم کو آگاہ کریں گے۔

واضح رہے کہ متعدد بار وزارتوں، ڈویژنز اور کابینہ اراکین سے کہہ چکے ہیں کہ عوام کی توقعات پر پورا اترنے اور ملک کو موجودہ صورتحال سے نکالنے کے لیے انہیں غیر معمولی کارکردگی دکھانا ہوگی۔

ایک سال کی حکومتی عرصے کے دوران وزیر اعظم نے کئی بار مختلف وزارتوں کی کارکردگی کا جائزہ لیا اور وزرا و حکام کو بہتری کے لیے ہدایات بھی دیں۔