64 میگا پکسل کیمرے والے فون کی پہلی جھلک

08 اگست 2019

ای میل

— فوٹو بشکریہ رئیل می
— فوٹو بشکریہ رئیل می

رئیل می دنیا کی پہلی کمپنی بننے والی ہے جو 64 میگا پکسل کیمرے والا اسمارٹ فون متعارف کرانے والی ہے اور اب اس نے پہلی جھلک بھی جاری کردی ہے۔

اس فون کا نام تو نہیں بتایا گیا مگر اس کے بیک پر 4 کیمرے دیئے گئے ہیں، جن میں مین سنسر 64 میگا پکسل کا ہے۔

اس وقت جن فونز میں 48 میگا پکسل کیمرا سنسر دیئے گئے ہیں، وہ 12 میگا پکسل تصاویر شوٹ کرتے ہیں، جن میں 4 پکسلز کو ایک کردیا جاتا ہے جبکہ رئیل می کے فون میں سام سنگ کا جی ڈبلیو 1 سنسر استعمال کیا گیا ہے جو بائی ڈیفالٹ 16 میگا پکسل تصاویر کھینچتا ہے۔

اس کیمرے سے 9216x6912 حجم کی تصاویر لی جاسکتی ہیں اور زوم کرنے سے بہت زیادہ تفصیلات کو بھی دیکھا جاسکتا ہے۔

یہ فون رواں ہفتے ہی متعارف کرایا جارہا ہے اور تب ہی اس کی دیگر تفصیلات بھی سامنے آئیں گی۔

کمپنی کی جانب سے ٹوئٹر پر اس فون کے 64 میگا پکسل کیمرے کی تصویر کو شیئر کیا گیا۔

ٹوئیٹ میں لکھا تھا دنیا کے پہلے 64 میگا پکسل کواڈ کیمرا فون کے لیے تیار ہوجائیں، جو کہ مستقبل کا فون ہوگا۔

اس فون کو ممکنہ طور پر رئیل می 5 یا 5 پرو کا نام دیا جائے گا۔