اٹلس ہونڈا نے اپنی موٹرسائیکلوں کی قیمتوں میں 2 ماہ کے دوران دوسری مرتبہ اضافہ کردیا ہے۔

پرو پاکستانی کی رپورٹ کے مطابق اٹلس ہونڈا نے موٹر سائیکلوں کے مختلف ماڈلز کی قیمتوں میں 6 سو سے 5 ہزار روپے کا اضافہ کیا، جس کا اطلاق یکم نومبر سے ہوگا۔

کمپنی کی جانب سے ہونڈا سی ڈی 70 اور سی ڈی ڈریم کی قیمتوں میں 600 روپے کا اضافہ کیا گیا۔

اس نئے اضافے کے بعد سی ڈی 70 کی قیمت 74 ہزار 900 روپے سے بڑھ کر 75 ہزار 500 روپے، جبکہ سی ڈی 70 ڈریم کی قیمت 78 ہزار 900 سے بڑھ کر 79 ہزار 500 روپے ہوگئی ہے۔

ہونڈا پرائڈر 100 سی سی کی قیمت کوئی اضافہ نہیں ہوا اور وہ بدستور ایک لاکھ 500 روپے میں فروخت کی جائے گی۔

سی جی 125 کی قیمت ایک ہزار روپے اضافے کے بعد ایک لاکھ 24 ہزار 500 سے بڑھ کر ایک لاکھ 25 ہزار 500 روپے، سی جی 125 ایس کی قیمت 1600 روپے اضافے سے ایک لاکھ 46 ہزار 900 سے بڑھ کر ایک لاکھ 48 ہزار 500 روپے، سی جی 125 ایس اسپیشل ایڈیشن کی قیمت ایک لاکھ 48 ہزار 900 روپے سے بڑھ کر ایک لاکھ 50 ہزار 500 روپے ہوجائے گی۔

سی بی 125 ایف کی قیمت میں 2 ہزار کا اضافہ کیا گیا ہے او راب یہ ایک لاکھ 70 ہزار 500 روپے سے بڑھ کر ایک لاکھ 72 ہزار 500 روپے جبکہ سی بی 125 ایف اسپیشل ایڈیشن کی قیمت ایک لاکھ 72 ہزار 500 روپے سے بڑھا کر ایک لاکھ 74 ہزار 500 روپے کردی گئی ہے۔

سی بی 150 ایف کی قیمت 5 ہزار روپے اضافے سے 2 لاکھ 9 ہزار500 روپے سے بڑھ کر 2 لاکھ 14 ہزار 500 روپے ہوگئی ہے۔

سی بی 250 ایف کی قیمت میں کوئی تبدیلی نہیں ہوئی اور وہ بدستور 6 لاکھ 40 ہزار روپے ہے۔

اس سے قبل اٹلس ہونڈا نے رواں سال کے دوران کم از کم 4 مرتبہ موٹرسائیکلوں کی قیمتوں میں اضافہ کیا، جس کی وجہ روپے کے مقابلے میں ڈالر کی قدر میں اضافہ قرار دیا گیا تھا۔

اس مرتبہ کمپنی کی جانب سے قیمتوں میں اضافے کی وجہ تو نہیں بتائی گئی رپورٹ کے مطابق فروخت میں سست روی اور غیریقینی اقتصادی صورتحال کو جواز بنایا گیا۔

خیال رہے کہ اٹلس ہونڈا کی جانب سے 90 فیصد سے زائد لوکلائزیشن کے دعوے کے باجود 2018 میں کم از کم 6 مرتبہ قیمتوں میں اضافہ کیا گیا۔