واشنگٹن: فلوریڈا میں امریکی بحریہ کے ایک اڈے پر گزشتہ ہفتے سعودی فضائیہ کے لیفٹیننٹ کی جانب سے فائرنگ کے واقعے کے بعد زیر تربیت 175 سعودی عسکری ہوا بازوں کو 'حفاظتی اقدامات' کے تحت گراؤنڈ کردیا گیا۔

واضح رہے کہ گزشتہ ہفتے سعودی فضائیہ کے 21 سالہ اہلکار لیفٹیننٹ محمد سعید الشامرانی نے فائرنگ کرکے 3 افراد کو ہلاک کردیا تھا۔

مزید پڑھیں: ’امریکی بحری اڈے پر حملہ کرنے والا سعودی فضائیہ کا اہلکار تھا'

بعدازاں پولیس کی فائرنگ سے محمد سعید الشامرانی ہلاک ہوگیا تھا۔

ڈان اخبار میں شائع رپورٹ کے مطابق ایف بی آئی نے کہا کہ امریکی تفتیش کاروں کا خیال ہے کہ سعودی فضائیہ کے زیر تربیت اہلکار نے فلوریڈا کے شہر پینساکولا میں بحریہ کے ایک اڈے پر تنہا کارروائی کی۔

مذکورہ واقعے کے بعد یمن میں جنگ اور گزشتہ برس واشنگٹن پوسٹ کے کالم نگار جمال خاشقجی کے قتل کے معاملے پر کانگریس میں سعودی عرب اور امریکا کے تعلقات پر ایک مرتبہ پھر سوالات اٹھائے جارہے ہیں۔

واضح رہے کہ گزشتہ برس اکتوبر میں سعودی شاہی خاندان اور ولی عہد محمد بن سلمان کے اقدامات کے سخت ناقد سمجھے جانے والے سعودی صحافی جمال خاشقجی کو مبینہ طور پر استنبول میں قائم سعودی سفارتخانے میں قتل کردیا گیا تھا۔

یہ بھی پڑھیں: امریکی بحریہ کے اہلکار کی فوجی اڈے میں فائرنگ، 3 افراد ہلاک

امریکی خفیہ ادارے سی آئی اے اور دیگر مغربی حکومتوں نے الزام لگایا تھا کہ محمد بن سلمان نے صحافی خاشقجی کے قتل کے احکامات جاری کیے تھے تاہم سعودی حکام کا کہنا تھا کہ اس میں ولی عہد کا کوئی کردار نہیں تھا۔

علاوہ ازیں اقوام متحدہ نے سعودی ولی عہد اور دیگر سعودی حکام کے خلاف تحقیقات کا مطالبہ کیا تھا۔

فلوریڈا میں امریکی بحریہ کے ایک اڈے پر حملے کے بعد زیر تربیت سعودی ہوا بازوں کے لیے صورتحال مایوس کن ہوگئی۔

اس ضمن میں امریکی بحریہ کے ترجمان لیفٹیننٹ آندریانا جینولیڈی نے بتایا سعودی عرب کے زیر تربیت عسکری ہوابازوں کے لیے حفاظتی اقدامات اور 'آپریشنل تعطل' (9 دسمبر) سے شروع ہوا'۔

ایک اور امریکی عہدے دار کا کہنا تھا کہ سعودی طالبعلموں کو گراؤنڈ کرنے کا مقصد بالآخر انہیں اپنی تربیت دوبارہ شروع کرنے کے لیے تیار کرنا ہے اور اگر ایسا کوئی واقعہ امریکی فوجی دستے میں پیش آتا تو اسی طرح کا طریقہ کار اختیار کیا جاتا۔

مزید پڑھیں: جمال خاشقجی کا قتل: محمد بن سلمان کی بادشاہت خطرے میں پڑگئی؟

آندریانا جینولیڈی نے کہا کہ گراؤنڈنگ میں 3 مختلف فوجی سہولیات شامل ہیں، جس میں نیول ایئر اسٹیشن پینساکولا، نیول ایئر اسٹیشن وائٹ فیلڈ اور نیول ایئر اسٹیشن میپورپورٹ ہے اور یہ تمام فلوریڈا میں ہی ہیں۔