گزشتہ سال دسمبر کے اختتام پر چین کے صوبے ہوبے کے شہر ووہان سے شروع ہونے والے کورونا وائرس نے اس وقت دنیا کے 180 سے زائد ممالک کو اپنی لپیٹ میں لے لیا ہے جس کی وجہ سے دنیا میں 72 ہزار سے زائد افراد اس وائرس کا شکار ہو کر جان کی بازی ہار چکے ہیں۔

کورونا وائرس کے اعداد وشمار جمع کرنے والی ویب سائٹ کے مطابق پیر کی شب تک دنیا میں کورونا وائرس کے متاثرین کی تعداد 13 لاکھ 9 ہزار سے زائد ہوچکی تھی جبکہ ہلاکتیں 72ہزار 638 تک پہنچ گئی تھیں۔

علاوہ ازیں مذکورہ ویب سائٹ کے مطابق متاثرین کی سب سے زیادہ تعداد امریکا میں موجود تھی جو 3 لاکھ 47 ہزار سے زائد ہوچکی تھی جبکہ اٹلی میں سب سے زیادہ ہلاکتیں 16 ہزار سے زائد ہو چکی تھیں۔

اگر کورونا وائرس کے متاثرین کی بات کی جائے تو امریکا کے بعد وائرس متاثرین کی تعداد سب سے زیادہ اسپین میں ہے جہاں یہ ایک لاکھ 35 ہزار سے تجاوز کرچکی ہے، اس کے بعد اٹلی میں ایک لاکھ 28 ہزار سے زائد، جرمنی میں ایک لاکھ سے زائد، فرانس میں 93 ہزار سے زائد، ایران میں 60 ہزار سے زائد اوع برطانیہ میں یہ تعداد 48 ہزار سے تجاوز کرچکی تھی۔

ادھر ہلاکتوں کی بات کی جائے تو وائرس سے سب سے زیادہ اٹلی میں ہلاکتیں ہوئیں جس کے بعد اسپین میں 13 ہزار سے زائد، فرانس میں 8 ہزار سے زائد، برطانیہ میں 4 ہزار 934، ایران میں 3 ہزار 739 اور امریکا کے شہر نیویارک میں 3 ہزار 48 اموات ہوچکی ہیں۔

واضح رہے کہ دنیا میں 2 لاکھ 73 ہزار سے زائد افراد صحتیاب بھی ہوچکے ہیں۔

خیال رہے کہ چین، جسے وائرس کا مرکز سمجھا جاتا ہے، میں متاثرین کی تعداد 82 ہزار 665 تھی جن میں 77 ہزار 310 افراد صحتیاب ہوچکے تھے جبکہ 3 ہزار 212 افراد ہلاک بھی ہوئے، چینی حکام کا دعویٰ ہے کہ انہوں نے وائرس پر کنٹرول حاصل کرلیا ہے تاہم دنیا کے دیگر ممالک میں یہ تیزی سے پھیل رہا ہے۔

واضح رہے کہ کورونا وائرس کے بڑھتے ہوئے خطرے کی روک تھام کے لیے دنیا کے تقریبا تمام ہی ممالک نے مکمل یا جزوی لاک ڈاؤن کر رکھا ہے جبکہ اکثر نے اپنی سرحدیں بند کردی ہیں۔

علاوہ ازیں دنیا بھر میں تمام ایئر لائنز بند ہیں اور صرف مال بردار طیاروں کو ایئر پورٹس سے اڑان بھرنے اور لینڈنگ کی اجازت دی جا رہی ہے۔