حکومت پنجاب نے صوبے کے 4 شہروں کے مختلف علاقوں میں اسمارٹ لاک ڈاؤن نافذ کردیا۔

سیکرٹری پرائمری اینڈ سیکنڈری ہیلتھ کیئر کیپٹن (ر) محمد عثمان سے جاری نوٹی فکیشن کے مطابق سیالکوٹ میں کلاں لدھڑ اور ٹاون غازی پور میں اسمارٹ لاک ڈاؤن نافذ کیا گیا ہے۔

واہ کینٹ میں وارڈ 3، وارڈ 8 اور یو سی سرائے کالا میں جبکہ گجرات میں محلہ کالو پورہ، چاہ ترنگ اور گاؤں مدینہ سیداں میں اسمارٹ لاک ڈاؤن نافذ کیا گیا ہے۔

اسی طرح گوجرانوالہ میں نندی پور، اروپ ٹاؤن اور قلعہ دیدار سنگھ میں اسمارٹ لاک ڈاؤن نافذ کیا گیا ہے۔

نوٹی فکیشن میں کہا گیا ہے کہ اسمارٹ لاک ڈاؤن والے علاقوں میں بنیادی اشیائے ضروریہ بدستور میسر رہیں گی۔

کیپٹن (ر) محمد عثمان نے کہا کہ اسمارٹ لاک ڈاؤن کا مقصد زیادہ کیسز والے علاقوں سے لوگوں کی آمد و رفت کو محدود کرنا ہے، صوبہ بھر میں اسمارٹ لاک ڈاؤن سے بہترین نتائج حاصل ہو رہے ہیں اور این سی او سی کی مشاورت سے حکومت پنجاب کورونا وائرس پر قابو پانے کے لیے بہترین لائحہ عمل اپنا رہی ہے۔

تبصرے (0) بند ہیں