ویتنام میں کورونا کے 40 نئے کیسز، تیسری موت کی تصدیق

02 اگست 2020

ای میل

ویتنام میں ہفتہ کو کورونا وائرس کے تین درجن سے زائد نئے کیسز سامنے آئے جبکہ ملک میں وبا سے پہلی ہلاکت کے اگلے روز ہی تیسرا شخص بھی جان سےہاتھ دھو بیٹھا۔

غیر ملکی خبر ایجنسی 'اے پی' کے مطابق ویتنام کو کورونا سے نبردآزما ہونے میں عالمی سطح پر کامیاب ملک کے طور پر دیکھا جارہا تھا جہاں 99 روز میں مقامی سطح پر وائرس کی منتقلی کا کوئی کیس سامنے نہیں آیا تھا

تاہم ایک ہفتے قبل ڈانانگ کے ہسپتال میں مقامی منتقلی کا کورونا کا پہلا کیس سامنے آیا تھا جس کے بعد یہ ملک کے تین بڑے شہروں سمیت چھ حصوں میں پھیل گیا تھا، جس کے باعث انتظامیہ کو مجبوراً پابندیاں عائد کرنی پڑی تھیں۔

ہفتہ کو سامنے آنے والے 40 نئے کیسز میں سے 32 ڈانانگ کے ہسپتالوں میں ہی سامنے آئے، 6 مقامی سطح پر منتقل ہوئے جبکہ 2 کیس انڈونیشیا سے واپس ملک لوٹنے والے ویتنام کے شہریوں میں سامنے آئے۔