آزاد جموں و کشمیر کی حکومت نے کورونا وائرس کے کیسز میں اضافے پر وادی بھر میں 2 ہفتوں کے لیے دوبارہ لاک ڈاؤن نافذ کرنے کا فیصلہ کر لیا۔

لاک ڈاؤن کا آغاز 22 نومبر کی رات 12 بجے سے ہوگا جو 6 دسمبر کی دوپہر 12 بجے ختم ہوگا۔

وزیر اعظم راجا فاروق حیدر کی صدارت میں آزاد جموں و کشمیر کابینہ کے اجلاس میں فیصلہ کیا گیا کہ لاک ڈاؤن کے دوران پبلک ٹرانسپورٹ ایس او پیز پر سختی سے عملدرآمد کے ساتھ چلانے کی اجازت ہوگی۔

اجلاس کے میڈیا بریفنگ کے دوران سینیئر وزیر چوہدری طارق فاروق کا کہنا تھا کہ یہ مشکل فیصلہ کرنا ضروری تھا کیونکہ آزاد کشمیر جیسے چھوٹے خطوں میں کورونا وائرس کی صورتحال بگڑتی جارہی ہے۔