پاکستان کے نامور اداکار نعمان اعجاز کے بڑے بیٹے زاویار نعمان، اداکارہ ماورا حسین اور احسن خان کے ساتھ ڈراما انڈسٹری میں قدم رکھنے کو تیار ہیں۔

خیال رہے کہ رواں برس فروری میں منعقد ہونے والے فیشن ویک میں اداکار نعمان اعجاز نے اپنے بڑے بیٹے زاویار کے ساتھ پہلی مرتبہ کسی فیشن شو میں ماڈلنگ کی تھی۔

برائیڈل کوچیور ویک میں نعمان اعجاز اور زاویار نعمان کی ریمپ واک کی ویڈیوز اور تصاویر بھی سوشل میڈیا پر وائرل ہوئی تھیں۔

جس کے بعد سے ہی چہ مگوئیاں کی جارہی تھیں کہ جلد ہی زاویار نعمان اداکاری کرتے نظر آئیں گے۔

اور اب چند روز قبل زاویار نعمان نے اپنے انسٹاگرام اکاؤنٹ پر اسکرپٹ کی تصاویر پر مشتمل ایک اسٹوری شیئر کی تھی جس سے صاف ظاہر تھا کہ وہ اپنا ڈیبیو کرنے جارہے ہیں۔

دوسری جانب دو روز قبل ماورا حسین نے اپنے انسٹاگرام اکاؤنٹ پر ایک تصویر شیئر کی تھی جس پر مداحوں کی جانب سے کہا جارہا تھا کہ شاید وہ شادی کرنے جارہی ہیں۔

بعدازاں انہوں نے اسی ڈرامے کے ایک سین کی ویڈیو شیئر کی تھی جس میں وہ مایوں کا جوڑا پہنے ہوئے نظر آئیں تھیں اور ساتھ میں انہوں نے 'قصہ مہربانو' کا ہیش ٹیگ بھی استعمال کیا تھا۔

اس ڈرامے کے حوالے سے مزید تفصیلات تاحال سامنے نہیں آئیں مگر کچھ سوشل میڈیا رپورٹس میں کہا جارہا ہے کہ نعمان اعجاز کے بڑے بیٹے زاویار نعمان اس ڈرامے سے اپنا ڈیبیو کرنے جارہے ہیں۔

ڈراما 'قصہ مہربانو کا' میں ماورا حسین، زاویار نعمان اور احسن خان مرکزی کرداروں میں نظر آئیں گے۔

علاوہ ازیں 'قصہ مہربانو کا' کی کاسٹ میں محمد احمد اور مشعال خان بھی شامل ہیں۔