کولمبین نژاد معروف گلوکارہ، ڈانسر، ماڈل و اداکارہ شکیرا نے ٹیکس چوری یا فراڈ کے کیس میں ہسپانوی حکام سے تصفیہ کرلیا، جس کے بعد ان کے خلاف عدالتی ٹرائل منسوخ کردیا گیا۔

خبر رساں ادارے ’رائٹرز‘ کے مطابق شکیرا نے 20 نومبر کو ہسپانوی عدالت میں پیش ہوکر حکومتی ارکان سے تصفیے کی تصدیق کی، جس کے بعد عدالت نے ان کے تصفیے کی منظوری دے دی۔

عدالت نے تصفیے کے تحت یہ بھی قرار دیا کہ گلوکارہ جیل جانے کی سزا بچنے کے لیے 4 لاکھ 30 ہزار امریکی ڈالر کا اضافی جرمانہ بھی ادا کریں گی۔

شکیرا اور ہسپانوی حکام کے درمیان طے پانے والے تصفیے کے تحت گلوکارہ حکومت کو 73 لاکھ امریکی ڈالر کا ہرجانہ دیں گی، جس کے بعد ان کے خلاف لگائے گئے تمام الزامات خارج کرکے انہیں کلیئر قرار دے دیا جائے گا۔

ہسپانوی حکام نے گزشتہ سال شکیرا کے خلاف ٹیکس چوری اور فراڈ کے مقدمات بناتے وقت بھی انہیں تصفیے کی پیش کش کی تھی، تاہم اس وقت گلوکارہ نے ایسی پیش کش مسترد کردی تھی۔

شکیرا پر الزام تھا کہ انہوں نے 2012 سے 2015 کے درمیان اسپین میں رہتے ہوئے حکومت کے ساتھ ٹیکس فراڈ یا چوری میں ڈیڑھ کروڑ ڈالر کی خیانت کی اور حکومت کو ٹیکس ادا نہیں کیا۔

ان پر الزام تھا کہ مذکورہ عرصے کے دوران شکیرا کی کمائی زیادہ تھی اور وہ اسپین میں ہی رہائش پذیر تھیں لیکن انہوں نے حکومت کو واجب الادا ٹیکس نہیں دیا۔

ان پر حکام نے 6 مختلف الزامات کے تحت ٹیکس چھپانے اور ادا نہ کرنے کے الزامات عائد کر رکھے تھے۔

تاہم شکیرا اور ان کے وکیل ہسپانوی حکام کے الزامات کو مسترد کرتے آرہے تھے۔

شکیرا کے وکلا کے مطابق گلوکارہ اسپین میں باضابطہ طور پر 2015 میں منتقل ہوئیں، اس سے قبل وہ جزیرہ نما ملک بہاماس میں ٹیکس ادا کرتی رہی ہیں اور 2015 سے قبل کی کمائی پر وہ اسپین کو ٹیکس ادا کرنے کی مجاز نہیں۔

گلوکارہ کے وکلا کے مطابق شکیرا کے ہسپانوی فٹ بالر جیرارڈ پیک سے تعلقات عام ہونے کے بعد ہی وہ اسپین منتقل ہوئیں، اس سے قبل وہ یہاں ٹیکس دینے کی پابند نہیں تھیں۔

شکیرا کے وکلا کا کہنا تھا کہ اداکارہ نے 2015 کے بعد اب تک اسپین میں ایک کروڑ 70 لاکھ یورو سے زائد کا ٹیکس ادا کیا اور وہ ٹیکس نادہندہ نہیں ہیں جب کہ 2012 سے 2014 کے درمیان وہ ہسپانوی حکام کو ٹیکس دینے کی پابند نہیں تھیں۔

انہوں نے 2010 کے بعد ہسپانوی فٹ بالر ر جیرارڈ پیک سے تعلقات استوار کیے تھے اور 2015 میں وہ اسپین منتقل ہوگئی تھیں اور انہیں فٹ بالر سے دو بچے بھی ہیں مگر جون 2022 میں دونوں نے علیحدگی کی تصدیق کی تھی اور اب ان کے درمیان بچوں کی کفالت سمیت دیگر مالی معاملات پر بھی قانونی جنگ جاری ہے۔