لاہور: پاکستان کرکٹ کے چیف سلیکٹر ہارون رشید نے شائقین سے کہا ہے کہ وہ ٹیم کی جیت کے ساتھ ساتھ ہار کیلئے بھی تیار رہیں۔

ورلڈ کپ کے کوائٹر فائنل میں شکست کے بعد پاکستان کرکٹ ٹیم تشکیل نو کے مراحل میں ہے۔

ون ڈے کپتان مصباح الحق اور بوم بوم شاہد آفریدی جیسے سینئر پلیئرز کی ون ڈے فارمیٹ سے ریٹائرمنٹ کے بعد گرین شرٹس دیگر فارمیٹس کے برعکس ون ڈے فارمیٹ میں زیادہ ناتجربہ کار اور کمزور دکھائی دے رہی ہے ۔

ہارون رشید بدھ کو یہاں نیشنل کرکٹ اسٹیڈیم میں کھیلے گئے پیٹرنز ٹرافی گریڈ- ٹو کے فائنل میں پلیئرز کی کارکردگی کا جائزہ لیتے رہے۔

میچ کے آخری روز ڈان نیوز سے گفتگو میں انہوں نے کہا 'ہار اور جیت کھیل کا حصہ ہے۔ ہمارے یہاں صرف ٹیم کی جیت کی امیدیں قائم کرلی جاتی ہیں'۔

انہوں نے کہا کہ ٹیم نئی ہے، جس کے اعلان پر بھی تنقید سہی اور اگر ٹیم ہاری تو وہ تب بھی تنقید کا سامنا کرنے کے لیئے پوری طرح تیار ہیں ۔

اوپنر احمد شہزاد اور مڈل آرڈر بلے باز عمر اکمل کو ڈراپ کیے جانے پر چیف سلیکٹر نے پالیسی بیان دیتے ہوئے کہا دونوں کھلاڑیوں کو دو فارمیٹس سے ڈراپ کرنے کا مقصد انہیں ڈسپلن کا پابند بنانا ہے۔

'عمرکے برعکس چونکہ احمد شہزاد تینوں فارمیٹس کا حصہ تھے لہذا انہیں ٹی ٹوئنٹی اسکواڈ میں برقرار رکھا گیا'۔

انہوں نے انکشاف کیا پاکستان کرکٹ بورڈ نے فیصلے سے قبل دونوں کھلاڑیوں کو ملاقات میں پیغام دے دیا تھا اور دونوں بخوبی آگاہ ہیں کہ انہیں کن شعبوں میں کام کرنے کی ضرورت ہے ۔