داعش کے وحشیانہ اقدامات ناقابل برداشت، طالبان
کابل: افغان طالبان نے جنگجو تنظیم داعش کی جانب سے افغان شہریوں کو باندھ کر دھماکے کے ذریعے قتل کرنے کی ویڈیو کی شدید مذمت کی ہے۔
خبر رساں ادارے اے ایف پی کے مطابق گذشتہ دنوں منظر عام پر آنے والی ویڈیو میں دیکھا جاسکتا ہے کہ افغانستان کے کسی نامعلوم مقام پر داعش نے ہلاک کرنے سے قبل ان قیدیوں کو ’مرتد‘ طالبان اور حکومت کا حامی قرار دیا۔
پانچ منٹ سے زائد دورانیے کی اس ویڈیو کو جہادی سوشل میڈیا فورم پر عربی اور پشتو زبان میں شیئر کیا گیا ہے۔
تاہم طالبان کی جانب سے ان کو افغانستان کا عام شہری قرار دیا گیا ہے۔
مزید پڑھیں: افغانستان: داعش کا خود کش حملہ، طالبان کی مذمت
گذشتہ روز طالبان کی جانب سے جاری کیے گئے بیان میں کہا گیا کہ ’وحشیانہ ویڈیو میں خود کو داعش کا حامی قرار دینے والے اغوا کار متعدد قبائلی رہنماؤں اور دیہاتیوں کو دھماکے کے ذریعے ہلاک کررہے ہیں۔‘
طالبان کی جانب سے کہا گیا ہے کہ ’ایسے جرائم اور دیگر وحشیانہ واقعات، جو کچھ غیر ذمہ دارانہ جاہل افراد کی جانب سے اسلام اور مسلمانوں کی آڑ میں کیے جارہے ہیں ناقابل برداشت ہیں۔‘
ویڈیو کے منظر عام پر آنے کے بعد حالیہ دنوں میں افغان طالبان اور داعش کے درمیان جاری کشیدگی میں اضافے کا اندازہ لگایا جاسکتا ہے جہاں داعش کی جانب سے طالبان کو ان کے ہی علاقے میں چیلنج کیا جارہا ہے۔
گذشتہ 14 سال سے افغانستان میں طالبان کی جانب سے امریکا، نیٹو اور افغان سیکیورٹی فورسز کو نشانہ بنایا جاتا رہا ہے جس میں سیکیورٹی اہلکاروں سمیت ہزاروں افغان شہری بھی ہلاک ہوئے ہیں۔
یہ بھی پڑھیں: افغانستان میں دولت اسلامیہ اور طالبان جنگجوؤں میں جھڑپیں
یاد رہے کہ گذشتہ دنوں افغانستان کے صوبے فرح میں طالبان اور داعش کے جنگجوؤں کے درمیان مسلح چھڑپیں ہوئی تھی، جن میں دونوں گرپوں کے متعدد افراد ہلاک ہوئے۔
گذشتہ دنوں طالبان کے بانی رہنما ملا محمد عمر کی ہلاکت کی خبریں منظر عام پر آئیں تھیں جس میں کہا گیا تھا کہ طالبان رہنما 2 سال قبل ہلاک ہوچکے ہیں۔
طالبان نے اس خبر کی تصدیق کرتے ہوئے ملا عمر کے نائب ملا اختر منصور کو طالبان کا نیا امیر مقرر کردیا تاہم طالبان شوریٰ کے اس فیصلے کو تنظیم کے متعدد دھڑوں نے ماننے سے انکار کردیا تھا۔
ملا عمر کی ہلاکت کی خبریں منظر عام پر آنے سے قبل افغان حکومت اور طالبان کے درمیان پاکستان میں امن مذاکرات کا دوسرا دور شروع ہونے والا تھا جسے طالبان نے معطل کرنے کا اعلان کردیا۔
افغان امن مذاکرات کے حمایتی امریکا نے گذشتہ دنوں طالبان اور افغان حکام کو مذاکرات دوبارہ شروع کرنے پر زور دیتے ہوئے کہا تھا کہ افغانستان میں طویل امن کے لیے مذاکرات انتہائی ضروری ہیں۔
لائیو ٹی وی
تبصرے (2) بند ہیں