ہندوستانی دہشتگردی، ثبوت اقوام متحدہ کے حوالے
نیو یارک: وزیراعظم کے مشیر برائے امورِ خارجہ و قومی سلامتی سرتاج عزیز کا کہنا ہے کہ پاکستان میں دہشت گردی کے واقعات میں ہندوستان کے ملوث ہونے کے تمام ثبوت اقوام متحدہ کو فراہم کر دیئے گئے ہیں.
نیویارک میں میڈیا کے نمائندوں سے بات کرتے ہوئے سرتاج عزیز نے بتایا کہ پاکستان کی جانب سے اقوام متحدہ کے لیے مستقل مندوب ڈاکٹر ملیحہ لودھی نے اقوام متحدہ کے سیکرٹری جنرل بان کی مون کو ان کے آفس میں ڈوزئیر پیش کیا۔
سرتاج عزیز نے دہشت گردی کا ہندوستانی واویلا مسترد کرتے ہوئے کہا کہ ہندوستان کراچی اور بلوچستان میں براہ راست دہشت گردوں کو مدد فراہم کررہا ہے۔
ہندوستانی وزیر خارجہ سشما سوراج کی جانب سے اقوام متحدہ کی جنرل اسمبلی میں خطاب کے دوران پاکستان پر لگائے گئے الزامات کے جواب میں پاکستانی مشیر خارجہ سرتاج عزیز نے پریس کانفرنس کرتے ہوئے کہا کہ دہشت گردی میں ہندوستان کے ملوث ہونے کے تمام ثبوت اقوام متحدہ کو فراہم کر دئیے ہیں۔
ان کا کہنا تھا کہ پاکستان مذاکرات کے لیے تیار ہیں جبکہ ہندوستان مذاکرات سے ہمیشہ بھاگتا رہا ہے۔
مشیر خارجہ سرتاج عزیز نے کہا کہ اُنہوں نے 15 ممالک کے وزرائے خارجہ سے ملاقات کی اور انھیں ہندوستانی ہٹ دھرمی سے آگاہ کیا ہے۔
مشیر خارجہ کا کہنا تھا کہ ہندوستان نے آج تک ممبئی حملوں کے حوالے سے پاکستان کو کوئی ثبوت پیش نہیں کئے جبکہ سمجھوتہ ایکسپریس پر پاکستان نے تمام ثبوت ہندوستانی حکومت کو فراہم کئے تھے لیکن اس پر آج تک کوئی پیش رفت نہیں کی گئی۔
لائیو ٹی وی