ہندوستان: ماؤ باغیوں کا حملہ، سولہ ہلاکتیں
رائپور: ہندوستانی ریاست چھتیس گڑھ میں منگل کو ماؤ باغیوں کے حملے میں انڈین سیکورٹی فورسز کے کم سے کم سولہ اہلکار ہلاک ہو گئے۔
ذرائع کے مطابق گھات لگائے درجنوں باغیوں نے ریاست کے دارالحکومت رائپور کے جنوب میں سیکورٹی فورسز پر شدید فائرنگ کی۔
ایک سینیئر پولیس ذرائع نے اپنا نام ظاہر نہ کرنے کی درخواست پر خبر رساں ادارے اے ایف پی کو بتایا کہ رائپور سے چار سو کلو میٹر دوری پر سولہ افراد جھڑپ میں ہلاک ہو ئے ہیں۔
ہندوستان کے سی این این۔ آئی بی این نیٹ ورک نے حملے میں کم سے کم بیس سیکورٹی اہلکاروں کی ہلاکت کا خدشہ ظاہر کیا ہے۔
باغیوں نے سیکورٹی فورسز کو اس وقت نشانہ بنایا جب فورسز معمول کی سڑک کلیئر کاروائی میں مصروف تھی۔
پچھلے سال مئی میں حکمراں جماعت کانگریس کے قافلے پر ماؤ باغیوں کے حملے میں ریاستی صدر اور ان کے بیٹے سمیت کانگریس کے چوبیس ارکان ہلاک ہو گئے تھے۔
ماؤ باغی بہتر روزگار اور زیادہ زمینی علاقے کی مانگ کرتے ہیں جبکہ ان کے مطالبات میں کمیونسٹ معاشرے کا نفاذ بھی شامل ہے۔
لائیو ٹی وی