اگر تو اپنی تصاویر دیکھ کر آپ سوچتے ہیں کہ دیگر افرادکو آپ کی عمرکتنی لگتی ہوگی تو مائیکروسافٹ نے اس سلسلے میں آپ کی مدد کے لیے ایک نئی ویب سائٹ متعارف کرا دی ہے۔

مائیکروسافٹ نے http://how-old.net/# نامی سائٹ متعارف کرائی ہے جو کسی اپ لوڈ تصویر کا تجزیہ کرکے مذکورہ شخص کی عمراور جنس کا تعین کرتی ہے۔

مائیکروسافٹ کی مشین لرننگ بلاگ کے مطابق اس پراجیکٹ کا آغاز کمپنی کے انجنئیرز نے ایک سادہ تجربے کے لیے کیا تھا۔

درحقیقت وہ چہروں کی شناخت کرنے والے ایک نئے سافٹ ویئر کو تفریح کے لیے استعمال کررہے تھے اور انہوں نے اسے لوگوں کو متعارف کراتے ہوئے ان کے خیالات جاننے کا فیصلہ کیا۔

حیرت انگیز طور پر صرف چند گھنٹوں کے اندر ہی اس تجربے میں شرکت کرنے والے افراد کی تعداد 30 ہزار تک پہنچ گئی کیونکہ ان کے اندر یہ جاننے کا اشتیاق تھا کہ اپنی تصویر میں وہ کس عمر کے نظر آتے ہیں۔

تاہم اگر یہ ویب سائٹ آپ کی تصویر کا تجزیہ کرکے عمر غلط بتائے تو زیادہ غصہ مت ہو کیونکہ ہر تصویر پر اس سائٹ کے نتائج مختلف ہوتے ہیں تو بس چند تصاویر کو اپ لوڈ کرکے جاننے کوشش کرتے رہیں۔