ڈاکٹر عاصم کی رہائی مخالف رینجرز درخواست مسترد
کراچی: سندھ ہائی کورٹ نے ڈاکٹرعاصم کیس میں تفتیشی افسر کی تبدیلی اور چیئرمین سندھ ہائیر ایجوکیشن کمیشن کو رہا کرنے کے خلاف درخواست مسترد کرتے ہوئے ٹرائل کورٹ سے رجوع کرنے کا حکم دے دیا۔
سندھ ہائی کورٹ میں ڈاکٹر عاصم کیس کے تفتیشی افسر کی تبدیلی اور سابق وزیر پیٹرولیم کی رہائی کے خلاف رینجرز افسر عنایت اللہ کی مدعیت میں دائر کردہ درخوست کی سماعت ہوئی۔
درخواست میں رینجرز نے ڈاکٹر عاصم کے تفتیشی افسر کی تبدیلی کو چیلنج کرتے ہوئے موقف اختیار کیا تھا کہ تفتیشی افسر کی تبدیلی غیر قانونی ہے۔
مزید پڑھیں : ڈاکٹر عاصم کی رہائی: رینجرز کا عدالت سے رجوع
جسٹس احمد علی شیخ کی سربراہی میں ہائی کورٹ کے ڈویژن بینچ نے سماعت کے دوران ریمارکس دیے کہ کیس تفتیش کے مرحلے میں ہے اس لیے عدالت مداخلت نہیں کرسکتی۔
عدالت نے درخواست مسترد کرتے ہوئے درخواست گزار کو حکم دیا کہ وہ متعلقہ ٹرائل کورٹ سے رجوع کریں۔
واضح رہے کہ سندھ رینجرز نے چند روز قبل پولیس کی جانب سے سابق وزیر پیٹرولیم اور پاکستان پیپلز پارٹی (پی پی پی) کے رہنما ڈاکٹر عاصم حسین کی دہشت گردوں کے علاج کے مقدمے میں رہائی کے خلاف سندھ ہائی کورٹ سے رجوع کیا تھا۔
درخواست میں کہا گیا تھا کہ ایف آئی آر میں درج جرائم میں مجرم ٹھہرائے جانے کے لیے ڈاکٹر عاصم کے خلاف کافی ثبوت موجود ہیں۔
یہ بھی پڑھیں : رینجرز، پولیس کے بعد ڈاکٹر عاصم سے نیب کی تفتیش
درخواست میں مقدمے کے تفتیشی افسر ڈی ایس پی الطاف حسین کے خلاف کارروائی کی استدعا بھی کی گئی تھی۔
خیال رہے کہ ڈاکٹر عاصم حسین کے خلاف اپنے ہسپتال میں دہشت گردوں کا علاج کرنے اور انہیں پناہ دینے پر رینجرز کی مدعیت میں کراچی کے نارتھ ناظم آباد تھانے میں مقدمہ درج کیا گیا تھا۔
پبلک پراسیکیوٹر کو ہٹانے کا فیصلہ چیلنج
رینجرز نے سندھ ہائی کورٹ میں دائر ایک اور درخواست میں ڈاکٹر عاصم کیس میں رینجرز کے اسپیشل پبلک پراسیکیوٹر مشتاق جہانگیری کو ہٹانے کا فیصلہ چیلنج کردیا۔
مزید پڑھیں : ڈاکٹر عاصم کے ریمانڈ میں مزید توسیع
درخواست میں موقف اختیار کیا گیا ہے کہ حکومت سندھ بدنیتی کی بنا پر اپنی مرضی کا وکیل تعینات کر رہی ہے، لہٰذا عدالت سے استدعا کی جاتی ہے کہ وہ صوبائی حکومت کے فیصلے کے خلاف حکم امتناع جاری کرے۔
واضح رہے کہ سابق صدر آصف علی زرداری کے قریبی دوست ڈاکٹر عاصم کو رینجرز نے 26 اگست کو گرفتار کیا تھا اور 90 دن کا ریمانڈ مکمل ہونے پر 25 نومبر کو پولیس کے حوالے کردیا تھا۔
پولیس کی تفتیش مکمل ہونے پر نیب نے ڈاکٹر عاصم کو اپنی تحویل میں لے کر گزشتہ روز احتساب عدالت سے ان کا دوسری بار 7 روزہ ریمانڈ لیا تھا۔
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں
لائیو ٹی وی